19/11/2019 21:09
728 x 90

ABŞ-dakı diasporumuzun fəaliyyəti ilə bağlı Asim Mollazadənin mübahisəli dəyərləndirməsi...

Arzuxan Əlizadə: “Birləşmiş Ştatlarda Azərbaycan diasporunun zəif olduğunu demək doğru yanaşma deyil”

img

Azərbaycan Demokratik İslahatlar Partiyasının sədri, deputat Asim Mollazadə ABŞ Konqresinin ermənipərəst nümayəndələrinin Azərbaycanın işğal altındakı ərazilərinə qanunsuz səfərlərinin intensivləşməsini şərh edərkən deyib ki, ABŞ-da Azərbaycan diasporu zəifdir:

“Azərbaycan diasporu təbii ki, Amerikada çox zəifdir. Ermənilərin milyardlara malik, güclü diasporu orada fəaliyyət göstərir, illərlə kök salıblar, təşkilatlanıblar. Eyni zamanda, erməni diasporu Avropada da öz işini görür. Bu mənada onlara güc nümayiş etdirmək çətindir. Çünki bizim diasporumuz hələ təzə başlayıb, ermənilər isə Amerikada çoxdan təşkilatlanıblar. Hesab edirəm ki, ABŞ və Avropa mediası ilə əməkdaşlığımız olmalıdır, beynəlxalq ictimaiyyətə sözümüzü çatdırmalıyıq”.

Sözügedən məsələdə A.Mollazadənin sərgilədiyi yanaşma reallıqla uzlaşmır. ABŞ-da Azərbaycan diasporu zəif olsaydı, o zaman Birləşmiş Ştatlar Dağlıq Qarabağ məsələsində, birmənalı olaraq, ermənilərin mövqeyini dəstəkləyərdi. Azərbaycanın həyata keçirdiyi enerji və nəqliyyat layihələrinə dəstək verməzdi. ABŞ-da Azərbaycan diasporu zəif olsaydı, o zaman bir müddət əvvəl ermənilərin olduqca sıx yaşadığı Kaliforniya ştatına səfər edən Ermənistan Baş naziri Nikol Paşinyan sürprizlərlə üzləşməzdi. Belə ki, Paşinyan Los-Ancelesdə ermənilərlə görüşərkən Azərbaycan tərəfi Qarabağla bağlı bir sıra həqiqətləri yaydı. Yayılan postellər vasitəsilə ermənilərin işğalçılıq fəaliyyəti ifşa edildi. Digər tərəfdən, Azərbaycanın diaspor fəaliyyəti zəif olsaydı, o zaman 10 il qüvvədə olan bədnam “907-ci düzəliş” dondurulmazdı. O üzdən, hesab etmək olmaz ki, ABŞ-da Azərbaycan diasporu zəifdir.

Başqa bir tərəfdən, deputat A.Mollazadə tez-tez ABŞ-a səfər edən və ümumiyyətlə, bu ölkə ilə münasibətlərə xüsusi önəm verən siyasətçidir. Əgər doğrudan da onun iddia etdiyi kimidirsə, deməli, o özü də bu sahədə yetərincə səy göstərməyib.      

Məsələ ilə bağlı Azərbaycan Respublikasının Diasporla İş üzrə Dövlət Komitəsi ilə əlaqə saxladıq. Komitədən bildirdilər ki, A.Mollazadənin fikirləri ilə tanışdırlar. Uyğun bilinərsə, buna münasibət bildiriləcək.

  • “Obyektivlik naminə qeyd etməliyik ki, müstəqillik illərində bu istiqamətdə xeyli iş görülüb”

AMİP baş katibi Arzuxan Əlizadə isə “Bakı-Xəbər”ə açıqlamasında qeyd etdi ki, ABŞ-da Azərbaycan diasporunun zəif olduğunu demək doğru yanaşma deyil: “Bu fikirləri 20 il əvvəl desəydi, o zaman müəyyən mənada ona haqq qazandırmaq olardı. Çünki Azərbaycan uzun illər Rusiyanın əsarəti altında olub. Azərbaycanlıların ABŞ-la geniş əlaqələri olmayıb. Ancaq obyektivlik naminə qeyd etməliyik ki, müstəqillik illərində bu istiqamətdə xeyli iş görülüb. Azərbaycan diasporu ABŞ-da türk icması ilə bu məsələdə sıx əməkdaşlıq edir. Ötən illər ərzində bir sıra əlaqələr qurulub. Erməni lobbisi, əvvəlki kimi, ABŞ-da Azərbaycana yönəlik fəaliyyət göstərə bilmir. Bəli, ABŞ Konqresində ermənilərin mənafeyindən çıxış edən konqresmenlər və senatorlar var. Nəzərə almaq lazımdır ki, ermənilər ABŞ-da həm say baxımından çoxdur, həm də çoxdan təşkilatlanıblar. Bundan başqa, ortada xristian amili də var. Ancaq onu da nəzərə almaq lazımdır ki, ABŞ-dakı yəhudi icması Azərbaycanın maraqlarını müdafiə edir. Etiraf edirəm ki, görüləsi çoxsaylı iş var, amma bu o demək deyil ki, Azərbaycanın diaspor fəaliyyəti ABŞ-da çox zəifdir”.

Vidadi ORDAHALLI

Son xəbərlər