22/11/2019 20:09
728 x 90

Radikalların 8 oktyabr piketində yalan danışan “məcburi köçkün” - ona 2 dəfə ev verilib, uşaqları işləyir…

Elşən Həsənov: “Dediyiniz kişi isə aksiyadan istifadə edərək dövləti şantaj etmək istəyənlərin dəstəsinə aiddir”

img

“Milli Şura”nın oktyabrın 8-də keçirdiyi piketdə iştirak edən Yaşar Cəfərov adlı şəxs yataqxanada ağır şəraitdə qaldığını, ona və ailəsinə dövlət tərəfindən qayğı göstərilmədiyini demişdi və bütün müxalifyönlü internet kanalları da bu yalanı tirajlamışdılar.

Araşdırma aparılıb və bəlli olub ki, müxalifətin Bakıda keçirdiyi piketə qatılan məcburi köçkün Yaşar Cəfərovun dövlət qayğısından uzaq olması barədə səsləndirdiyi fikirlər yalandır. Bunu Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev keçirdiyi mətbuat konfransında deyib. Onun sözlərinə görə, Zəngilan rayonundan olan həmin şəxsə dövlət tərəfindən diqqət və qayğı göstərilib: "O, Azərbaycan ictimaiyyətinə yalan söyləyib. Ailənin özünə 2 otaqlı, digər ailə üzvünə də 2 otaqlı mənzil verilib. Hazırda ailə üzvləri işləyir".

Maraqlıdır, bu adamları, xüsusilə də ahıl yaşındakı şəxsləri yalan danışmağa vadar edən səbəb nədir?

  • “AXCP-nin növbəti aksiyalarında həmin adamlara rast gəlinməyəcək”

Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, belə bir biabırçılığın ifşa olunması dərin mətləblərdən xəbər verir: “İlk baxışda həmin kişinin dediyinə inanmaq olardı. Çünki yaşlı adamdır, niyə belə ağ yalan danışsın ki? Ancaq sonra rəsmi qurum səviyyəsində onun dediklərinin hamısı təkzib edildi. Məlum oldu ki, adam tam olaraq dövlətin qayğısı altındadır. Tam səmimi deyirəm ki, heç mən dövlətdən o cür qayğı görməmişəm ki, ailəmizə iki ev verilsin. Deməli, bu qənaətə gəlirik ki, bəzi adamlar piketin, mitinqin mahiyyətini dərk etməyərək ora çıxırlar. Sosial şəbəkələrdə aparılan yanlış təbliğatın təsirinə düşüb belə bir addım atırlar. Ancaq dediyiniz kişi isə aksiyadan istifadə edərək dövləti şantaj etmək istəyənlərin dəstəsinə aiddir. Belələri də az deyil. Onlar ajiotajdan istifadə edirlər. Kameraların önünə keçir və narazılıqlarını ifadə edirlər ki, kimsə gələcəkdə onların “neytrallaşması” barədə təşəbbüs etsin. Orada çıxış edən başqa bir xanımın dediklərinə də diqqət etdim. Çox ağır çəkili, yanağından qan daman bir xanım dedi ki, axırıncı dəfə əti kilosu 6 manat 50 qəpik olanda alıb yeyib. Hazırda ət almağa imkanı çatmır. Mən araşdırdım. Məlum oldu ki, ətin kilosu deyilən qiymətə 5 il əvvəl olub. Yəni bu məntiqlə yanaşdıqda, 5 il ət yeməyən xanım o çəkidə ola bilməzdi. Bütün bunlar sübut edir ki, heç 50 nəfərlik aksiyaya çıxanların içində belə, ideologiya daşıyıcısı olan AXCP tərəfdarı olmayıb. Belə yalançı, fürsətcil, məqsədli elektoratla nəsə etmək mümkün deyil. İstəsəniz monitorinq apara bilərsiniz. AXCP-nin növbəti aksiyalarında həmin adamlara rast gəlinməyəcək. Məhz buna görədir ki, radikallar yalnız şəhərin mərkəzində aksiya keçirməyə cəhd edirlər. İstəyirlər ki, belə təsadüfi adamların vasitəsilə şou düzəltsinlər. Bax, buna görədir ki, onlar nisbətən uzaq yerdəki aksiyalara getməkdən boyun qaçırırlar”.

Məhəmmədəli QƏRİBLİ

Son xəbərlər