19/11/2019 19:04
728 x 90

Suriyada Türkiyə əməliyyatlarına Azərbaycanın rəsmi münasibəti...

Mübariz Əhmədoğlu: “Sözügedən məsələdə Azərbaycan beynəlxalq hüquqa uyğun mövqe sərgiləməlidir”

img

Məlum olduğu kimi, Türkiyə ordusu Suriyada yeni hərbi əməliyyata başlayıb. “Fərat qalxanı” və “Zeytun budağı” əməliyyatından sonra başlayan 3-cü əməliyyat “Sülh çeşməsi” adı ilə həm hava, həm də qurudan aparılacaq. Məqsəd Türkiyə ilə sərhəddə yerləşən YPG silahlı qruplaşmasını sarsıtmaq və 30 kilometrlik təhlükəsizlik zonası yaradaraq, Türkiyədə yaşayan 2 milyon suriyalı qaçqını orada yerləşdirməkdir.

Türkiyənin Suriyanın şimalında, Fərat çayından şərqdə əməliyyat keçirmək istəyi lap əvvəldən bəlli idi. Çünki Türkiyə ya Suriya ərazisindən öz ərazi bütövlüyü və təhlükəsizliyinin təhdidinə dözməli, ya da onu narahat edən bu problemi həll etməli idi. Bu məsələdə isə yeganə maneə mümkün əməliyyatın keçiriləcəyi bölgədə ABŞ hərbçilərinin, onların təlim keçdiyi PKK terror təşkilatının Suriya qolu YPG-nin olması idi. Yaşanan fikir ayrılıqlarına baxmayaraq, sentyabr ayının əvvəlində Türkiyə Birləşmiş Ştatlarla Suriyada təhlükəsizlik zonasının yaradılmasına dair birgə əməliyyat keçirməyə dair razılığa gələ bilib. Lakin sonradan danışıqların uzanması və rəsmi Ankaranı qane edəcək nəticənin əldə edilməməsi Türkiyəni təkbaşına bu işi görməyə vadar etdi.

O da məlumdur ki, Azərbaycanla Türkiyə qardaş dövlətlər olmaqla yanaşı, strateji müttəfiqdirlər. İki ölkə arasında bütün sahələrdə çox yaxın əlaqələr var. Eyni zamanda, Türkiyənin Suriyada həyata keçirdiyi hərbi əməliyyatlar Azərbaycanda böyük maraqla izlənir. Bütün bunlarla yanaşı, Azərbaycan Türkiyənin Suriyada həyata keçirdiyi hərbi əməliyyatlar məsələsində rəsmi olaraq hansı mövqe tutmalıdır?

  • “Türkiyənin Suriyada hərbi əməliyyatları nə qədər tez başa çatsa, bu bir o qədər qardaş ölkənin xeyrinə olacaq”

Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, bu məsələdə Azərbaycan beynəlxalq hüquqa uyğun mövqe sərgiləməlidir: “Azərbaycanın belə vəziyyətlərdə standart yanaşması var. O da ondan ibarətdir ki, Azərbaycan beynəlxalq hüquq normalarına uyğun mövqe sərgiləyir. Məsələn, Pakistan Dağlıq Qarabağ məsələsində çox yüksək səviyyədə Azərbaycana dəstək verir. Hətta bəyan ediblər ki, hərb yolu seçilsə, Pakistan Azərbaycanın yanında olacaq. Kəşmir beynəlxalq hüquqa görə Hindistan ərazisi sayılır. Azərbaycanın Kəşmir məsələsində mövqeyi ondan ibarətdir ki, rəsmi Bakı beynəlxalq hüququ müdafiə edir. Həmçinin, Krım məsələsində də biz beynəlxalq hüququ müdafiə edirik. Türkiyə bizim yaxın müttəfiqimizdir. Bütün bunlarla yanaşı, Suriya məsələsində biz beynəlxalq hüquqa uyğun mövqe tutmalıyıq. Yəni Suriyadakı proseslər beynəlxalq hüquq normalarına uyğun həll edilməlidir. Hesab edirəm ki, Türkiyənin Suriyada hərbi əməliyyatları nə qədər tez başa çatsa, bu bir o qədər qardaş ölkənin xeyrinə olacaq. Çünki Suriya Türkiyə üçün bataqlıq kimi nəzərdə tutulub. Türkiyənin güclü dövlət olması və vacib strateji mövqeyi bir sıra dövlətləri narahat edir, xüsusən də böyük dövlətləri. Ona görə də mümkün qədər bu işi tez başa çatdırmaq lazımdır. Yoxsa, qardaş ölkə üçün çətin olacaq”.

Vidadi ORDAHALLI

Son xəbərlər