Türkiyənin Suriya əməliyyatlarına görə Paşinyan hökumətinin qapalı iclası - Ermənistan nəyə ümid edir...
Türkiyə ordusu oktyabrın 9-da Suriyada daha bir analoji əməliyyata başlayıb. Xəbər verdiyimiz kimi, “Sülh çeşməsi” adlanan əməliyyatda hədəf sərhəd boyu 30 km enində təhlükəsizlik zolağı yaradaraq ərazini PKK/PYD/YPG/ terror tör-töküntülərindən təmizləmək və qardaş ölkəyə terror təhlükəsini və qaçqın axınını minimuma endirməkdir.
Əməliyyatın təkcə birinci günündə 109 terrorçunun məhv edildiyi bildirilir. Türkiyənin keçirdiyi bu əməliyyatdan daha çox narahat olan Ermənistandır. Hətta bildirilir ki, təcili iclas çağıran Baş nazir Nikol Paşinyan da Suriyadakı situasiyadan narahatlığını dilə gətirib: “Ermənistan Türkiyənin Suriyaya hərbi müdaxilə aktını qınayır. Bizim dəyərləndirməmizə görə, bu fəaliyyət Suriyada humanitar böhranı daha da dərinləşdirəcək. Beynəlxalq ictimaiyyəti bu qanunsuz fəaliyyəti dayandırması üçün tədbir görməyə, milli və dini azlıqların hüquqlarını müdafiəyə çağırırıq. Ermənistan Hələbə humanitar missiyanı uğurla icra edir və bu missiyanı davam etdirəcək. Hökumətin iclasından sonra icraedici hakimiyyətin nümayəndələri qapalı rejimdə Suriyadakı vəziyyəti və İrəvanın gələcək mövqeyini müzakirə edəcəklər”.
Qeyd edək ki, Paşinyanın keçirdiyi qapalı iclasda Tükiyənin Suriyaya müdaxiləsi ilə bağlı daha hansı detalların müzakirə olunduğu ilə bağlı məlumat verilmir. Ermənistan kimi ölkə bu cür qlobal məsələni müzakirə etməklə nəyisə dəyişə bilərmi?
- “...antiterror əməliyyatı ona qarşı da həyata keçirilə bilər”
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın həmin proseslərə təsir etmək imkanları sıfıra bərabərdir: “Ermənistanın yiyəsi olan Rusiya buna göz yumursa və Türkiyənin Suriyada etdiklərinə etiraz etmirsə, onda Ermənistan nə çarədir ki? Ermənistanın gücü, imkanları həmin proseslərdə iştirakçı və söz sahibi olmağa imkan vermir. Yaxın Şərqdə baş verənlər qlobal miqyaslı hadisələrdir. Bir qədər loru dillə ifadə etsək, əjdahaların döyüşüdür. Ermənistan və Nikol Paşinyan bunu hamıdan gözəl bilir və anlayır. Sadəcə, onlar bu yolla özlərində olan narahatlığı büruzə verirlər. Ermənistan nəyəsə təsir etmək gücündə deyil, amma ciddi narahatdır. Bunun da əsaslı səbəbləri var. Birincisi, ermənilər anlayır ki, Türkiyənin güclənməyi onlara ziyandır. Çünki Ermənistan Türkiyə ilə açıq düşmənçilik aparır. İkincisi isə anlayırlar ki, belə bir əməliyyatı Azərbaycan da onlara qarşı keçirə bilər. Təbii ki, burada Türkiyənin də açıq və gizli dəstəyini biz hiss etmiş olarıq. Ermənistanda bütün qurumlar Türkiyənin hərəkətinə etiraz edirlər. Hətta elə bəyanatlar var ki, orada guya Türkiyənin həm də Suriyadakı ermənilərə də həmlə etdiklərinə dair fikirlər əksini tapır. Suriyada az sayda olsa da, ermənilər yaşayırlar. Onlar da hər zaman Türkiyəyə qarşı döyüşən PKK, YPG ilə əlbir olublar. İndiki əməliyyatda da layiqli cəzalarını alacaqlar. Ermənistan bu məsələdən, sadəcə, təbliğat və antitəbliğat vasitəsi olaraq istifadə edir. Bununla Türkiyəni guya işğalçı kimi qələmə verməyə çalışır. Hətta Suriya hadisələrini “qondarma soyqırım”la müqayisə etmək kimi cəhdlərə də rast gəlirik. Ermənistan bundan özünə dərs götürməlidir. Bilməlidir ki, yaxın zamanda analoji bir antiterror əməliyyatı ona qarşı da həyata keçirilə bilər. Paşinyanın bütün çabaları bununla bağlıdır”.
Məhəmmədli QƏRİBLİ
