Məlum olduğu kimi, 2020-ci ildə Dağlıq Qarabağdakı işğalçı rejim qondarma “prezident” seçkiləri keçirəcək. Bəllidir ki, qondarma rejimin indiki başçısı Paşinyanın kadrı sayılmır. Hətta Paşinyana qarşı olan müqavimət cəbhəsi kimi tanınan, şərti adı “Qarabağ klanı” olan qruplaşmada təmsil edilir. Paşinyan Dağlıq Qarabağa etdiyi son səfərdən sonra konkret olaraq oradakı hakimiyyət dəyişikliyi ilə bağlı hazırlanan ssenarini həyata keçirməyə başlayıb.
Hazırda Bako Saakyanın postunu ələ keçirmək uğrunda Köçəryan-Sarkisyan rejimi ilə Paşinyan hakimiyyəti arasında mübarizənin artdığı müşahidə olunur. Artıq Nikol Paşinyan hökuməti 2020-ci ildə hərbi xuntanın başına gətirmək üçün öz namizədini müəyyənləşdirib. Erməni KİV-i yazır ki, Ermənistanın favorit namizədi qondarma “DQR”in “xarici işlər naziri” Masis Mailyandır.
Nikol Paşinyanın Dağlıq Qarabağın uydurma sabiq “baş naziri” Araik Arutunyana rəğbətinin olmamsı səbəbindən Masis Mailyanın üzərində dayandığı bildirilir. Bütün bunlar onu deməyə əsas verir ki, separatçılara yeni başçının seçilməsi Paşinyanla “Qarabağ klanı” arasındakı döyüşün növbəti raundu olacaq. Bu döyüşün sonu nə ilə bitə bilər?
“Həmin vaxt Ermənistanda böyük gərginliyin yaşanacağına şahidlik edəcəyik”
Politoloq Yeganə Hacıyeva qəzetimizə açıqlamasında bildirdi ki, bu mübarizə o qədər də asan olmayacaq: “Bilirsiniz ki, B.Saakyan açıq şəkildə Paşinyana müxalif olduğunu bəyan edir. Biz bunu Köçəryanın azadlığa buraxılmasında gördük. Köçəryanı həm də Putin birmənalı dəstəkləyir. Deməli, Saakyan həm də Rusiyaya Paşinyandan daha yaxın sayıla bilər. Bu yalnız onun şəxsiyyətilə bağlı olan məsələ deyil. Qondarma qurum birbaşa Moskvanın nəzarətindədir. Çünki orada status-kvonun dəyişməsi Rusiyanın strateji maraqlarına aid olan məsələdir. Yəni ora təyin ediləcək adam həm də Rusiyanın maraqlarına cavab verməlidir. Paşinyanın üzərində dayandığı M.Mailyan həm də başqa tellərlə ona bağlıdır. Ermənistanın əvvəlki vətəndaş cəmiyyəti sektoru Qarabağdakı seçkilərdə öz namizədinin olmasını çoxdan planlaşdırırdı. Mailyanın, əslində, Paşinyanın “məxməri inqilab”ını maliyyələşdirən milyarder Corc Sorosa bağlı olduğu bildirilir. Bunu erməni cəmiyyəti açıq etiraf edir. M.Mailyan isə hər şeyə rəğmən, Ermənistan hakimiyyətinin bir hissəsinin favoritinə çevrilib. Çünki o və hakim komandanın bir çox deputatları və kabinet üzvləri də “Sorosun uşaqları” kimi tanınır. Bu nəticəyə gəlirik ki, Mailyanla Saakyan arasında gedəcək mübarizə yalnız iki klanı üz-üzə qoymayacaq. Bu həm də Qərblə Rusiyanın savaşı sayılacaq. Yəqin ki, biz həmin vaxt Ermənistanda böyük gərginliyin yaşanacağına şahidlik edəcəyik”.
Məhəmmədəli QƏRİBLİ
