19/10/2019 22:29
728 x 90

Avropa Birliyi Türkiyəni maliyyə dəstəyinin kəsilməsi ilə hədələdi, Ərdoğan isə “3,6 milyon qaçqını üstünüzə göndərərik” dedi...

img

Xəbər verldiyi kimi, Türkiyə Suriyanın şimal-şərqində hərbi əməliyyatlara başlayıb. Baki-xeber.com xəbər verir ki, “Barış Pınarı” (Sülh Bulağı) adı verilən əməliyyatın əsas məqsədi sərhədlərində terror təhdidini aradan qaldırmaq və suriyalı qaçqınların öz ölkələrinə dönməsini təmin etmək üçün təhlükəsiz bölgə yaratmaqdır.

Türkiyə Prezidenti Rəcəb Tayyib Ərdoğan bəyan edib ki, Suriyada əməliyyat zamanı indiyə qədər 109 terrorçu zərərsizləşdirilib. Suriyada yerüstü əməliyyata başlayan Türkiyə ordusu bir çox yaşayış məntəqəsini də terrorçulardan azad edib. Hazırda türk hərbçiləri bir neçə istiqamətdən Fəratın şərqinə doğru irəliləyirlər.

Türkiyənin öz təhlükəsizliyini təmin etmək üçün başlatdığı əməliyyat xüsusilə Qərb ölkələri tərəfindən birmənalı qarşılanmayıb. Əməliyyatın İŞİD-in yenidən ortaya çıxmasına səbəb olacağını iddia edən Qərb ölkələri hətta Türkiyəni Suriyanı işğal etməkdə də ittiham edirlər.

ABŞ respublikaçı senator Lindsi Qrem Türkiyəni yenə təhdid edib. "Əgər xəbərlər doğrudursa və Türkiyə Suriyaya girdisə, cəhənnəmə gedən yolun daşları döşənməkdədir. Kürd müttəfiqlərimiz üçün dua edin, onlar Tramp hökuməti tərəfindən tərk edildilər. Bu addım İŞİD-in yenidən ortaya çıxacağına təminatdır. Ərdoğana ağır cəza verilməsi üçün Konqresə rəhbərlik edəcəyəm. Prezidenti hələ vaxt varkən yolu dəyişdirməyə və fəaliyyət göstərən təhlükəsiz zona sisteminə qayıtmağa çağırıram" - Qrem “Twitter”də yazıb.

Avropa Birliyindən gələn “təhlükəsizlik zonası üçün AB-dən heç bir şəkildə maliyyə dəstəyi gözləməyin” bəyanatı isə Ankara tərəfindən sərt reaksiya ilə qarşılanıb.

Avropa Komissiyasının sədri Jan Kaud Yunker Ankaranı əməliyyatı dayandırmağa çağırıb. "Türkiyənin Suriya sərhədində başa düşdüyümüz təhlükəsizlik qayğıları var. Ancaq Türkiyə və digər aktorları sakitliyə çağırırıq. Əməliyyat çərçivəsində təhlükəsizlik zonası yaradılması da nəzərdə tutulursa, AB-dən heç bir şəkildə maliyyə dəstəyi gözləməyin" – Yunker deyib.

Ərdoğan isə əgər onun ölkəsinə Suriyaya işğal damğası vurularsa, Ankaranın 3.6 milyon suriyalı qaçqını Avropaya göndərəcəyi ilə hədələyib. “Ölkəmizdə 3,6 milyon qaçqın var. Ey Avropa, özünüzə gəlin. Əməliyyatımızı bir işğal kimi xarakterizə etməyə çalışsanız, bizim işimiz asandır. Qapıları açarıq və 3.6 milyon qaçqını sizə tərəf göndərərik. Pul söhbəti edirlər. 3 milyard avroluq ikinci hissəni göndərməyəcəklərini deyirlər. İndiyə qədər verdiyiniz vədi yerinə yetirdinizmi? Biz 40 milyard dollar xərclədik. Yenə də o qədər xərcləyərik, ancaq qapıları da açarıq...” – Ərdoğan deyib.

Ərdoğan, eyni zamanda, NATO üzvü olan ölkələrə də səslənib: "Bütün NATO ölkələrinə səslənirəm. Başda Amerika... Biz Türkiyəyik. Biz NATO üzvü olan ölkəyik. 5-ci maddəni çox yaxşı bilirlər. Terror təşkilatları NATO üzvü olan Türkiyəyə hücum edərkən buna səssiz qala bilməzsiniz. NATO ölkələri arasında NATO-ya dair öhdəliklərini yerinə gətirən yeganə ölkə Türkiyədir”.

Son xəbərlər