Ermənistan Türkiyənin Suriyada hərbi əməliyyat keçirməsini pisləyib. Ermənistan Xarici İşlər Nazirliyinin yaydığı məlumatda bildirilir: “Ermənistan Türkiyənin Suriyanın şimal-şərqinə hərbi müdaxiləsini qınayır. Bu, regional təhlükəsizliyin pisləşməsinə, mülki əhali arasında itkilərə, məcburi köçlərə və nəticədə yeni humanitar fəlakətə səbəb olacaq. Xüsusilə milli və dini azlıqlar üçün narahatverici situasiya yaranır”.
Baş nazir Nikol Paşinyan da Suriyadakı situasiyadan “narahat” olduğunu deyib: “Ermənistan Türkiyənin Suriyaya hərbi müdaxilə aktını qınayır. Bizim dəyərləndirməmizə əsasən, bu fəaliyyət Suriyada humanitar böhranı daha da dərinləşdirəcək. Beynəlxalq ictimaiyyəti bu qanunsuz fəaliyyəti dayandırması üçün tədbir görməyə, milli və dini azlıqların hüquqlarını müdafiəyə çağırırıq. Ermənistan Hələbə humanitar missiyanı uğurla icra edir və bu missiyanı davam etdirəcək. Hökumətin iclasından sonra icraedici hakimiyyətin nümayəndələri qapalı rejimdə Suriyadakı vəziyyəti və İrəvanın gələcək mövqeyini müzakirə edəcəklər”.
Ermənistanın öz sərhədlərindən çox-çox uzaqda olan bir hadisədən bu dərəcədə narahat olması nə ilə bağlıdır?
Zamin Axundov: “Ermənistan anlayır ki, ona qarşı da antiterror əməliyyatına başlamaq üçün kifayət qədər hüquqi əsas var”
Politoloq Zamin Axundov “Bakı-Xəbər”ə bildirdi ki, Ermənistanın belə mühüm geopolitik məsələlərə müdaxilə etməsi, fikir bildirməsi doğrudan da maraqlı görünür: “Aydındır ki, həmin ölkənin nə yerləşdiyi coğrafi mövqeyi, nə ərazisi, nə iqtisadi gücü bu cür qlobal məsələlərə qarışmağa imkan vermir. Ancaq Ermənistanın narahatlığı əsassız da deyil. Çünki bilir ki, bizim ən yaxın tərəfdaşımız Türkiyədir. Ankaranın geostrateji anlamda güclənməsi həm də bizim mövqelərimizin güclənməsi anlamına gəlir. Ermənistanın PKK ilə ciddi əlaqələri var. Türkiyə bilir ki, onu Cənubi Qafqazdan da təhdid edə biləcək PKK mövcuddur. Ermənistan Rusiyanın bu ərazidəki forpostudur. Amma onun bu bəyanatı müstəqil niyyətdən irəli gəlir. Çünki Suriyaya müdaxilədə Rusiya Türkiyəyə qarşı çıxmadı. Ermənistan bilir ki, Türkiyənin maraqları Suriyada güclənsə, avtomatik olaraq, bu onun Balkanlar və Cənubi Qafqazda güclənməsinə də səbəb olacaq. Ermənistan anlayır ki, ona qarşı da antiterror əməliyyatına başlamaq üçün kifayət qədər hüquqi əsas var. Beynəlxalq hüquq da bunu qəbul edir. Çünki həmin ölkə, faktiki olaraq, Azərbaycanın ərazisini işğal edib. Onlar hesablayırlar ki, Türkiyənin prosesdən qalib çıxması onu dünyada daha vacib aktora çevirmiş olacaq ki, bunun Azərbaycan üçün əhəmiyyəti var. Ermənistanın narahatlığının kökündə duran amil məhz budur”.
Məhəmmədəli QƏRİBLİ
