19/10/2019 22:26
728 x 90

Piket meydanında asayiş mühafizəsinə ilk dəfə Azərbaycanın qadın polisləri də cəlb olundu

Şəmsəddin Əliyev: “Xanım polislər son ana qədər öz təmkinlərini qorudular, səbr göstərdilər və asayişin təmin olunmasına töhfələrini verdilər”

img

Məlum olduğu kimi, “Milli Şura” adlandırılan qurum oktyabrın 8-də şəhərin mərkəzində icazəli piket keçirdi. “Milli Şura”ya BŞİH-nin yaxınlığında 50 nəfərdən ibarət heyətlə, qanunda nəzərdə tutulmuş qaydada piket keçirməyə etiraz edilməsə də, piketçilər öz xislətlərindən əl çəkməyərək yenə də təhqirlərindən, qanunları pozmaqdan qalmadılar. Piketdə iştirak edənlər burada təxribatçı çağırışlar, fikirlər bildirməkdən çəkinmədilər. Hətta burada piketçilər tərəfindən polislə qarşıdurmaya cəhdlər də edildi.

Bilirik ki, Əli Kərimli və onun ətrafında olan radikal qüvvələr dəfələrlə müxtəlif tədbirlərdə, piketlərdə polislə qarşıdurmalar yaratmağa cəhdlər ediblər, polisi təxribata çəkmək istəyiblər. Lakin, həmişə olduğu kimi, onların polislə qarşıdurma yaratmaq cəhdləri alınmayıb, polis öz vəzifəsini Azərbaycan qanunlarına uyğun şəkildə həyata keçirib, sona qədər səbr nümayiş etdirərək sabitliyin, asayişin qorunmasına nail olub.

“Milli Şura”nın sonuncu piketində müşahidə edilən məqamlardan biri piket zamanı asayişin qorunmasına qadın polislərin də cəlb edilməsi idi ki, qadın polislər piketdə iştirak edən həmcinsləri ilə, sözün həqiqi mənasında, səbrlə, nəzakətlə davrandılar. Baxmayaraq ki, piketçi qadınlar öz çağırış və qanunazidd davranışları ilə qadın polisləri təxribata çəkmək istəyirdilər, amma, qeyd edildiyi kimi, buna nail ola bilmədilər.

  • “Qadın polislərin təhlükəsizliyin təmin olunmasına cəlb edilməsi bu sahədə həyata keçirilən demokratik islahatların bariz nümunəsidir”

Məsələni şərh edən “Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə bildirdi ki, qadın polislərin piket zamanı asayişin təmin edilməsinə, sabitliyin qorunmasına cəlb edilməsi çox müsbət haldır. Onun sözlərinə görə, çox zaman piketlərdə radikal müxalifətdən olan qadın iştirakçılar kişi polislərdən haqsız narazılıqlar edirdilər ki, kişi polislər onların qollarından tutur, onlara toxunur və s.

Qadın polislərin də kişi polislərlə birgə piket zamanı sabitliyi, asayişi tam olaraq qoruduğunu deyən Ş.Əliyev hesab edir ki, qadın polislər piketçilərlə səbrlə, təmkinlə, humanistcəsinə davrandılar. “Məlumatınız olsun ki, xanımlar da Daxili İşlər Nazirliyinin Polis Akademiyasının müdavimi kimi hüquq-mühafizə orqanlarında xidmət göstərirlər. Qadın polislərin təhlükəsizliyin təmin olunmasına cəlb edilməsi bu sahədə həyata keçirilən demokratik islahatların bariz nümunəsidir. Bu cür piketlərdə, sərbəst toplaşma azadlığından sui-istifadə edən qüvvələrin keçirdiyi toplantılarda kişi polislərin qadın piketçilərə qarşı münasibəti radikal qüvvələr tərəfindən düzgün qiymətləndirilmirdi, hətta asayişi təmin edən polislərin davranışları şişirdilir, düzgün olmayan şəkildə təqdim edilirdi. Guya ki, kişi polislər onlarla düzgün rəftar etmirdilər. Təbii, bu iradlar tamamilə haqsız iradlar idi və həqiqəti əks etdirmirdi. Polislər sabitliyi, asayişi qoruyur, hər hansı bir qarşıdurmanın baş verməməsi üçün öz vəzifələrini yerinə yetirirlər. Ancaq son zamanlar artıq qadın polislər piketlərdə asasyin qorunmasında iştirak edirlər. Bu təcrübə Avropa ölkələrində də var. Polis qadınların piketdəki fəaliyyəti yüksək dəyərləndirilməlidir. Onların piketdə iştirak edən qadınlarla rəftarlarında heç bir kobudluq halları baş vermədi, qadın polislər onlarla nəzakətlə, səbrlə, humanistcəsinə  davrandılar. Polis qadınların piket zamanı asayişin təmin edilməsində nümayiş etdirdikləri davranış çox nümunəvi oldu. Sərbəst toplaşmaq azadlığından sui-istifadə edərək piket keçirənlər arasında olan zərif cinsin nümayəndələri nə qədər qadın polisləri təxribata çəkmək istəsələr də, buna nail ola bilmədilər. Xanım polislər son ana qədər öz təmkinlərini qorudular, səbr göstərdilər və asayişin təmin olunmasına töhfələrini verdilər”.

Ş.Əliyev hesab edir ki, sərbəst toplaşma azadlığından sui-istifadə edən şəxslərin dövlətə, hökumətə, hətta polislərin özlərinə qarşı işlətdikləri nalayiq sözlərə belə polislər təmkinlə yanaşdılar və sonacan öz vəzifələrini layiqincə yerinə yetirdilər.

İradə SARIYEVA

Son xəbərlər