Müsavat Partiyasının sabiq başqanı İsa Qəmbər partiyanın oktyabrın 12-də keçirilməsi planlaşdırılan qurultayında başqan seçkisinə dair mövqeyini açıqlayıb.
Sabiq başqan “Facebook” səhifəsindən paylaşdığı “Onun uğurları Müsavatımızın, Müsavatın uğurları Azərbaycanımızın uğurları olacaq!” adlı yazıda bildirir: “2014-cü ilin sentyabrında – Müsavat Partiyasının 8-ci qurultayında başqanlığa namizədlərlə bağlı mən öz mövqeyimi açıqlamadım. Bunun iki əsas səbəbi var idi. Birincisi, mənə elə gəlirdi ki, fikrimi açıqlasam, dəstəklədiyim aday asanlıqla qalib gələ bilər. Və nəticədə bir tərəfdən gerçək seçki yarışı baş tutmaz, digər tərəfdən, faktiki olaraq, mən varis müəyyənləşdirmiş olaram. Mən isə demokratik seçki yarışının Müsavata və cəmiyyətə faydalı olacağına inanırdım və varis müəyyənləşdirmək istəmirdim. İstəyirdim ki, məndən sonrakı başqanı və nəticədə partiyamızın növbəti mərhələdə siyasi kursunu müsavatçılar mənim təsirim olmadan müəyyənləşdirsinlər.
İkincisi, namizədlərdən bəziləri mənim öz mövqeyimi bildirməməyimi xahiş və təkid edirdilər. İndi isə – 9-cu qurultay ərəfəsində partiyamızda azad demokratik seçki ənənəsi o dərəcədə oturuşub ki, namizədlərdən heç biri mənə mövqeyimi nə bildirmək, nə də bildirməmək xahişi ilə müraciət etməyə ehtiyac duymur və bu məni sevindirir. Odur ki, indi mən də mövqeyimi açıqlaya bilərəm.
Qurultayda səs verəcəyim, başqan kimi görmək istədiyim namizəd Arif Hacılıdır. Bu mövqeyimin səbəbləri çoxdur”.
İ.Qəmbər mövqeyini əsaslandırmaq üçün bir neçə səbəb göstərir və Arif Hacılını “böyük dövlət adamı” adlandırır və qurultay üzvlərinə “Arif bəyə səs verin!” deyə çağırış edir.
Qeyd edək ki, hazırda Müsavat başqanlığına üç nəfərin namizədliyi qeydə alınıb. Bunlar Arif Hacılının rəqibləri Tofiq Yaqublu və Yadigar Sadıqlıdır. İsa Qəmbərin belə açıq mövqe tutmasına onların hansı reaksiyanı verməsi maraq doğurur.
Yadigar Sadıqlı: “İsa Qəmbərin də prosesə qoşulması və konkret mövqe ifadə etməsi həmin təşvişdən qaynaqlanır”
Başqanlığa namizəd Yadigar Sadıqlı “Bakı-Xəbər”ə açıqlamasında bildirdi ki, İsa Qəmbərin belə mövqe tutacağını gözləyirmiş: “Hüquqi cəhətdən burada heç bir qəbahət görmürəm. Bu, artıq mənəvi olan bir məsələdir. Buna İsa Qəmbərin özü cavab versə yaxşı olar. Hesab edirəm ki, bu addım qüvvələr nisbətinə ciddi təsir edəcək. Buna baxmayaraq, mən israrlıyam. Sona qədər namizədliyimin üstündə duracam.Vəziyyət əvvəlki kimi dəyişməz qalarsa, Müsavatı qarşıda ciddi fəlakətlər gözləyir. Bundan əvvəlki qurultayda İsa Qəmbər konkret mövqe ortaya qoymadı. Bu dəfə isə bunu etdi. Hesab edirəm ki, buna onu vadar edən səbəblər olub. Çünki Arif Hacılının başqan seçilə bilməyəcəyi kimi təhlükəni hiss ediblər. İsa Qəmbərin də prosesə qoşulması və konkret mövqe ifadə etməsi həmin təşvişdən qaynaqlanır. Düzdür, İsa Qəmbər deyir ki, heç bu prosesə qoşulmasayadı belə Arif Hacılı udacaqdı. Belədirsə, nə etmək istəyirlər? Hakimiyyəti hər zaman 80-90 faiz səs toplamaqda ittiham edirlər. İndi həmin göstəricini təkrarlamağı düşünürlər? Bu beş il ərzində partiyanın işində heç bir irəliləyiş olmayıb. Hətta deyərdim ki, partiya tənəzzül həddinə çatıb. İsa Qəmbərin bu vəziyyətdən niyə məmnun qalması mənim özümə də maraqlıdır”.
Tofiq Yaqublu: “Biz İsa Qəmbərə deyə bilmərik ki, niyə Arif bəyi dəstəkləyirsən?”
Başqanlığa digər namizəd Tofiq Yaqublu “Bakı-Xəbər”ə açıqlamasında bildirdi ki, İsa Qəmbərin etdiyi hərəkətdə heç bir qəbahət görmür: “İsa Qəmbər partiyanın üzvü və eyni zamanda, qurultay nümayəndəsidir. Bu statusda olan adamın istənilən namizədi açıq şəkildə dəstəkləmək kimi bir hüququ var. Bu, tamamilə açıq və demokratik bir prosesdir. Dəyərləndirmələr subyektiv amillərə bağlıdır. Biz İsa Qəmbərə deyə bilmərik ki, niyə Arif bəyi dəstəkləyirsən? Görünür, onun fəaliyyəti İsa Qəmbəri daha çox qane edir. Eləcə də digər namizədləri dəstəkləyə bilən şəxslərlə bağlı biz nəsə deyə bilmərik. Qəbul edirəm ki, İsa Qəmbərin mövqeyinin nəticəyə təsiri olacaq, ancaq biz demokratiyadan danışırıqsa, heç bir halda onun da hüquqlarını məhdudlaşdıra bilmərik”.
Məhəmmədəli QƏRİBLİ
