Son vaxtlar müxtəlif nüfuzlu şəxslərin çıxışında biz radikal müxalifətin ünvanına səslənən ittihamların, iradların şahidi oluruq. Bunun da əsaslandırılması müxtəlif faktorlarla izah olunur. Məsələn, müxaliflərin vahid bir blokda konsolidasiya oluna bilməmələri, şəxsi maraqlarını xalq, dövlət maraqlarından üstün tutmaları, ölkənin xarici siyasəti ilə bağlı bəzən antimilli mövqedən çıxış etmələri, uzun müddət hakimiyyətə gələ bilməsələr də, siyasi arenanı tərk etməmələri və bunun müqabilində partiyanın daxilində avtoritarizm yaratmaları və s.
Radikal müxalif dairələr Azərbaycan hakimiyyətinin bir uğurunu da təqdir etmirlər. Xaricdə keçirilən qeyri-siyasi tədbirlərdə belə, bir soydaş kimi ölkəmizə dəstək verməkdən boyun qaçırırlar. Yalnız Azərbaycan dövlətinin ziyanına olan tədbirlərdə aktivlik nümayiş etdirirlər. Bütün bunlar onu deməyə əsas verirmi ki, belə müxalifət bizə xaricdə də başucalığı gətirmir?
- Elşən Həsənov : “Telman müəllimə orada müxaliflər dedilər ki, biz kommunistlərə nifrət edirik, ona görə sizinlə əməkdaşlıq edə bilmərik”
Hazırda mərkəzçi mövqedən çıxış edən Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bu məsələdə şəxsi təcrübəsindən qaynaqlanaraq bəzi faktları nəzərimizə çatdıracaq: “Hesab edirəm ki, onların siyasi gedişləri öz baqajlarına uyğundur. Bundan artığını heç gözləməyə dəyməz. Kənardan başqa cür görünür, ancaq yaxından təmasda olanda görürsən ki, adam özünü normal idarə edə bilmirsə, xalqa nə gün ağlayacaq? “AXH” adlı qurumun yaradılması ilə bağlı edilən çağırışlara qoşulub mən də onlarla yaxından təmas qurmalı oldum. Çox böyük biabırçılıqların şahidi oldum. Açığını sizə deyim, onların səviyyəsi daha dərinə getməyə imkan vermir. Onlar ölkənin təmsilçilyi ilə bağlı nəsə düşünmürlər. Məsələn, sizə iki misal çəkəcəm, özünüz nəticə hasil edin. Mən hesab edirəm ki, Azərbaycanda xaricdən qızışdırılan radikal islamı neytrallaşdırmaq üçün bizdə olan İslam Demokrat Partiyasının inkişafına ehtiyac var. Onlar isə “AXH”də var gücləri ilə həmin partiyanın sədri Tahir Abbaslını sıxışdırmağa başladılar. Yalnız dindar olduğuna görə. Onları dərin məsələlər qəti maraqlandırmır. Başqa bir misal. Mən Kommunist Partiyasının Telman Nurullayevin rəhbərlik etdiyi qanadını bir bloka dəvət etdim. Həmin partiyanın Rusiya və beynəlxalq kommunist təşkilatları ilə çox yaxşı münasibətləri var. Telman müəllimə orada müxaliflər dedilər ki, biz kommunistlərə nifrət edirik, ona görə sizinlə əməkdaşlıq edə bilmərik. Halbuki, onun əli ilə Azərbaycanın bütün həqiqətlərini beynəlxalq arenalara çıxarmaq olardı. Bunların düşüncəsi budur. Təbii ki, bu cür düşüncə və əqidəyə sahib olan şəxslər və partiyalar bizi həm daxildə, həm də xaricdə biabır edirlər. Bunun başqa adı ola bilməz”.
Məhəmmədəli QƏRİBLİ
