Rəfael Cəbrayılov Milli Məclisin deputat mandatından imtina etməsi ilə bağlı açıqlama verib. O deyib ki, borc məsələsi müzakirəyə çıxarıldığına görə deputat kimi fəaliyyət göstərmək istəməyib: “Məsələ qardaşım Elşən Cəbrayılova məxsus tikinti şirkəti ilə bağlı idi. Devalvasiyadan sonra vətəndaş Təranə Fətəliyeva ilə qardaşım arasında narazılıq yarandı.
Ümumiyyətlə, mənə dedilər ki, bəlkə, istefa verməyə tələsməyəsən, amma mən belə daha düzgün hesab etdim. Bu, Azərbaycanda nadir hadisələrdəndir. Yeni Azərbaycan Partiyasının üzvü deyiləm, ona görə bunu dramatikləşdirməyə ehtiyac yoxdur, janqlyorluq etməsinlər”.
O, borc məsələsinin tez bir zamanda həll ediləcəyini qeyd edib.
R.Cəbrayılov Heydər Əliyev siyasi kursuna sadiq qaldığını vurğulayıb: “Hazırda İlham Əliyevin siyasi kursuna sədaqətlə xidmət edirəm. Bundan sonra da belə olacaq. Mən tez-tez əqidəsini dəyişən adam deyiləm. Kommunist Partiyasının biletini hələ də saxlayıram. Cəlil Məmmədquluzadə demiş, bəlkə də qaytardılar”.
Sabiq deputat ölkəni tərk etməyəcəyini deyib. Könüllü istefa verən deputatın açıqlamasında Kommunist Partiyasının biletini hələ də saxladığını deməsi və sonra bunu “bəlkə də qaytardılar” kimi əsaslandırması cəmiyyət tərəfindən birmənalı qarşılanmayıb. Sosial şəbəkələrdə bu fikir geniş rezonans doğurub. Sabiq deputatın Kommunist Partiyasının biletini saxlamasını fəxrlə danışması nəyə dəlalət edə bilər?
“...sanki sabiq deputat SSRİ-nin bərpasını səbrsizliklə gözləyirmiş”
Milli Qeyri-Hökumət Forumunun prezidenti Rauf Zeyni “Bakı-Xəbər”ə bildirdi ki, həmin fikrə qarşı münasibəti çox mənfidir: “Bəli, biz gördük ki, adı borc qalmaqalında hallanan R.Cəbrayılov könüllü olaraq öz mandatından imtina etdi. Mən onun bu addımını müsbət hal kimi qəbul edirəm. Çünki insan səhvini anlayıb ki, belə addım atıb. Onun mətbuat konfransında istefasının səbəblərini izah edərkən daha bir qalmaqallı açıqlama verməsi heç lazım deyildi. Deyib ki, Kommunist Partiyasının vəsiqəsini hələ də saxlayır. Həmin bileti tək Cəbrayılov saxlamır. Yəqin ki, Azərbaycanda çoxlu sayda adam onun kimi edir. Ancaq burada məqsədlər fərqlidir. Bəziləri rusların yenidən gəlib buranı işğal etməsini gözləyir. Bəziləri isə tarixi sənəd kimi saxlayır. Bütün hallarda təəssüf edirəm. Biz hamımız müstəqil Azərbaycanın vətəndaşlarıyıq. Öz üçrəngli bayrağımızın altında sıx birləşməliyik. Ölkəmizin inkişafı üçün çalışmalıyıq. Hər hansı məqamda Azərbaycanın müstəqilliyinə, onun istiqlaliyyətinə qarşı düşüncə ortaya çıxacaqsa, biz onun qarşısında olacağıq. Bu gün Azərbaycan dövlətçiliyinin müdafiə olunmasına daha böyük ehtiyac var. Xüsusilə də Azərbaycanda neçə il deputat olmuş şəxsin belə fikirləri varsa, mən buna dərindən təəssüf edirəm. Çünki belə təəssürat yaranır ki, sanki sabiq deputat SSRİ-nin bərpasını səbrsizliklə gözləyirmiş. Əlavə şərhə ehtiyac qalmır”.
Məhəmmədəli QƏRİBLİ
