Polisin və SOCAR işçilərinin qanuni fəaliyyətlərinə mane olmaq, onların imicini ləkələmək cəhdlərinin kampaniya formasında həyata keçirilməsinə zaman-zaman rast gəlinir və burada müəyyən siyasi dairələrin birbaşa iştiraklarının, maraqlarının olduğu şübhəsizdir. Bu günlərdə yayılan və xüsusi canfəşanlıqla paylaşılan bir videoçəkilişin diqqətlə izlənilməsi və təhlili bunu bir daha ortaya çıxardı. Baxın, bütün ölkədə asayiş və qanunçuluğun sarsılmaz dayağı olan polislər, guya əlilləri döyən, incidən, haqlarını ayaqlayan zorakı bir dəstə kimi sadə insanların vizual yaddaşına həkk edilir. Polisi əlillərin və binəsib insanların qəddar düşməni kimi göstərənlərin əsl hədəfinin nə olduğunu başa düşürsünüzmü? Hədəf ölkədəki əminamanlıq və insan həmrəyliyi mühitidir.
Bu sözləri politoloq Aydın Quliyev son günlər məqsədli şəkildə yayılan məlum video ilə bağlı özünün facebook səhifəsində yazıb. A.Quliyev daha sonra qeyd edir:
-Azərbaycanın bütün dünya boyu tanınma brendinə çevrilmiş və ölkənin iqtisadi inkişafının əsas maliyyə bazası rolunu oynayan SOCAR-ı cəmiyyətimizin qayğıya ehtiyacı olan təbəqələrini sıxışdıran qüvvə kimi göstərənlər əslində bilirsinizmi haranı və nəyi vururlar? O SOCAR-ı ki, ölkəyə milyonlarla valyuta axınını təşkil və idarə edən böyük prosesin başında durur. O SOCAR ki, məhz onun qazandırdığı gəlirlər hesabına ölkə inkişaf etdirilir, müdafiə gücümüz artırılır, Qarabağ əlillərinin,şəhid ailələri və vetranların pensiya və təqaüdləri MDB-də müqayisə ilə sanballı şəkildə fərqlənən həddə qədər artırılır, yollar çəkilir, məktəb və xəstəxanalar tikilir, iş yerləri açılır və sair...Görünür ki, vəziyyətin belə dəyişmələrindən məmnun qalmayanlar hələ də var və gedən prosesləri dayandırmaq gücündə olmasalar da, heç olmasa qaralamaq istəyindən əl çəkmirlər. Bunun üçün hər vasitəyə əl atırlar, hətta Qarabağ əlilləri,şəhid ailələri və müharibə veteranları kimi həssas insanları öz qisasçı siyasi məqsədlərinə və çirkin maddi maraqlarının ödənməsinə alət kimi cəlb etməyə də baş vururlar. Elə bir görüntü yaratmaq istəyirlər ki,sanki bu həssas insanların real himayədarı dövlət başçısı və onun tabeliyindəki müəyyən qanuni səlahiyyətli rəsmi orqanlar yox, ortaya demoqogiyadan başqa heç nə qoya bilməyən, bu insanlara boğazdan yuxarı deyilən mənasız sözlərdən başqa nəsə verə bilməyən həmin kəmfürsət dairələr imiş... Normal iş üslubu budur ki, əgər hardasa həssas insanlarla bağlı problem, ya narahatlıq varsa, bunu süni qarşıdurma səhnələrinə çevirmədən müvafiq dövlət orqanlarının səviyyəsində real həlli yolları tapılsın. Azərbaycanda hələ müəyyən problemlər qalsa da, ölkə qanunçuluğun tam bərqərar edidiyi bir cəmiyyətə doğru gedir. Burada ərköyünlüyə, hamıdan fərqli və üstün imtiyazlar ələ keçirmək iddialarına, qanunları pozmağa heç bir halda yaşıl işıq olmamalıdlr. Kimlərinsə qanunsuz olaraq torpaq sahələri, əmlak, maşın və texnikaları zəbt etdiyi dövrlərin ab-havası bəzi başlarda hələ yaşasa da, ümumən bu dövr prinsipcə keçmışdə qaldı və hər ötən müddətdə bizdən daha da arxada qalaraq uzaqlaşır. İndi hamıdan maksimum məsuliyyətli olmağın tələb edildiyi dövrdür. Məsuliyyət tək qanun keşikçiləri üçün yox, iqtisadi sistemin inkişaflnı təmin edərək ölkəyə valyuta gətirən sektorlar üçün yox, dövlətin iqtisadi-maliyyə gücünə uyğun olaraq əmək haqqı və pensiyaların fasiləsiz şəkildə artırılmasını icra edən sosial təminat orqanları yox, hər birimiz üçündür - müəllim, həkim, Qarabağ əlili, müharibə veteranı, jurnalist, tələbə, təqaüdçülər və s.üçündür. Hər kəs kəmfürsətlərin əlinə oynamaqdan uzaq olmağa çalışmalıdır. Bilərəkdən, bilməyərəkdən, vicdanlı yanılma ilə araqarışdıranların oyunlarında alətə çevrilmək bağılşlanmaz nəticələrə gətirib çıxara bilər və faydasızdır. Siyasi demoqogiya ilə məşqul olan heç bir qüvvə və ya şəxs əhalinin həssas təbəqələri üçün ən kiçik bir dövlət orqanının ölkə Prezidenti adından etdiyinin və edə biləcəyinin heç yüzdə birini də edə bilməz...
