Günü-gündən güclənən Azərbaycan ordusu dünyada Qafqazın ən qüdrətli ordusu olaraq qəbul edilir. Bu gün ordumuz həm texniki, həm peşəkar kadrlar baxımından çox inkişaf edib. Ordunun inkişafını sürətləndirən amillərdən birinin elm olduğu şübhəsizdir. Azərbaycanda zaman-zaman elmin orduya müsbət təsiri olub. Azərbaycan alimləri, mühəndisləri hərbi, müdafiə və mülki xarakterli layihələri ilə ordunun işinə dəstək olublar.
Azərbaycanda alimlərin hərbi layihələrinin orduda tətbiq ediləcəyinə dair yeni məlumatlar yayılıb. Məlum olduğu kimi, Azərbaycan Milli Elmlər Akademiyasının (AMEA) Rəyasət Heyəti aparatının Strateji Elmi Tədqiqatlar Mərkəzinin (SETM) hərbi, müdafiə və mülki xarakterli elmi-tədqiqat işləri çərçivəsində hazırlanmış növbəti layihəsinin artıq təqdimatı da keçirilib. AMEA-dan verilən məlumata görə, SETM müharibə şəraitində olan Azərbaycan üçün böyük əhəmiyyətə malik elmi-tədqiqat işlərinin hazırlanması, yeni və mövcud layihələrin davam etdirilməsi, eləcə də yekun nümunənin sınaqdan keçirilməsini davam etdirir. Qeyd edilənə görə, Azərbaycanın hərbi qüdrətinin artırılması istiqamətində ölkə rəhbərliyi tərəfindən aparılan siyasətin, eyni zamanda çoxsaylı tədbirlərin davamı olaraq Akademiya tərəfindən həyata keçirilən hərbi və müdafiə xarakterli elmi-tədqiqat işləri üzrə layihələrin genişləndirilməsi və inkişaf etdirilməsi olduqca aktualdır. Bildirilənə görə, SETM-in əsas məqsədi və fəaliyyət istiqamətlərinin müəyyənləşdirilməsi zamanı AMEA-nın aidiyyəti elmi müəssisə və təşkilatlarının, xüsusilə Fizika-Riyaziyyat və Texnika Elmləri Bölməsinin mütəxəssislərinin layihələrə cəlb edilməsi, bu sahədə elmi tədqiqat, texnoloji, layihə-konstruktor, texniki istehsal hazırlığı, sınaq laboratoriyalarını özündə birləşdirən sistemin yaradılması olduqca əhəmiyyətlidir.
AMEA-dan verilən məlumatda qeyd edilir ki, Azərbaycan Respublikasının Müdafiə Nazirliyi rəhbərliyinin rəyinə əsasən, SETM-in layihələrinin hazır nümunələrinin Azərbaycan Ordusunda tətbiqi və istifadəsi məqsədəuyğun hesab olunub.
Tərlan Eyvazov: “Alim və mühəndislərimiz yeni ixtiraları, təklif və layihələri ilə həmişə ordunun işinə yaxından köməklik göstəriblər”
Tanınmış hərbi ekspert Tərlan Eyvazov mövzu ilə bağlı “Bakı-Xəbər”ə bildirdi ki, müasir Azərbaycan elminin son nailiyyətlərinin Azərbaycan ordusunda tətbiq edilməsi ordumuzun yeni silahlarla, texniki cihazlarla təmin olunmasına şərait yaradır. O hesab edir ki, alimlərin, mühəndislərin iştirakı ilə elm mərkəzlərinin hazırladığı hərbi, müdafiə və mülki layihələrin orduda tətbiqi böyük effekt verəcək:”Müasir dövrdə elmi nailiyyətlər tətbiq olunmadan heç bir sahə inkişaf edə bilməz. O ki qala, ən strateji və vacib sahələrdən biri olan hərbi sahə. Azərbaycanda dövlət müstəqilliyimizin ilk illərindən başlayaraq istər ixtiraçı alimlər, istərsə də mühəndislər Azərbaycan ordusundan öz köməklərini əsirgəməyiblər. Alim və mühəndislərimiz yeni ixtiraları, təklif və layihələri ilə həmişə ordunun işinə yaxından köməklik göstəriblər. O dövrdə bizim mülki zavodlarda, müəssisələrdə hərbi silahların hazırlanması təcrübəsi olub. Son illər hərbi sənayemizin formalaşdırılmasında Azərbaycan alimləri iştirak edir və bu sahədə özümüzün elmi potensialımızdan istifadə olunur, bu istiqamətdə olan yeni layihələr tətbiq edilir. Azərbaycan alimlərinin hazırladıqları layihələrin orduda tətbiq edilməsi çox müsbətdir və bunun effektiv nəticələri var. Alimlərimizin ixtirası əsasında hazırlanan silahların yüksək keyfiyyətə çatdırılması onların xaricə satılmasını təmin edir və bundan dövlət büdcəsinə gəlir gəlir”.
T.Eyvazov qeyd etdi ki, Milli Elmlər Akademiyası böyük elmi potensiala malik elmi qurun kimi ordunun işində yaxından iştirak edir. Bu qurumun hərbi istiqamətdə hazırladığı layihələrin həm
hərbi sənayemizin, həm də iqtisadiyyatımızın inkişafına müsbət təsir göstərdiyini deyən mütəxəssis hesab edir ki, bu gün Azərbaycan ordusunda ölkə istehsalı olan silahlardan, hərbi texniki avadanlıqlardan istifadə edilməsi müsbət haldır. Onun sözlərinə görə, hər bir dövlət özünün istehsal etdiyi hərbi-texniki avadanlıqlardan öz ordusunda istifadə edir.
İradə SARIYEVA
