Ermənistan Prezidenti Armen Sarkisyan Fransaya işgüzar səfərə yola düşüb. Erməni mətbuatının yazdığına görə, Sarkisyan Parisdəki bir sıra fransız şirkətlərinin rəhbərləri ilə görüşərək onları Ermənistana səfərə gətirmək, yeni əməkdaşlıq imkanları ilə tanış olmaq və investisiya qoyuluşu üçün əməli addımlar atmaq üçün görüşlər keçirəcək.
Görünən odur ki, Ermənistan son illər Fransa şirkətlərinin Azərbaycana artan marağından narahat olmağa başlayıb. Məsələ ondadır ki, Fransa şirkətləri iqtisadi və hərbi sahədə Azərbaycanla əməkdaşlığa xüsusi maraq göstərirlər. Azərbaycan Avropa İttifaqının aparıcı ölkələrindən biri olan Fransa ilə əlaqələrin inkişafına hər zaman xüsusi önəm verib. Nəzərə almaq lazımdır ki, Azərbaycan Fransanın Cənubi Qafqaz regionu üzrə əsas ticarət tərəfdaşıdır. Təsadüfi deyil ki, 2018-ci ildə Fransanın Cənubi Qafqazın 3 ölkəsi ilə ümumi dövriyyəsinin 62,4%-i məhz Azərbaycanın payına düşüb. 2019-ci ilin ilk 5 ayında iki ölkə arasında ticarət dövriyyəsi ötən ilin eyni dövrü ilə müqayisədə 53 faizdən çox artıb. Azərbaycanda sənaye, xidmət, rabitə, ticarət, bank və sığorta, kənd təsərrüfatı sahələrində 45 Fransa kapitallı şirkət fəaliyyət göstərir. Fransa şirkətləri Azərbaycanda həyata keçirilən və dəyəri 6,2 milyard dollar olan layihələrdə podratçı qismində iştirak ediblər. Bu günlərdə Fransa Şirkətlər Hərəkatının (MEDEF) nümayəndə heyətinin Bakıda səfərdə olması böyük marağa səbəb oldu. Nümayəndə heyətinə 12 sahəni əhatə edən 45 şirkətin 70 nəfər əməkdaşı daxil olub. Bu, Fransa sabihkarlarının Azərbaycana marağının necə yüksək olmasının göstəricisi idi. Onu da qeyd edək ki, Fransa iqtisadi gücünə görə Avropa İttifaqının ilk üçlüyünə daxildir. İqtisadi əlaqələrin bu səviyyədə inkişafı isə, istər-istəməz, siyasi, diplomatik münasibətlərə də müsbət mənada təsir edir.
Görünən odur ki, Ermənistan tərəfi Fransanın Azərbaycana belə böyük maraq göstərməsini həzm edə bilmir. Fransa məhkəmələrinin separatçı qurumla bağlı məlum qərarından sonra mövqelərini bu ölkədə itirən Ermənistan indi iqtisadi sahədə reveranslar edir. O baxımdan, Fransa şirkətlərinin Ermənistana dəvət edilməsi ilə bağlı cəhdlər nə dərəcədə effekt verə bilər?
Rəsul Cahangirli: “İndidən aydın görünür ki, Sarkisyanın bu yöndə cəhdləri uğursuz olacaq”
Məsələyə münasibət bildirən ekspert Rəsul Cahangirlinin sözlərinə görə, Armen Sarkisyanın bu yöndə səyləri çətin ki, səmərəli olsun: “Ona görə ki, zatən, Fransada erməni lobbisi güclü olub. İki ölkə arasında yaxın münasibətlər var. Ermənistan iqtisadi baxımdan Fransa şirkətləri üçün cəlbedici olsaydı, bu neçə ili onlar bu ölkəyə ciddi sərmayə qoyardılar. Buna nə mane olurdu ki? Deməli, bununla bağlı Ermənistanda perspektiv olmadığı üçün, Fransa şirkətləri indiyə qədər xüsusi aktivlik göstərməyiblər. Belə olan halda, Armen Sarkisyan bundan sonra nəyisə dəyişə bilməyəcək. İndidən aydın görünür ki, Sarkisyanın bu yöndə cəhdləri uğursuz olacaq. Nəzərə almaq lazımdır ki, Fransa şirkətləri iqtisadi baxımdan Cənubi Qafqazda hansı ölkələrin cəlbedici olduqlarının fərqindədirlər. Bu sırada Azərbaycanla Gürcüstan daha yaxşı mövqedədirlər. Azərbaycanda böyük layihələr həyata keçirilir. Gürcüstanın başlıca üstünlüyü isə açıq dənizə çıxışının olması ilə bağlıdır. Bunların heç biri Ermənistanda yoxdur. Belə olan halda, Fransa şirkətlərinin Ermənistana sərmayə qoyması real görünmür”.
Vidadi ORDAHALLI
