Rusiyanın Qaydar adına İqtisadi Siyasət İnstitutunun tədqiqatına əsasən, Rusiyaya Ermənistandan mühacirlərin sayı artıb. 2019-cu ilin göstəricisi əvvəlki on ilin rəqəmlərindən daha çoxdur.
Qaydar adına İqtisadi Siyasət İnstitutunun tədqiqatında deyilir ki, 2019-cu ilin ilk dörd ayı ərzində Rusiya əhalisinin miqrasiya artımı, ümumilikdə, 98 min nəfər təşkil edib. Müqayisə üçün - ötən ilin analoji dövründə bu göstərici 57,1 min nəfər təşkil edib. Əgər 2018-ci ilin yanvar-aprel aylarında Ermənistandan Rusiyaya 4 900 mühacir gəlibsə, 2019-cu ildə bu göstərici 2,5 dəfədən çox artıb və 12 800 nəfər təşkil edib.
Ermənilərin son aylarda kütləvi şəkildə ölkəni tərk edib Rusiyaya üz tutmasının səbəbi nə ilə bağlıdır?
Aqşin Əliyev: “Son aylarda bu rəqəmin kəskin artması Paşinyan və onun etdiyi inqilab faktoru ilə əlaqəlidir”
Ekspert Aqşin Əliyevin sözlərinə görə, bunun bir çox obyektiv səbəbi var: “Deyilən dövrdən əvvəl də əhali Ermənistanı kütləvi surətdə tərk edirdi. Ötən illərin statistikasını araşdırsanız bunu aydın sezə bilərsiniz. Ancaq son 4 ayda bu göstəricinin kəskin artması düşünməyə əsas verir. Ermənistandan əhalinin kütləvi qaçışının birinci səbəbi iqtisadi amillə bağlıdır. Ölkənin işğalçı siyasəti onu belə acınacaqlı iqtisadi vəziyyətə salıb. İkinci səbəb müharibə faktoru ilə bağlıdır. Ailələr öz ovladlarının onlara lazım olmayan müharibədə həlak olmasını, konkret olaraq Qarabağda xidmət etməsini istəmirlər. Bu səbəbdən də övladlarını kütləvi şəkildə ölkədən qaçıranlar var. Ancaq son aylarda bu rəqəmin kəskin artması Paşinyan və onun etdiyi inqilab faktoru ilə bağlıdır. Ölkədə baş verən “məxməri inqilab”dan sonra xaricdə özlərinə yer tapa bilməyən ermənilər kütləvi şəkildə ölkəyə axın etdi. Onlar elə bilirdilər ki, Paşinyan fərqli Ermənistan quracaq. Amma son il ərzində aldandıqlarını görüb, vəziyyət daha da acınacaqlı hal aldığına görə yenidən mühacirəti məqbul saydılar.
Hələ 2019-cu ilin əvvəllərində həmin vaxt Baş nazir vəzifələrini icra edən Nikol Paşinyan özünün “Facebook” səhifəsində ölkədən gedənlərin sayı barədə yazı yazıb. Yazıb ki, 2018-ci il yanvarın 1-dən dekabrın 25-nə qədər Ermənistanı tərk edənlərlə həmin dövr ərzində Ermənistana gələnlərın sayı arasında fərq plyus 20 713 təşkil edib. Onların daha çox Rusiyaya üz tutması orada ucuz işçi qüvvəsi kimi istifadə olunmaları ilə bağlıdır. Bu amil bir daha Ermənistandakı vəziyyətin nə dərəcədə acınacaqlı olmasının bariz nümunəsidir. Paşinyan hakimiyyəti təəssüf ki, belə mənzərədən nəticə çıxarmaq istəmir. Əksinə, işğal siyasətlərini davam etdirməklə, ölkə əhalisinin vəziyyətini daha da ağırlaşdırırlar. Belə davam etsə, bir neçə ildən sonra Ermənistandakı demoqrafik vəziyyət daha acınacaqlı hal alacaq”.
Məhəmmədəli QƏRİBLİ
