18/10/2019 03:27
728 x 90

Avroittifaq Ermənistana builki yardımı hansı əsaslarla 70 milyona qaldırmaq niyyətindədir...

“Avropa İttifaqı da, digər aparıcı dövlətlər kimi, uzun illər ərzində ikili yanaşmalar nümayiş etdirir”

img

"2019-cu il ərzində yardım səviyyəsi 70 milyon avroya çatacaq". Erməni mətbuatının yazdığına görə, bu barədə Avropa İttifaqının Ermənistandakı nümayəndə heyətinin rəhbəri səfir Pyotr Svitalski deyib.

Svitalski Avroittifaqın Ermənistana yardımının orta hesabla 35 milyon avro olduğunu qeyd edərək, şura sədri Donald Tuskun bəyan etdiyi kimi, bunun 2 dəfə artırıldığını vurğulayıb.

Səfir qeyd edib ki, söhbət ikitərəfli layihələrin dəstəklənməsindən gedir. 2019-cu il ərzində yardım səviyyəsinin 70 milyon avroya çatacağı vurğulanıb: “Aİ növbəti çoxsahəli maliyyə yardımı ilə bağlı texniki müzakirələrə başlayacaq”.

Avroittifaqın hansı əsaslarla Ermənistana yardımları artırmaq niyyətində olması aydın deyil. Ona görə ki, Ermənistan üzərinə düşən öhdəlikləri yerinə yetirmir. Məsələn, 1999-cu ilin sentyabrında Brüsseldə Ermənistan hökuməti ilə Avropa İttifaqı arasında 2004-cü ildə atom elektrik stansiyasının bağlanması ilə bağlı saziş imzalanıb. Lakin müqavilə şərtlərinin tam əksinə olaraq, Ermənistan ömrü bitməkdə olan və istehsala başlamasından bəri 150-dən çox qəzaya məruz qalan “Metsamor” AES-in ömrünü uzatmaq üçün daim yollar axtarıb. Ermənistanla Avropa İttifaqı arasında əməkdaşlıq haqqında yeni sazişə əsasən, energetika sahəsində əməkdaşlıq çərçivəsində Ermənistan “Metsamor” AES-i bağlamalı və təhlükəsiz şəkildə istismardan çıxarmalıdır. Ancaq Ermənistan buna əməl etmək niyyətində deyil. Digər bu kimi öhdəliklər də var ki, Ermənistan buna əməl etmir.

Belə olan halda, Aİ hansı əsaslarla bu il ərzində Ermənistana maliyyə yardımlarını artırmaq niyyətindədir?

  • Fikrət Sadıqov: “Maliyyə yardımını artırmaqla Ermənistanı Rusiyadan uzaqlaşdırmaq istəyirlər”

Məsələyə münasibət bildirən keçmiş diplomat, politoloq Fikrət Sadıqov Aİ-nin bu addımını bir sıra amillərlə əlaqələndirdi: “Əvvəla Avropa İttifaqı da, digər aparıcı dövlətlər kimi, uzun illər ərzində ikili yanaşmalar nümayiş etdirir. Bu da növbəti əyani göstəricidir. Digər tərəfdən, biz onu da başa düşməliyik ki, Aİ Ermənistanı bu minvalla Rusiyanın boyunduruğundan çıxarmaq məqsədi güdür. İstəyir ki, bu ölkəni Avropaya yaxınlaşdırsın. Çünki əvvəllər Paşinyan hakimiyyətə gələndə Rusiya ilə Avropa arasında çabalayırdı. Görünür, Avropa İttifaqı maliyyə yardımını artırmaqla Ermənistanı Rusiyadan uzaqlaşdırmaq istəyir. Ancaq bu o qədər də real görünmür. Onu da unutmaq olmaz ki, Ermənistan yoxsul bir dövlətdir. Çox vaxt Aİ Ermənistana yardım məsələsində bu amildən də çıxış edir. Bütün bunlara baxmayaraq, Aİ Ermənistana pul ayıranda şərt qoyur. Yəni vəsait elə-belə ayrılmır. Bir sözlə, bunlar konkret məqsədlərə hesablanır. Düşünürəm ki, Aİ-nin bu addımı atmağında həm siyasi, həm də maliyyə məqsədi var. Görünür, bu məsələdə onların bəzi məqsədləri üst-üstə düşüb”.

Vidadi ORDAHALLI

Son xəbərlər