18/10/2019 03:29
728 x 90

Adını azad media qoyanlar MŞ-ni niyə hədəfə götürdülər...

“... aparılan media siyasətinə kölgə salmaq istəyirlər”

img

“İyulun 22-də – ölkədə Milli Mətbuat Gününün qeyd edildiyi bir vaxtda əsas vəzifəsi cəmiyyəti operativ, obyektiv və dolğun informasiya ilə təmin etmək olan bir neçə media təmsilçisi öz peşə borclarını yerinə yetirmək əvəzinə, ictimai diqqəti üzərlərinə çəkmək məqsədilə söz, mətbuat və ifadə azadlığı ilə heç bir çərçivəyə sığmayan hərəkətlərə yol veriblər. Bildiririk ki, medianın inkişafı üçün dövlət tərəfindən yaradılmış əlverişli şəraitdən belə sui-istifadə halları mövcud qanunvericiliyin tələblərinə əsasən qətiyyən yolverilməzdir”. Bu barədə DİN Mətbuat xidmətinin yaydığı açıqlamada bildirilib.

Qeyd olunub ki, özlərini müstəqil jurnalist adlandıran həmin şəxslər səhər saatlarında Daxili İşlər Nazirliyinin inzibati binasının qarşısında qanunsuz olaraq toplaşmağa və aidiyyəti dövlət orqanları ilə öncədən razılaşdırmadan aksiya keçirməyə cəhd göstəriblər: “Polis əməkdaşları tərəfindən bu təxribat xarakterli cəhdin qarşısı alınıb və aparılmış profilaktik söhbətlərdən sonra həmin şəxslər ərazidən uzaqlaşıblar.

Onlar bununla kifayətlənməyərək analoji hərəkətləri Mətbuat Şurasının inzibati binasının qarşısında da təkrarlamağa çalışıb, lakin ərazidə xidmət aparan polis əməkdaşları tərəfindən görülmüş tədbirlərlə ictimai asayişin və hüquq qaydasının kobud şəkildə pozulmasına yol verilməyib”.

O da məlumdur ki, Azərbaycanda medianın və mətbuatın inkişafı ilə bağlı sistemli işlər görülür. Mətbuatın maliyyə imkanları yaxşılaşıb. Son illər qəzetlərin maddi-texniki bazası xeyli düzəlib. Medianın inkişafı ilə bağlı bir sıra layihələr həyata keçirilir. Jurnalistlərin mənzil şəraiti yaxşılaşdırılır və s.

Bütün bunların fonunda, bu cür aksiyaların keçirilməsinə cəhd edilməsi nə məqsəd güdə bilər? Bu, ölkədə aparılan media siyasətinə kölgə salmaq məqsədilə edilə bilərmi?

  • Yadigar Məmmədli: “Qanundankənar hərəkətlər yolverilməzdir”

Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, bu kimi cəhdlərlə aparılan media siyasətinə kölgə salmaq istəyirlər: “Azərbaycanda son illər mətbuatla bağlı görülən işlər üzdədir. Ölkə mətbuatı bir çox sahədə dövlətin qayğısını görür. Cənab Prezidentin 10 il əvvəl yaratdığı KİV-in İnkişafına Dövlət Dəstəyi Fondu vasitəsilə hər il çoxsaylı layihə həyata keçirilir. Bu layihələrdən jurnalistlər, jurnalist qurumları, qəzetlər yararlanırlar. Mətbuata əlavə maliyyə yardımı ayrıldı. Bütün bunların hamısı bu sahədə dövlətin gördüyü işlərdir, ortaya qoyduğu iradədir. Kimsə bundan narazıdırsa, bu onun öz işidir. Kimliyindən asılı olmayaraq, hər kəs öz iradlarını qanunvericilik çərçivəsində ifadə etməlidir. Qanundankənar hərəkətlər yolverilməzdir. Mətbuat Şurası çoxsaylı KİV-i birləşdirir. MŞ-nin İdarə Heyəti Azərbaycan mətbuatının inkişafı ilə bağlı çoxlu qərar verib. Bütün bu görülən işlərə kimsə kölgə sala bilməz. Təəssüf ki, bəzən belə xoşagəlməz halların baş verməsinin şahidi oluruq. Hesab edirəm ki, ölkə mətbuatı irəli baxmalıdır. Daha çox dövlətin, millətin qarşısında özünün missiyası var. O da məlumatlandırma və maarifləndirmə missiyasıdır. Ancaq bu missiya olmalıdır, başqa şeylərə fikir verilməməlidir”.

Vidadi ORDAHALLI

Son xəbərlər