Jirinovskinin Ermənistana mesajları - Ukraynalıların gününə düşəcəksiniz...
Məlum olduğu kimi, Rusiya Liberal Demokratik Partiyasının sədri Vladimir Jirinovski deyib ki, Vladimir Zelenski Ukraynanın sonuncu prezidenti olacaq: “Bu, sonuncu seçkilər idi. 2024-cü ildə orada heç bir seçki olmayacaq. Ukrayna adlı dövlət də qalmayacaq. Siz Yaxın Şərqdəki situasiyanı nəzərə alırsınız. Orada elə hadisələr başlayacaq ki, hər kəs Ukraynanı unudacaq. Hər şey III dünya müharibəsinə doğru gedir. İran Vyetnam, Şimali Koreya və Kosova deyil”.
Maraqlıdır ki, Jirinovskinin Ukrayna barədə dediyi sözügedən fikirləri ermənilər özləri Ermənistana aid edirlər. Bununla bağlı erməni mətbuatında səslənən fikirlər maraq doğurur. Onlar hesab edirlər ki, Jirinovskinin Ukrayna barəsində səsləndirdiyi təhdid xarakterli fikirlər Ermənistana işarədir. Sözügedən məsələ ilə bağlı erməni mətbuatı yazır ki, Jirinovskinin Ukrayna ilə bağlı söylədiklərinin hamısı Ermənistan üçün aktualdır. Onların qənaətincə, ilk baxışdan LDPR rəhbəri son yarım ildə Ermənistan barədə heç nə demirdi. Ümumiyyətlə, son dövrlər Ermənistan və “Artsax” haqqında az danışmağa başlayır. Bir vaxtlar bu barədə daha yüksək səslə danışırdı. Sonra yalnız danışıqların tezliyini deyil, tonunu da dəyişdi. Erməni mətbuatı iddia edir ki, Jirinovskinin bu kimi fikirlərinin arxasında imperiya düşüncələri dayanır. Bu da Rusiyanın yeni ərazilər hesabına böyüməsi və vətəndaşları hesabına artırılmasından ibarətdir.
Erməni mətbuatının iddiasına görə, Ukrayna imperialist Jirinovskinin nöqteyi-nəzərindən dərsləri öyrənmək istəmir. Buna görə də Jirinovski Ukraynanın böyük bəlalarını proqnozlaşdırır.
Bütün bunlardan çıxış edərək erməni mediası belə qənaətə gəlib ki, onun Ukrayna ilə bağlı dedikləri hər şey Ermənistan üçün də aktualdır. Guya Jirinovskinin timsalında Putin keçmiş SSRİ dövlətlərinin azadlıq hüququna malik olmadıqlarını açıq şəkildə bəyan edir.
Yazıda o da qeyd olunur ki, bununla artıq Gürcüstanı və Ukraynanı öldürməyə hazır olduqlarını göstərdilər: “Bunu fəal şəkildə Belarusa işarə etdilər. Bunu mütləq bizə də deyəcəklər. Jirinovski mütləq spikerlərin ön cərgəsində olacaq. Bunu çox yaxında deyəcəyi tamamilə mümkündür. Baxmayaraq ki, əslində o, artıq ölkəmizin vətəndaşlarını Rusiya vətəndaşı olmağa dəvət edib”.
Bu baxımdan ermənilərin bununla bağlı iddialarını və narahatlıqlarını ekspertlər necə dəyərləndirirlər?
- Elşən Manafov: “Ermənilər bunun fərqində olduqları üçün narahatdırlar”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Əvvəla Jirinovski açıq-aşkar Rusiyanın MDB məkanındakı rolunun və əvvəlki mövqelərinin qaytarılmasının tərəfdarı olduğunu bəyan edir. Bir çox hallarda bəzi ekspertlər Jirinovskinin dili ilə Kremlin mövqeyini ifadə edirlər. Ukraynadakı seçkilər bu ölkənin Rusiyanın təsir dairəsindən çıxması üçün növbəti addım idi. Əlbəttə, bu, Ukrayna xalqının azad seçimi və iradəsi idi. Jirinovskinin dedikləri ilə bağlı Ermənistandakı narahatlığa gəldikdə isə, bir sıra məqamlara diqqət etmək lazımdır. Jirinovski Ermənistanın Rusiyanın strateji müttəfiqi olmasını həmişə dilə gətirib. Hazırkı iqtidar Kremli məyus etsə də, Rusiya Cənubi Qafqaz və Yaxın Şərqlə bağlı planlarında strateji bölgə kimi heç vaxt Ermənistandan imtina etməz. Ermənilər bunun fərqində olduqları üçün narahatdırlar. Nəzərə alsaq ki, Rusiya Ermənistanda hərbi baxımdan iştirak edir, yəni bu ölkədə əsgəri qüvvəsi var, o baxımdan Ermənistanı istənilən vaxt Rusiya ram edə bilər. Ancaq Ermənistanın bir dövlət kimi aradan qalxa biləcəyi ilə bağlı amillər xüsusən “Daşnaksütyun” partiyasını narahat edir. Son vaxtlar Türkiyənin Rusiya ilə yaxınlaşması, NATO ilə münasibətlərdə yaşanan gərginlik Türkiyənin MDB məkanında nüfuzunun artmasından xəbər verir. Ermənistanın bu yöndə narahatlığı artmaqdadır. Hətta S-400 raketlərinin Türkiyə tərəfindən alınması belə, Ermənistandakı bəzi dairələri narahat edir. Bu mənada bəzi dairələr narahatdırlar ki, bu yaxınlaşma Ermənistanın maraqlarına qarşı olacaq”.
Vidadi ORDAHALLI
