İlham Əliyevin prezidentlik dövründə medianın əsas inkişaf göstəriciləri...
Ölkədə ilk mətbu orqanın - əsası Həsən bəy Zərdabi tərəfindən qoyulmuş “Əkinçi” qəzetinin nəşrə başladığı 22 iyul 1991-ci ildən Azərbaycanda Milli Mətbuat Günü kimi qeyd olunur. “Əkinçi”nin 1875-ci il iyulun 22-dən 1877-ci ilin sentyabrınadək cəmi 56 sayı işıq üzü görsə də, onun Azərbaycan milli mətbuatının təşəkkül tapmasında, inkişafında əvəzsiz rolu olub.
Əsasən maarifçilik missiyasını üzərinə götürmüş “Əkinçi” az müddətdə həm ziyalı təbəqə, həm də sadə insanlar arasında çox məşhurlaşdı. Təsadüfi deyil ki, dövrünün görkəmli ziyalıları və qələm sahibləri qəzetlə əməkdaşlıq edir, müntəzəm olaraq məqalələrlə çıxış edirdilər. Lakin “Əkinçi”nin ömrü uzun sürmədi. Çar Rusiyası qəzetin insanların maariflənməsində, ictimai-siyasi proseslərə daha yaxından bələd olmasındakı rolundan çəkinməyə başladı və sonda qəzetin nəşrini dayandırdı.
O vaxtdan müxtəlif tənəzzül və intibah dövrləri keçən Azərbaycan mətbuatı daim cəmiyyətin proseslərə baxışını əks etdirən güzgü rolunu oynayıb. 1998-ci ilin avqustunda senzuranın ləğvi isə Azərbaycanda mətbuatın inkişafına ciddi təkan verib.
Hazırda respublikada çoxlu sayda müxtəlif qəzet və jurnal nəşr olunur, internet qəzetçilik inkişaf edir. Azərbaycan Konstitusiyasında söz və mətbuat azadlığının təməl prinsip olaraq əksini tapması ölkədə medianın azad və güclü bir cəmiyyət institutu kimi formalaşmasına təkan verib. Sözsüz ki, bütün bu proseslərin əsas iştirakçıları, əldə olunan nəticələrin əsas səbəbkarları Azərbaycan jurnalistləridir.
Prezident İlham Əliyevin 2008-ci il 31 iyul tarixli Sərəncamı ilə “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nın təsdiq edilməsi, 2009-cu il aprelin 3-də Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması azad medianı inkişaf etdirmək, mətbuatın maddi-texniki bazasını möhkəmləndirmək, jurnalistlərin sosial vəziyyətini yaxşılaşdırmaq məqsədilə atılan mühüm addımlardandır.
Milli mətbuatımızın yubileylərinin ölkədə geniş qeyd olunması, KİV-ə birdəfəlik yardımların göstərilməsi, mətbuat işçilərinin sosial müdafiəsinin gücləndirilməsi tədbirləri, həmçinin, milli mətbuatın inkişafındakı xidmətlərinə görə jurnalistlərin fəxri adlarla təltif edilməsi haqqında sərəncamlar da mətbuata və bu sahədə çalışanlara göstərilən qayğının tərkib hissəsidir. İlham Əliyevin prezidentlik dövründə medianın əsas inkişaf göstəriciləri daha nələr sayıla bilər?
- Azər Həsrət: “O da, bizim kimi, Həsən bəy Zərdabi ideallarına sadiq bir şəxsiyyətdir”
Media eksperti Azər Həsrət “Bakı-Xəbər”ə bildirdi ki, İlham Əliyevin ölkəmizə rəhbərlik etdiyi ötən dövrdə Azərbaycan mətbuatının inkişafı ilə bağlı çox fərqli addımlar atılıb: “Əsasən azad mətbuatın geniş əl-qol açması üçün mümkün olan, dünya standartlarına tam cavab verən qanunverici bazanın möhkəmləndirilərək təkmilləşdirilməsini göstərə bilərik. Konstitusiyadan başlayaraq, digər qanunlarımızda elə hallar nəzərdə tutulur ki, istənilən şəxs media fəaliyyəti ilə məşğul ola bilər. Prezident İlham Əliyevin şəxsən özü jurnalistlərin sosial problemlərini üzərinə götürüb. Bilirsiniz ki, cənab Prezident dəfələrlə jurnalistlərin dostu seçilib. Bizim dəfələrlə Prezidentə müəyyən problemlərin həlli ilə bağlı müraciətlərimiz olub. Xüsusilə də mənzil şəraitinin yaxşılaşması üçün edilən müraciətlərə müsbət cavab verildi. Hazırda jurnalistlər üçün iki bina tikilib, üçüncü də istifadə verilmək üzrədir. “Əməkdar jurnalist” adının bərpa edilməsi də İlham Əliyevin adı ilə bağlıdır. Milli maraqların qorunması istiqamətində fərqlənən jurnalistlərə bu adın verilməsi çox təqdirəlayiqdir. Ölkə başçısının özünün mediaya münasibəti xarakterik sayıla bilər. O, jurnalistlərlə çox səmimidir. Bütün görüşlərdə biz bunu sezirik. Özü bilərəkdən şərait yaradır ki, jurnalistlər sərbəst fikirlərini ifadə edə bilsinlər. Şəxsən iştirak etdiyim görüşdə Prezidentin dediyi fikir mənə qol-qanad verdi. Düşünürəm ki, bu, bütün media mənsublarına da yaradıcılıq, fəaliyyət üçün əlavə stimul vermiş oldu. Deyirdi ki, bütün neqativlikləri yazın, göstərin, çünki məmurlar bəzən mənə yalan məlumat verir, mən gercəkləri bilmək istəyirəm. Cənab Prezidentin bu sözü istənilən ölkə jurnalisti üçün arzuolunandır. Azərbaycan mediasına dövlətin qayğısı hazırda çox yüksək səviyyədədir. Təəssüf ki, bəzi bədxahlar bunu görmək istəmirlər. Bu heç nəyi dəyişmir. İlham Əliyevin mediaya münasibəti tam olaraq Azərbaycanın milli, dövləti maraqlarına cavab verir. Belə bir gündə mən həmkarlarımızla bərabər ölkə başçısını da təbrik etmək istərdim. O da, bizim kimi, Həsən bəy Zərdabi ideallarına sadiq bir şəxsiyyətdir”.
Məhəmmədəli QƏRİBLİ
