Özünü hüquq müdafiəçisi adlandıran Leyla Yunus ABŞ-da yaşayan jurnalist Sevinc Osmanqızının “Osmanqızı” kanalında xalq hərəkatının lideri, AXCP sədri olmuş Azərbaycanın ikinci prezidenti Əbülfəz Elçibəyi "agent" adlandırıb. L.Yunus deyib ki, Əbülfəz Elçibəyin həbsdən çıxmasının səbəbi onun KQB ilə əməkdaşlığa getməsi olub.
Leyla Yunusun bu açıqlaması cəmiyyətdə ciddi etirazla qarşılanıb. Çox maraqlıdır ki, Leyla Yunusun Elçibəy haqda səsləndirdiyi fikirlərə AXCP mirasına tam sahib çıxmış Əli Kərimlinin rəhbəri olduğu partiyadan olduqca zəif münasibət bildirilir. Hətta YAP-çılar belə bu mövzuda Elçibəyi müdafiə edib, Leyla Yunusu sərt tənqid etdiyi halda, Əli Kərimli gözləmə mövqeyinə çəkildi. Jurnalistlərin, siyasətçilərin sosial şəbəkədəki sərt etirazlarından sonra Əli Kərimli çox yüngül tərzdə bu mövzuya münasibət bildirdi, özü də 4 gün sonra. Niyə AXCP adını daşıyan bir partiyanın sədri öz liderini inadla müdafiə etməkdən çəkinir? Leyla Yunusdan olan qorxunun arxasında hansı amil dayanır?
Rəfail Becanov: “Cavabın zəif olması və gecikməsi bununla bağlıdır”
AXCP adına iddialı olan qanadlardan birinin funksioneri Rəfail Becanov qəzetimizə bildirdi ki, Əli Kərimli bu hərəkəti ilə Elçibəyə hansı dərəcədə sadiq olduğunu bir daha sübut etdi: “Çox ciddi təpkilərdən sonra o, kiçik açıqlama verməyə məcbur oldu. Hətta Elçibəyin əleyhdarları belə onu Leyla Yunusa cavab verməkdə qabaqladı. Onun açıqlaması ilə tanış olduqda bir nəticə çıxır: “üzürü qəbahətindən betər”. Həmin münasibətdə Leyla Yunusa belə bir xitab var: “indi bunun zamanıydımı?” Sanki demək istəyir ki, Elçibəyə “agent” demək olardı, amma indi yox. Bu yanaşmadan Əli Kərimlinin mövqeyi tam aydın olur. Orada Əli Kərimli deyir ki, heç vaxt Elçibəyin fanatı olmayıb. Bir daha aydın olur ki, Əli Kərimli daim Elçibəydən istifadə edib. Leyla Yunusdan çəkindikləri də dəqiqdir. Bundan artıq şəkildə cavab verə də bilməzdi. Əli Kərimli ilə Leyla Yunusu maraqlandıran xeyli məqam var ki, onlar üst-üstə düşür. Leyla Yunusun xarici təşkilatlarda ciddi maliyyə qaynaqları var. Çox güman ki, həmin qaynaqlardan Əli Kərimli də bəhrələnir. Leyla Yunusla konfliktə getmək həmin maliyyədən məhrum olmaq anlamına gələ bilər. Əli Kərimli sərt cavab verməməsini guya hakimiyyətlə mübarizə aparan insanların mövqeyini zəiflədə biləcəyi ilə əsaslandırdı. Leyla Yunus heç vaxt hakimiyyətlə mübarizə aparmayıb, onun mübarizəsi Azərbaycan dövlətinə qarşı olub. Bir daha təsdiq olundu ki, Leyla Yunusla Əli Kərimlinin idarə olunmasında eyni xətt mövcuddur. Cavabın zəif olması və gecikməsi bununla bağlıdır”.
Məhəmmədəli QƏRİBLİ
