Suriyada sıxışdırılan terror qruplaşmalarının başqa məkanlara üz tutacağına dair verilən proqnozlar özünü təsdiqləyir. Belə məlum olur ki, terrorçuların üz tutmaq niyyətində olduqları əsas məkanlardan biri də Qafqazdır. Onların buraya gəlişinə şərait yaradan əsas dövlət qismində isə işğalçı Ermənistan çıxış edir.
Ümumiyyətlə, hadisələrin təhlili göstərir ki, Ermənistanın Suriya və digər ərazilərdəki terrorçularla getdikcə daha sıx işbirliyi yaranır. Bura hətta İŞİD terrorçu qruplaşması da daxildir. Xatırladaq ki, bundan əvvəl İŞİD-in MDB məkanına marağının artması artıq rəsmi səviyyələrdə də etiraf edilib. Rusiyanın Federal Təhlükəsizlik Xidmətinin rəhbəri Aleksandr Bortnikov bəyan edib ki, İŞİD ekstremist qruplaşmasının üzvləri Əfqanıstanın şimalına, Orta Asiyadakı keçmiş sovet respublikaları ilə sərhədə yığışır. Federal Təhlükəsizlik Xidmətinin direktoru hazırda qruplaşmaya qarşı mübarizə aparıldığını da diqqətə çatdırıb: “Azərbaycan, Tacikistan, Qırğızıstan və Özbəkistandan olan tərəfdaşlarla əməkdaşlıq nəticəsində İŞİD və digər beynəlxalq terror təşkilatlarının 8 yuvası aşkar və məhv edilib”. Onun sözlərinə görə, aparılan mübarizəyə rəğmən isə, İŞİD-in MDB məkanına marağı artır və bura Qafqaz da daxildir. Aleksandr Bortnikov bildirib ki, İŞİD-in maraq göstərdiyi ölkələrdən biri də məhz Ermənistandır.
Xatırladaq ki, bir müddət əvvəl bu xüsusda Rusiya Daxili İşlər Nazirliyinin Ekstremizmə Müqavimət Baş İdarəsinin rəisi Oleq İlyinıx da maraqlı açıqlamalar vermişdi: “Suriya və İraqdakı məğlubiyyətindən sonra İŞİD öz maraqlarını Qazaxıstan, Özbəkistan, Tacikistan, Qırğızıstan və Ermənistan ərazilərinə yönləndirir”.
İŞİD-lə yanaşı, Ermənistan Suriyada genişmiqyaslı fəaliyyətini davam etdirən PKK ilə də sıx işbirliyi içindədir. Hələ bu ilin aprelində məlum olmuşdu ki, Suriyada PKK terror təşkilatının tərkibində ermənilərdən ibarət yeni terror qrupu yaradılıb. Qrupun tərkibinə Ermənistandan Suriyaya gedən daşnak-ermənilər və Suriya ərazisində yaşayan bəzi erməni qruplar qoşulub. PKK-nın tərkibində qurulan bu erməni qruplaşma terror təşkilatının Suriya qolu olan YPG-yə tabedir. Bundan sonra məlum oldu ki, bu vaxta qədər PKK-ya qucaq açan Ermənistan indi onun tərkibini elə ermənilərin hesabına da genişləndirməyə çalışır. Bu isə təkcə Azərbaycana yox, Türkiyəyə, hətta Yaxın Şərqdə öz planları olan Rusiyaya da müəyyən təhdidlər yaradır. Məhz belə bir vaxtda yayılan digər məlumata əsasən, indiyə qədər PKK-ya silah və maddi dəstək verən Ermənistan hazırda ASALA terror təşkilatını yeni adla dirçəltməyə başlayıb. Türkiyə mediası yazır ki, Suriyanın şimalındakı Haseki bölgəsində qurulan və Ermənistanın birbaşa dəstəklədiyi, Nubar Ozanyan adını daşıyan erməni yaraqlı qruplaşması getdikcə böyüməkdədir. Bu qruplaşmanın qərargahından yeni görüntülər sosial şəbəkələrdə yayılıb və məlum olur ki, “Ozanyan qrupu” qərargahında Ermənistan bayrağını asıb.
“Ozanyan qrupu” əvvəlcə suriyalı ermənilərdən ibarət olmaqla 90 nəfərlik batalyon kimi formalaşıb. Lakin hazırda qrupun tərkibində 500-dən çox yaraqlı var və briqada şəklində formalaşdırılıb. Qruplaşmanın Türkiyə ilə sərhəd Kamışlı, Resulayn, Amude, Tel Abyad, Aynularab bölgələrində mövqe tutacağı bildirilir. Həmin qruplaşma erməni terror təşkilatı ASALA-nın davamçısı hesab edilir. Suriya müharibəsi zamanı uzun illərdir bu bölgədə yerləşdiirlmiş ermənilər qruplaşmaya daxil olub. Minlərlə suriyalı erməni isə Ermənistana köçüb, onlardan bir hissəsi Azərbaycanın işğal altındakı ərazilərində yerləşdirilib. Suriyada yaradılan erməni qruplaşmasına Ermənistandan hərbi və maddi dəstək verilir. Ermənistan öz hərbi təlimatçılarını qruplaşmaya təlim keçmək üçün bölgəyə göndərib. Türkiyə qaynaqları qeyd edir ki, Ermənistan indi də PKK-ya birbaşa dəstək verir, öz ərazisində və işğal altındakı Qarabağda PKK düşərgələri yaradıb. Amma görünən budur ki, artıq tərəflər arasında işbirliyi daha sürətlə genişlənir. Ümumiyyətlə, PKK-çıların Ermənistana keçməsi, yaxud ora toplaşması təsadüfi deyil. Çünki həm PKK-çılar, həm də Ermənistan Türkiyə və Azərbaycanın düşmənidir. İndiki durumda PKK öz çirkin niyyətlərini həyata keçirmək üçün isə ən əlverişli ərazi kimi Ermənistanı görür. Bundan əlavə, Ermənistan PKK-nı terrorçu qruplaşma olaraq tanımır. Yeri gəlmişkən, erməni lobbisi və Ermənistanın kürd terrorçularına dəstək verməsi və onları müdafiə etdiyi barədə mövqeyi də tərəflər arasında sıx işbirlyinin göstəricisi sayılır. Ümumiyyətlə isə, PKK ilə ermənilərin terror təşkilatı ASALA arasında əlaqələr ötən əsrin 80-ci illərindən formalaşmağa başlayıb. ASALA onlarla türk diplomatına qarşı sui-qəsdlər həyata keçirən vaxtlarda PKK Türkiyənin daxilində türkləri qanına qəltan edirdi. Sonradan Ermənistan müstəqillik qazandıqdan sonra bu münasibətlər daha da yaxınlaşdı. Həmin dövrdə PKK-nın Ermənistana hərtərəfli yardım etməsi barədə çoxsaylı məlumatlar var. Ermənilərin və erməni diasporunun yüz ildir beynəlxalq ictimaiyyətə sırımağa çalışdığı qondarma" soyqırım" iddialarına PKK və ona yaxın dairələr tam mənada dəstək verib. İndi isə tərəflər arasında artan işbirliyi fonunda Ermənistan PKK-nı yeni üzvlərlə də təmin edir. Aydındır ki, perspektivdə Ermənistan terrorçu qruplaşmaları Qarabağa köçürərək onlardan Azərbaycana qarşı istifadə etməyi də düşünür. Amma məsələnin təhlükəli tərəfi budur ki, Ermənistan sayəsində Yaxın Şərqdən terrorçu qruplaşmaların Qafqaza böyük axını başlanır.
Nahid SALAYEV
