Ermənistan parlamentinin sədri Ararat Mirzoyanın rəhbərlik etdiyi nümayəndə heyəti iyulun 14-dən ABŞ-da səfərdədir. O, iyulun 16-da ABŞ Senatında çoxluq olan respublikaçıların rəhbəri Mitç Makkonellə görüşüb. Tərəflərin Ermənistana mümkün maliyyə yardımının həcminin artırılması, həmçinin, regional təhlükəsizlik məsələləri ətrafında geniş müzakirə apardıqlarına dair məlumat verilib.
Ermənistanın rəsmi dairələrinin görüşlə bağlı yaydığı məlumatda qeyd edilir ki, tərəflər Ermənistan və regionda demokratiyanın inkişaf etdirilməsi ətrafında da fikir mübadiləsi aparıblar. Ermənistanın bütün rəsmi təmaslarda dilənçilik etməsi məlumdur. Budəfəki görüşdə də belə fikirlərin irəli sürülməsi təəccüblü deyil. Ancaq maraqlı olan budur ki, daim ABŞ-ın demokrat hakimiyyətləri ilə yaxın olan Ermənistan hakimiyyəti və ona bağlı olan diasporu bu dəfə respublikaçı çoxluğa qarmaq atır. Dilənçiliklə yanaşı, guya dünyanın qlobal problemlərini də onlarla müzakirə etməyə çalışır. Erməni nümayəndə heyətinin bu riyakarlığı nə ilə izah edilə bilər?
Nəzakət Məmmədova: “Ermənistan öz işğalçı siyasətindən əl çəkib regionda həyata keçirilən beynəlxalq layihələrə qoşulmaqla vəsait əldə etmək əvəzinə...”
Politoloq Nəzakət Məmmədova qəzetimizə bildirdi ki, son günlər Ermənistanın diplomatiya cəbhəsində bir vurnuxma hiss olunur: “Ermənistan XİN-də Paşinyanın öz seçdiyi siyahı əsasında Ermənistanda akkreditasiya olunmuş diplomatlarla bağlı qapılar arxasında görüş keçirilməsi gözlənir. Məlumata görə, görüş o qədər məxfidir ki, hətta XİN-in aidiyyəti departamentləri belə bu barədə məlumatlandırılmayıb. Eləcə də Ermənistan parlamentinin sədri Mirzoyanın ABŞ-da Senatdakı respublikaçı çoxluğunun rəhbəri Makkonellə görüşü və keçirdiyi digər görüşlər diqqəti cəlb edir. Görüşdə bir sıra məsələlər müzakirə olunub ki, məsələn, onlardan biri işğalçı ölkənin ABŞ-dan maliyyə yardımı istəməsidir. Hələ ötən il növbədənkənar seçkilər ərəfəsində ABŞ Ermənistana yardımları artırmaq qərarına gəlmişdi. Halbuki, "Minilliyin çağırışı" proqramı əsasında 2006-2008-ci illərdə Ermənistana 177 milyon yardım ayıran Dövlət Departamenti 2008-ci ilin martında qərbyönümlü müxalifətə, nümayişçilərə təzyiqdən sonra bu yardımı dayandırmışdı. Lakin Paşinyanın iqtidara gəlməsindən sonra ABŞ yardımları yenidən bərpa etmək qərarına gəldi. Bu da onu göstərir ki, Ermənistan öz işğalçı siyasətindən əl çəkib regionda həyata keçirilən beynəlxalq layihələrə qoşulmaqla vəsait əldə etmək əvəzinə, öz işğal planlarını davam etdirmək və xarici yardımlar hesabına yaşamaq fikrindədir. Bunun üçün isə əsas bəhanə guya “məxməri inqilab”dan sonra ölkədə demokratiya quruculuğuna dəstək məsələsidir. Təəssüf ki, ABŞ Konqresi son günlər erməni diasporuna yaxınlığı ilə tanınan konqresmenlərin təsiri ilə Qarabağ münaqişəsinə aid 2 düzəliş qəbul edib. Verilən qərarlar ABŞ-ın Azərbaycana silah satmasına məhdudiyyətlər qoyur və Qarabağda münaqişə zonasında atəşkəs rejiminin pozulmasını fiksasiya edəcək lokatorların quraşdırılmasını nəzərdə tutur. Belə bir şəraitdə öz mənfur planlarının həyata keçməsinə çalışan Ermənistan rəhbərliyi və ABŞ-dakı erməni diasporu Konqreslə əlaqələri genişləndirməkdədir. Azərbaycan və Türkiyə diasporları dərhal hərəkətə keçməli və əks tədbirlər görülməlidir. Paşinyanın diplomatlarla qapalı görüşü, ABŞ Konqresində anti-Azərbaycan fəaliyyətləri, Keşikçidağda ölkəmizə qarşı təxribat Azərbaycana qarşı məkrli planlardan xəbər verir”.
Məhəmmədəli QƏRİBLİ
