13/12/2019 19:27
728 x 90

Naxçıvandan Ermənistanın atəşə tutulması kimi ermənilərin informasiya təxribatının mahiyyəti...

“Sanki demək istəyirlər ki, Naxçıvandan onlara atılan güllə dünya müharibəsinə səbəb ola bilər”

img

Ermənistan KİV-i ölkənin Müdafiə Nazirliyinə istinadən növbəti dezinformasiyanı tirajlayıb. Onlar iddia edirlər ki, guya Naxçıvanla sərhəddə olan Elpin kəndi bizim tərəfdən mütəmadi atəşə tutulur. Erməni qaynaqları deyirlər ki, guya kənd bir neçə gündür mütəmadi atəşə məruz qalır və hətta bunun nəticəsində bir evin çardağına ziyan dəyib.

Ən maraqlısı isə budur ki, erməni tərəfi təxribat xarakterli bu məlumatı yaymaqla yanaşı, onu regionda baş verən böyük proseslərlə əlaqələndirməyə çalışıb. Bunun Türkiyənin Rusiyadan aldığı S-400-lərlə bağlı yaranan gərginliyin fonunda baş verdiyini qeyd etməklə, bütün beynəlxalq təhlükəsizliyə təhdid olduğunu bildirirlər. Ermənilər bu xüsusda yazırlar ki,  Naxçıvandakı fəallıqda Rusiya ilə Türkiyənin yaxınlaşmasının izini də görürlər və bunu status-kvonu dəyişmək cəhdinə hazırlıq kimi dəyərləndirirlər. Belə qlobal miqyaslı yalanları dövriyyəyə buraxmaqla Ermənistan hansı məqsədi güdür?

  • Daşdəmir Əliyev: “Ermənistan bu cür təxribat xəbərlərini yaymaqla həm də Rusiya ilə Türkiyənin münasibətlərinə xələl gətirmək istəyir”

Hərbi ekspert Daşdəmir Əliyev qəzetimizə bildirdi ki, bununla Ermənistan diqqəti özünə cəlb etmək istəyir: “Özünü guya dünyada gedən vacib proseslərin önəmli aktoru kimi qələmə verməyə çalışır. Naxçıvanla bağlı onların daim məkrli niyyətləri olub. Azərbaycanın həmin qədim diyarına daim ərazi iddiaları irəli sürüblər və bu gün də həmin sərsəm fikirlərindən əl çəkmirlər. Hətta uzun illərdir Naxçıvanı blokadada saxlayırlar. Onlar Naxçıvanla bağlı tamamilə fərqli mənzərəni gözləyirdilər. Amma bu gün görürlər ki, Naxçıvan onlar üçün hətta təhlükə mənbəyinə çevrilib. Naxçıvanda formalaşan Ümumqoşun Ordusu elə böyük gücə malikdir ki, hətta düşmən ərazisindəki istənilən hədəfi susdura bilər. Eyni zamnda, orada tez-tez Türkiyə ilə birgə keçirilən hərbi təlimlər Ermənistanı ciddi narahat edir. Bu yaxınlarda çox uğurla keçirilən Günnüt əməliyyatı isə onların canına ciddi vəlvələ salıb. Ermənistan bu cür təxribat xəbərlərini yaymaqla həm də Rusiya ilə Türkiyənin münasibətlərinə xələl gətirmək istəyir. Demək istəyir ki, biz sizin vassalınız ola-ola, siz niyə Türkiyə ilə hərbi sahədə yaxınlıq edirsiniz, hətta onlara S-400 kimi raket də satırsınız? Yəni bir kəndə güllənin atıldığı üzərində qurduqları yalanı böyük miqyasa qədər öz xeyirlərinə uyğun şəkildə böyüdə biliblər. Sanki demək istəyirlər ki, Naxçıvandan onlara atılan güllə dünya müharibəsinə səbəb ola bilər. Bilirsiniz ki, bizim əsgərlər daim ermənilərə cavab verib. Heç vaxt biz ilk gülləni atmamışıq. Onların düşündükləri bu təxribat da keçərli deyil. Naxçıvandakı ordumuz çox qüdrətlidir. Bundan Ermənistanın keçirdiyi narahatlığı isə təbii qəbul etməliyik”.

Məhəmmədəli QƏRİBLİ

Son xəbərlər