18/07/2019 09:18
728 x 90

Dünya elitası xalqa dövlət xidmətlərinin Azərbaycan təcrübəsi barədə yetərli məlumatlandırıldı...

img

Bakıda BMT-nin Dövlət Xidmətləri Forumunun açılışında çıxış edən Birinci vitse-prezident Mehriban Əliyeva Azərbaycanın dövlət xidmətləri sahəsində əldə etdiyi nailiyyətlər və onların necə təkmilləşdirilməsi ilə bağlı tədbir iştirakçılarına ətraflı məlumat verib:

"Sizin hamınızı Azərbaycanda salamlamaqdan məmnunam. Şərqi Avropa regionunda ilk dəfə təşkil olunan BMT-nin Dövlət Xidmətləri Forumunu keçirməkdən şərəf hissi duyuruq. Bu tədbiri paytaxtımızda keçirmək qərarına görə BMT-yə təşəkkürümüzü bildiririk. Biz bunu Azərbaycanın dövlət xidmətləri sahəsində əldə etdiyi nailiyyətlərin dəyərləndirilməsi hesab edirik. Bu il keçirilən tədbirin mövzusu bütün xalqlar üçün mühüm əhəmiyyət kəsb edir. Bu, dünyanın müxtəlif yerlərindən gəlmiş, qərar qəbul edən yüksək rütbəli şəxslər üçün təcrübələrini bölüşmək, çağırışları müzakirə etmək və BMT-nin 2030-cu il gündəliyinin Dayanıqlı İnkişaf Məqsədlərinə nail olmaq üçün faydalı platformadır. Bu prosesdə dövlət qurumlarının xalqımıza yüksək keyfiyyətli xidmətlər göstərmək və innovativ dəyişikliklərdə iştirak etmək bacarığı xüsusi rol oynayır. Bu baxımdan, mən fürsətdən istifadə edərək, bu gün sizinlə səmərəli dövlət qulluğu sistemi sahəsində Azərbaycanın uğurları ilə bölüşmək istərdim”.

Azərbaycanın Birinci vitse-prezidenti vurğulayıb ki, əsas hədəf və məqsəd yeni xidmətlərin insanlara yönəlməsi və vətəndaşların keçmişdə üzləşdiyi çətinliklərin aradan qaldırılmasından, dövlət xidmətlərini insanlar üçün əlçatan, rahat, asan və səmərəli etməkdən ibarətdir. “Vahid pəncərə” prinsipi əsasında dövlət xidmətlərinin göstərilməsi ideyasının bu cür ərsəyə gəldiyini qeyd edən Mehriban Əliyeva ASAN adının Azərbaycan dilində, mənaca, həmçinin, “asan” olduğunu vurğulayaraq deyib: “ASAN xidmət” Azərbaycan Prezidentinin təşəbbüsü ilə genişmiqyaslı dövlət idarəçiliyi islahatlarının bir hissəsi kimi 2012-ci ildə təsis edildi. Xalq isə dərhal bu islahatları alqışladı. “ASAN xidmət” Bakıda kiçik pilot layihə ilə fəaliyyətə başladı. Həmin vaxt xalqın tələbatlarına şəffaf, əlçatan, səmərəli və rahat şəkildə cavab vermək məqsədilə bir neçə dövlət xidmətləri göstərən qurum bir binaya toplaşdı. ASAN dərhal əhali arasında o qədər populyarlaşdı ki, biz bu uğurun davamı olaraq, göstərilən xidmətlərin sayını və növünü çoxaltmaq fikrinə gəldik və “ASAN xidmət” Azərbaycanın rayonlarında da açılmağa başlandı".

Bu baxımdan maraqlıdır, Mehriban Əliyeva ölkəmizin dövlət xidmətləri sahəsində əldə etdiyi nailiyyətləri və onların necə təkmilləşdirilməsi ilə bağlı məlumatı beynəlxalq tədbir iştirakçılarına necə təqdim edə bildi?

Politoloq Yeganə Hacıyevanın sözlərinə görə, Azərbaycan müstəqillik əldə etdikdən sonra ciddi inkişaf yolu keçib: “Amma bir çoxları, xüsusilə də  bizi istəməyənlər bu nailiyyətləri neft amili ilə bağlamağa çalışırlar. Onlar belə təqdim etmək istəyirlər ki, biz həmin inkişafa yalnız neftimizi satıb, maddi gəlir əldə edərək nail omuşuq. Bəzi layihələrin icrası, həyata keçirilməsi göstərdi ki, biz intellektimizlə də çox şeylərə nail olmağı bacaran xalqıq. Bunlardan ən mükəmməli “ASAN xidmət” brendidir. Bu gün “ASAN xidmət“ modeli dünya miqyasında tanınmış Azərbaycan brendi kimi səciyyələndirilir. Bu sistem hazırda bir çox ölkələr tərəfindən öyrənilir və tətbiq olunur. “ASAN xidmət“in yaradılması bir çox vətəndaşın əlavə xərclərinin azalmasına, peşəkarlıq səviyyəsinin yüksəldilməsinə, şəffaflığın artırılmasına və bəzi dövlət qurumlarında korrupsiya probleminin həllinə böyük töhfələr verib. Ümumiyyətlə, “ASAN xidmət“ modeli sübut edib ki, korrupsiyanın qarşısını almaq və bu sahədə institusional islahatların səmərəliliyini artırmaq mümkündür. 2015-ci ildə dövlət xidmətlərinin sadələşdirilməsinə, təkmilləşməyə verdiyi töhfəsinə və yaradıcı olmağına görə “ASAN xidmət“ Birləşmiş Millətlər Təşkilatının Dövlət Xidməti Mükafatına layiq görülüb. Bu gün Azərbaycan brendi olan “ASAN xidmət“ modelindən dünyada 10 milyonlarla  insan yararlanır. Bir çox ölkə başçıları ölkəmizə gələndə, bu təcrübənin özlərində tətbiqində maraqlı olduğunu deyirlər. Təbii ki, bizim bu nailiyyətimizin təbliği, dünyaya düzgün çatdırılması önəmlidir. Bu baxımdan hesab edirəm ki, Mehriban xanım Əliyeva Bakıdakı mötəbər tədbirdə bunun öhdəsindən bir daha layiqli şəkildə gələ bildi. Yalnız “ASAN xidmət” deyil, eyni zamnda, digər nailiyyətləri də tədbir iştirakçılarının diqqətinə mükəmməl çatdırdı. Hesab edirəm ki, belə məlumatların məhz ölkənin ikinci şəxsi tərəfindən verilməsi həm də mötəbərliyi önəmli edir. Tədbir iştirakçıları bunun fərqinə varır və öz ölkələri üçün də tətbiqində maraqlı olduqlarını göstərirlər”.

Məhəmmədəli QƏRİBLİ

Son xəbərlər