Məlum olduğu kimi, Prezident İlham Əliyev hərbi və hüquq-mühafizə orqanlarının xüsusi rütbəli əməkdaşlarının və mülki işçilərinin əməkhaqlarının 40 faiz artırılması barədə sərəncam imzalayıb.
Sərəncama əsasən, güc qurumlarının hərbi qulluqçularının (müddətli həqiqi hərbi xidmət hərbi qulluqçuları istisna olmaqla) aylıq pul təminatı vəzifə maaşları orta hesabla 40 faiz həcmində artırılır. Sözügedən sərəncam 2019-cu il sentyabrın 1-dən qüvvəyə minir.
Hərbçilərin sosial müdafiəsi dövlət rəhbərliyinin daim diqqət mərkəzində olan əsas məsələlərdəndir. Ölkənin iqtisadi potensialı gücləndikcə, bu istiqamətdə görülən işlərin miqyası daha da genişlənir. Ordu quruculuğu istiqamətində həyata keçirilən tədbirlər, o cümlədən, əsgər və zabitlərin xidmət şəraitinin müasirləşdirilməsi ilə yanaşı, hər cür infrastrukturu olan hərbi şəhərciklərin tikilməsi, hərbi qulluqçuların sosial məsələlərinin həlli onlara göstərilən diqqətin nəticəsidir. Eyni zamanda, onların əməkhaqlarının davamlı olaraq artırılması, verilən imtiyaz və güzəştlərin miqyasının genişləndirilməsi, hərbçilərin ailə üzvlərinin sosial müdafiəsinin gücləndirilməsi, mənzil-məişət problemlərinin həlli bir daha sübut edir ki, hərbi qulluqçular hərtərəfli dövlət qayğısı ilə əhatə olunublar.
Bu baxımdan, Prezidentin son sərəncamını ekspertlər necə dəyərləndirirlər? Artımlar hansı formada özünü göstərəcək?
Üzeyir Cəfərov: “Eyni zamanda, ictimai asayişin qorunmasına öz müsbət təsirini göstərəcək”
Bütün bu və digər məsələləri “Bakı-Xəbər”ə şərh edən hərbi ekspert Üzeyir Cəfərov bununla bağlı bir sıra məqamlara aydınlıq gətirdi: “Görünən odur ki, ölkə başçısı güc strukturları ilə bağlı zaman-zaman önəmli addımlar atır. Bu önəmli addımlardan biri də odur ki, 2019-cu il üçün müdafiə və təhlükəsizlik sektoruna 3 milyard, 370 milyon manat vəsait ayrılıb. Bu da 2018-ci illə müqayisədə 4,6 faiz çoxdur. Deməyim odur ki, bu sahəyə ayrılan vəsaitin həcmi ilbəil artırılır. Bunun birinci səbəbi odur ki, hələlik torpaqlarımız işğal altındadır. O üzdən, həm silah-sursat alınır, həm də hərbçilərin rifah halı yaxşılaşdırılır. Bütün bunları nəzərə alan ölkə rəhbəri tərəfindən sentyabrın 1-dən Silahlı Qüvələrdə və ümumiyyətlə, bütün güc strukturlarında, o cümlədən, digər sahələrdə çalışan insanların rifahını yaxşılaşdırmaq üçün sərəncam imzalanıb. Artıq qərar var ki, hələlik mənzili olmayan hərbi qulluqçular üçün kirayə haqqı 150 manata qaldırılsın. Bunun özü çox böyük müsbət dəyişiklikdir. Çünki indiyə qədər buna görə verilən kirayə pulunun həcmi aşağı idi. Bəzən belə fikirlər səslənirdi ki, hərbçilər həmin pulla Bakıda və digər şəhərlərdə ev kiraləyə bilməz. Artıq bu pul 150 manatdır. Sözügedən kirayə pulu hərbçinin özü və ailə üzvləri üçün nəzərdə tutulur. Bütün hallarda, sözügedən vəsait hərbçilər üçün mühüm dəstəkdir. Eyni zamanda, hərbçilərin məvaciblərinin 40 faiz artırılması nəzərdə tutulub. Bu sahədə elə adam var ki, 250 manat məvacib alır. Onların məvacibi 40 faiz artırılacaq. Elə hərbçilər var ki, aldığı məvacib 600-700 manatdır. Bu həcmdə maaş alan hərbçilərin məvacibi 10 faiz artırılacaq. Bu o məqsədlə edilir ki, aradaki balans pozulmasın və büdcəyə əlavə yük düşməsin. İstənilən halda, verilən qərar təqdirəlayiqdir və bu, hərbçilərin sosial durumuna müsbət təsir edəcək. Qarşıdan Silahlı Qüvələr Günü gəlir. Bildiyim qədər, zabit və gizirlərə yeni mənzillərin verilməsi gözlənir. Eyni zamanda, bəzi digər sosialyönümlü tədbirlər gözlənir. Bütövlükdə, hərbi və hüquq-mühafizə orqanlarında çalışanların məvaciblərinin artırılması ölkənin müdafiə qüdrətini daha da gücləndirəcək. Eyni zamanda, ölkədə ictimai asayişin qorunmasına öz müsbət təsirini göstərəcək”.
Vidadi ORDAHALLI
