Jalə Əliyeva: “İtaliya dövlətinin ən yüksək mükafatı ilə ölkə başçımızın və 1-ci vitse-prezidentimizin təltif edilməsi Azərbaycanın dünyada artan nüfuzuna, tanınan və qiymətləndirilən inkişafına verilən böyük qiymətin göstəricisidir” “Hər bir zaman Azərbaycan həqiqətlərinin dünyaya çatdırılmasında, beynəlxalq təşkilatlarda ölkəmizin haqq işinin müdafiə olunmasında İtaliya ölkəmizin yanında olan dövlət olub” Sahibə Qafarova: “Bu, eyni zamanda, iki dövlət arasında dostluğu möhkəmləndirən və iqtisadi, siyasi, humanitar, eləcə də digər sahələrdəki əməkdaşlığı genişləndirən bir faktordur”
Azərbaycan dövləti apardığı uğurlu daxili və xarici siyasətlə, həyata keçirdiyi irimiqyaslı iqtisadi layihələrlə dünyada özünə böyük nüfuz qazanıb. Bu gün Azərbaycan Pespublikasının Prezidenti İlham Əliyev nüfuzlu bir siyasi xadim kimi beynəlxalq aləmdə sayılıb-seçilən liderdir. Azərbaycan dünya dövlətləri ilə iqtisadi, siyasi, mədəni sahədə sıx əlaqələrə, dostluq münasibətlərinə malikdir. Ölkəmizin dost münasibətdə olduğu ölkələrdən biri də İtaliyadır.
Məlum olduğu kimi, iyulun 18-də Azərbaycan Respublikasının Prezidenti İlham Əliyevin İtaliyanın “Xidmətlərinə görə” böyük lentlə birlikdə Böyük Xaç Kavaleri ordeni və birinci xanım, Azərbaycanın 1-ci vitse-prezidenti Mehriban Əliyevanın “Xidmətlərinə görə” Böyük Xaç Kavaleri ordeni ilə təltif edilməsi haqqında İtaliya Respublikasının Prezidentinin - “Xidmətlərinə görə” ordenin rəhbərinin 2018-ci il iyulun 12-də imzaladığı sərəncamlar elan edilib və mükafatlar təqdim olunub.
“Xidmətlərinə görə” böyük lentlə birlikdə Böyük Xaç Kavaleri ordeni İtaliya Respublikasının ən ali dövlət mükafatı hesab olunur. İtaliyanın “Xidmətlərinə görə” ordeni əhəmiyyətinə görə ikincidir.
Ümumilikdə, ordenin 6 dərəcəsi var: “Xidmətlərinə görə” böyük lentlə birlikdə Böyük Xaç Kavaleri ordeni (cavaliere di gran croce decorato di gran cordone), “Xidmətlərinə görə” Böyük Xaç Kavaleri ordeni (cavaliere di gran croce), Böyük zabit (grande ufficiale), Komandor (commendatore), Zabit (ufficiale), Kavaler (cavaliere).
Ordenin rəhbəri İtaliya Prezidentidir. O, ordenin kansleridir və daha 16 nəfərin daxil olduğu Ordenin Şurasına rəhbərlik edir.
Məlumatlara görə, Böyük Xaç Kavaleri ordeni 1951-ci ildə təsis olunub. Orden iqtisadiyyat, ictimai və humanitar fəaliyyət, xeyriyyəçilik, ədəbiyyat, incəsənət və digər sahələrdə xalq qarşısında mühüm xidmətlərə görə verilir.
İtaliyanın “Xidmətlərinə görə” böyük lentlə birlikdə Böyük Xaç Kavaleri ordeni ilə dövlət və hökumət başçıları, dünya səviyyəli ictimai-siyasi xadimlər təltif olunublar. Onların arasında Çexiyanın birinci prezidenti Vatslav Havel, Almaniyanın keçmiş kansleri Helmut Kol, Böyük Britaniya Kraliçası ll Yelizaveta, Fransanın sabiq prezidentləri Jiskar Desten, Fransua Mitteran və Jak Şirak, Belçikanın sabiq kralı ll Albert, Türkiyənin 11-ci prezidenti Abdullah Gül və digər görkəmli şəxslər var.
Azərbaycan Respublikasının Prezidenti İlham Əliyevin və ölkəmizin 1-ci vitse-prezidenti Mehriban Əliyevanın İtaliyanın “Xidmətlərinə görə” böyük lentlə birlikdə Böyük Xaç Kavaleri ordeni ilə təltif edilməsinə münasibət bildirən millət vəkili Jalə Əliyeva “Bakı-Xəbər”ə açıqlamasında qeyd etdi ki, bu, Azərbaycan və İtaliya arasında hərtərəfli mehriban münasibətlərin simvoludur, təzahürüdür. “Azərbaycanın digər ölkələrlə olduğu kimi, eyni zamanda İtaliya ilə də mehriban dostluq münasibətləri mövcuddur. Bu günlərdə İtaliya Prezidentinin ölkəmizə səfər etməsi, səfər çərçivəsində aparılan danışıqlar, həmçinin, Prezident İlham Əliyevin və ölkəmizin 1-ci vitse-prezidenti Mehriban Əliyevanın “Xidmətlərinə görə” Böyük Xaç Kavaleri ordeni ilə ödülləndirilməsi İtaliyanın ölkəmizə verdiyi dəyər, fərqli hörmətin böyük bir nümunəsidir. Düşünürəm ki, İtaliya və Azərbaycanın qarşılıqlı münasibətləri bu səfərdən sonra daha da yüksələn xətlə davam edəcək. İki dövlət arasında bu münasibətlər iqtisadi, siyasi, mədəni sahələrdə olduğu kimi, həmçinin, parlament sahəsində də davam edir. Azərbaycan və İtaliya parlamentləri arasında dostluq qrupları da uğurlu fəaliyyət göstərir və bu sahədə davamlı işlər görülür. Tez-tez İtaliya parlamentinin dostluq qrupu ölkəmizə gəlir. Onlar hər dəfə ölkəmizə gələndə Azərbaycanın inkişafına heyran qaldıqlarını və hər iki ölkənin tarixi dostluq ənənəsinin mövcud olduğunu həmişə qeyd edirlər. Onu da deyim ki, İtaliya Azərbaycanın müstəqilliyini ilk tanıyan dövlətlərdən biridir. Hər bir zaman Azərbaycan həqiqətlərinin dünyaya çatdırılmasında, beynəlxalq təşkilatlarda ölkəmizin haqq işinin müdafiə olunmasında İtaliya ölkəmizin yanında olan dövlət olub. Bir daha vurğulayım ki, İtaliya Prezidentinin iyulun 18-də atdığı addım, İtaliya dövlətinin ən yüksək mükafatı ilə ölkə başçımızın və 1-ci vitse-prezidentimizin təltif edilməsi Azərbaycanın dünyada artan nüfuzuna, tanınan və qiymətləndirilən inkişafına verilən böyük qiymətin göstəricisidir. Əlbəttə ki, buna görə hər bir azərbaycanlı qürur hissi keçirir” - deyə J.Əliyeva bildirdi.
Millət vəkili Sahibə Qafarova da bizimlə söhbətində bildirdi ki, Azərbaycan Respublikasının Prezidenti İlham Əliyevin və ölkəmizin Birinci vitse-prezidenti Mehriban Əliyevanın İtaliya dövlətinin ən yüksək mükafatı ilə təltif edilməsi Azərbaycan və İtaliya arasındakı dostluğun, ikitərəfli əməkdaşlığın bariz nümunəsidir: “Hesab edirəm ki, İtaliya Prezidentinin imzaladığı sərəncamla belə bir yüksək ödülün Azərbaycan Prezidenti İlham Əliyevə və ölkəmizin Birinci vitse-Prezidenti Mehriban Əliyevaya təqdim edilməsi iki dövlət arasındakı xoş, səmimi münasibətlərin göstəricisidir. Bu xəbəri eşidəndə çox yüksək qürur hissi keçirdim. Gerçəklik bundan ibarətdir ki, ölkə başçısı İlham Əliyev və Mehriban Əliyeva dövlətimizi, xalqımızı böyük uğurla dünyada tanıdır. Azərbaycan günü-gündən inkişaf edir. Sirr deyil ki, Azərbaycan dövləti bütün göstəricilərinə görə nəinki Cənubi Qafqazda, hətta bütün dünyada lider dövlət imici qazanıb. Azərbaycan Respublikasının Prezidenti İlham Əliyevin İtaliyanın “Xidmətlərinə görə” böyük lentlə birlikdə Böyük Xaç Kavaleri ordeni və birinci xanım, Azərbaycanın 1-ci vitse-prezidenti Mehriban Əliyevanın “Xidmətlərinə görə” Böyük Xaç Kavaleri ordeni ilə təltif edilməsi İtaliyanın Azərbaycana verdiyi böyük dəyərdir. Bu, eyni zamanda, iki dövlət arasındakı dostluğu möhkəmləndirən və iqtisadi, siyasi, humanitar, eləcə də digər sahələrdəki əməkdaşlığı genişləndirən bir faktordur”.
İradə SARIYEVA
