Ramil Hüseynov: “O da indiki şəraitdə və yaxın perspektivdə real görünmür”
Ermənistan baş nazirinin mətbuat katibi Arman Eqoyan mətbuata açıqlamasında bildirib ki, Ermənistan Avropa İttifaqından xeyli miqdarda yardım gözləyir və bu məqsədlə hazırda müvafiq proqramlar hazırlanır.
Qloballaşma və Regional Əməkdaşlıq Analitik Mərkəzinin rəhbəri Stepan Qriqoryan isə bildirib ki, Avropa İttifaqı Ermənistan üçün “Marşal planı” hazırlayır. Onun sözlərinə görə, Ermənistan hökuməti 1 milyard avro məbləğində proqram təqdim edəcək.
Analitik Stepan Safaryan isə hesab edir ki, İrəvan geosiyasi düzəlişlərə hazır olduğunu göstərərsə, Avropa İttifaqı Ermənistanla sözügedən məsələ ilə bağlı görüşə bilər. Digər tərəfdən, Ermənistan həm də ABŞ-dan sərmayə və yardım cəlb etməyə çalışır. ABŞ-ın Ermənistandakı səfiri Ricard Millsinin sözlərinə görə, Ermənistanda yeni böyük Amerika investisiyaları barədə danışmaq hələ çox erkəndir. Onun sözlərinə görə, ABŞ biznes icmasının Ermənistana sərmayə qoyması üçün ölkədə korrupsiyaya qarşı mübarizə aparılmalıdır: “Amerikanın potensial investorları hökumətin həm ABŞ, həm də yerli şirkətlərlə bağlı problemləri necə həll etdiyini görmək istəyirlər. Vergi prosedurlarını araşdırarkən ədalətli bir razılaşma təmin edilməsini istəyirlər”.
USAID-ın Ermənistan ofisinin rəhbəri Deborah Griser bildirib ki, Ermənistana yardımın artırılması ətrafında müzakirələr aparılır: “Erməni hökumətinin bəzi rəhbərləri hazırda ABŞ-ın paytaxtındadır və bu mövzuda müzakirələr aparacaqlarını düşünürəm. Hesab edirəm ki, bu, Vaşinqtondan elan ediləcək. Ona görə də bu dəfə şərh verməyəcəyəm”.
Görünən odur ki, Ermənistandakı yeni hökumət Qərbdən vəsait cəlb etmək üçün intensiv danışıqlar aparır. Qeyd edək ki, bir müddət əvvəl Ermənistandakı hökumət təmsilçiləri Dünya Bankı və Beynəlxalq Valyuta Fondu ilə qapalı danışıqlar aparmışdılar. Bütün bunların fonunda, Aİ-nin Ermənistan üçün “Marşal planı” hazırlayıb 1 milyard avro məbləğində yardım göstərməsi nə dərəcədə realdır?
Məsələyə münasibət bildirən VİP-in sədr müavini Ramil Hüseynovun sözlərinə görə, Aİ-nin Ermənistana böyük məbləğdə yardım göstərəcəyi o qədər də real görünmür. O bunu bir sıra faktorlarla əlaqələndirdi: “Məsələ ondadır ki, “məxməri inqilab” dalğasında hakimiyyətə gələn Nikol Paşinyan Aİ və ABŞ-dan maliyyə vəsaiti cəlb etmək üçün səylərini artırıb. Paşinyan düşünür ki, yalnız bu halda bərbad vəziyyətdə olan ölkə iqtisadiyyatına müəyyən müsbət impuls vermək olar. Ancaq bunun üçün gərək Ermənistanda siyasi-iqtisadi və sosial zəmin olsun. Mövcud Ermənistan Rusiyanın forpostudur. Ölkədə iqtisadi müstəqillikdən danışmaq hələ ki, gülüncdür. Ona görə ki, ölkənin az-çox aparıcı iqtisadi sahələri Rusiyanın əlindədir. Eyni zamanda, parlament seçkiləri keçirilməyib. Reallıqda Ermənistanda hakimiyyət bir klanın əlindən digər klanın əlinə keçib. Paşinyan hökumətinin nə dərəcədə ölkədə geniş, sistemli islahatlar aparacağı və yaxud da apara biləcəyi sual altındadır. Şəxsən mən Ermənistandakı yeni hakimiyyətin bir zamanlar Mixeil Saakaşvilinin Gürcüstanda apardığı böyük islahatları öz ölkəsində aparacağına şübhə edirəm. Aİ o halda Ermənistana böyük həcmdə yardım edə bilər ki, bu ölkə Rusiyanın təsirindən çıxıb böyük islahatlara getsin. O da indiki şəraitdə və yaxın perspektivdə real görünmür. Çünki Ermənistan elə qəfəsə salınıb ki, oradan çıxması hələ mümkün görünmür. İslahat olmadan Aİ-nin böyük həcmdə yardım paketi ilə çıxış etməsi mümkün deyil. Ortada Ukrayna nümunəsi var. Ukraynada islahatlar yubandığı üçün yardımlar gecikir”.
Onu da əlavə edək ki, Ermənistan təcavüzkar olduğu üçün AB-nin milyardlarla dəstəyinin Azərbaycan əleyhinə təcavüzün yeni mərhələlərinin maliyyələşməsinə sərf olunacağı da çox realdır.
Vidadi ORDAHALLI
