Yeganə Hacıyeva: “Azərbaycan hazırda elə layihələri ərsəyə gətirir ki, bizim Avropa ilə sıx əməkdaşlığımızın olması tarixin zəruri tələbinə çevrilir”
İyulun 18-də sənədlərin imzalanması mərasimindən sonra Azərbaycan Prezidenti İlham Əliyev və İtaliya Prezidenti Sercio Matarella mətbuata bəyanatlarla çıxış ediblər.
İlham Əliyev bildirib ki, bu, İtaliya Prezidentinin Azərbaycana ilk səfəridir: “Bu səfər tarixi bir səfərdir. İlk dəfədir ki, İtaliya Prezidenti Azərbaycana səfər edir. Mənim dəvətimi qəbul etdiyiniz üçün Sizə minnətdaram. Əminəm ki, səfər çox uğurlu keçəcək və İtaliya-Azərbaycan əlaqələri bundan sonra da uğurla inkişaf edəcək. Bizim əlaqələrimiz çoxşaxəlidir, bir çox sahələri əhatə edir. Apardığımız danışıqlarda, keçirdiyimiz görüşlərdə bir çox məsələlər müzakirə edildi. Regional inkişaf və regional təhlükəsizlik məsələləri, Avropa İttifaqı-Azərbaycan əlaqələri, siyasi, iqtisadi ikitərəfli əlaqələrimiz – bir çox məsələlər müzakirə edildi və deyə bilərəm ki, bütün məsələlərlə bağlı bizim fikirlərimiz üst-üstə düşür”.
İlham Əliyev müzakirə olunan məsələlər sırasında regional inkişaf və regional təhlükəsizlik məsələlərini xüsusi olaraq qeyd edib. Bu istiqamətdə nə kimi perspektivlər ola bilər?
Politoloq Yeganə Hacıyeva qəzetimizə bildirdi ki, regional inkişaf və regional təhlükəsizlik bir-birinə sıx bağlı olan məsələlərdir: “Bilirsiniz ki, İtaliya eyni zamanda Avropa İttifaqına aid bir ölkədir. Azərbaycan Avropa İttifaqının enerji təhlükəsizliyində mühüm rol alan ölkədir. Biz Avropanın Cənubi Qafqaz regionunda sabit və etibarlı tərəfdaşıyıq. Bu strateji xətt üzrə Avropa İttifaqı-Azərbaycan əməkdaşlığının mövcud mexanizmləri çərçivəsində danışıqlar davam edir. Qeyd edim ki, Avropa İttifaqı ilə Azərbaycan arasında üzərində işlənən yeni saziş tərəflərdən maksimum diqqət və məsuliyyət tələb edən bir prosesdir. Ölkəmiz Avropa İttifaqı ilə bütün istiqamətlər üzrə əməkdaşlıq edir. Bu da müxtəlif komitələrin daxilində davam etdirilir. Həmin komitələrin ən başlıca vəzifəsi Avropa İttifaqının standartlarını qorumaqdan ibarətdir. Avropa İttifaqının Azərbaycanla bağlı əsas tövsiyələri ticarətlə bağlı standartlara riayət olunması istəyindən irəli gəlir. Bu başlıca tələbdir. Ancaq demokratiya, təhlükəsizlik, mübadilə və əlbəttə, enerji sahəsində də tövsiyələr var. Yaxın dövrdə Azərbaycanla Avropa İttifaqı arasında əməkdaşlıq planı tam hazır olacaq. Çünki işlərin gedişi belə optimist olmaq üçün əsas verir. Azərbaycan hazırda elə layihələri ərsəyə gətirir ki, bizim Avropa ilə sıx əməkdaşlığımızın olması tarixin zəruri tələbinə çevrilir. Düşünürəm ki, həmin əməkdaşlıq planı üzrə münasibətlərin tam qurulması hər iki tərəf üçün məqbul sayılacaq. İtaliya Prezidenti ilə də müzakirələr məhz bu istiqamətdə aparılıb. Çünki İtaliya Avropanın ayrılmaz bir paçasıdır. Avropa İttifaqına daxil olmaqla yanaşı, həm də ATƏT-ə sədrlik edir. Bu baxımdan da düşünürəm ki, regional təhlükəsizlik və inkişafla bağlı aparılan müzakirələrin hər iki tərəfə xeyri var. Bundan ciddi nəticələr gözləməyə dəyər”.
Məhəmmədəli QƏRİBLİ
