Yeganə Hacıyeva: “Paşinyanın Brüssel səfərindən məyus qayıtması bir daha göstərdi ki..”
Prezident İlham Əliyevin iyulun 11-də Brüsselə səfəri çərçivəsində Avropa İttifaqı, eyni zamanda, NATO-nun rəhbərləri ilə işgüzar görüşlərində əldə edilən uğurlu nəticələri Azərbaycan dövlətinin yeni Avropa zəfəri də hesab etmək olar. Çünki ölkəmizin başçısının keçirdiyi bu görüşlərdə və imzalanan yeni tərəfdaşlıq sənədlərində həmin nüfuzlu beynəlxalq təşkilatlar Ermənistanın əsassız Dağlıq Qarabağ iddialarının Avropanın özü üçün də təhlükə mənbəyi olduğunu bildirdilər. Burada Azərbaycanın Avropa üçün Ermənistandan nə qədər vacib və əhəmiyyətli ölkə olduğu özünü bir daha göstərdi. Ermənistan ictimai rəyində belə bir fikir formalaşdırılmağa başlandı ki, həmin ölkədə baş verən “məxməri inqlab” Avropanın yanında İrəvanın rolunu daha da artırmış olacaq. Amma Avropada keçirilən son zirvə görüşləri bir daha göstərdi ki, Avropa Birliyi Azərbaycana Ermənistandan daha üstün faydalı tərəfdaş kimi baxır. Münaqişədə olan bu iki ölkəyə Avropanın fərqli yanaşmasının kökündə hansı amillər durur?
Politoloq Yeganə Hacıyevanın sözlərinə görə, son görüşlərdə NATO və Avropa İttifaqı hər iki ölkənin qlobal siyasətdəki yeri və nüfuzu barədə real nəticələrə gəldilər:”Nəticə isə belədir ki, Avropa Birliyində bu gün Azərbaycan və Ermənistan barədə tam fərqli rəy mövcuddur. Belə ki, Brüssel görüşlərində Avropanın Azərbaycan Prezidenti ilə bu qitənin enerji təminatı, regionda böyük neft-qaz layihələrinin icrası, Əfqanıstanın bərpası, Çindən Londona ən səmərəli kommunikasiyalara nail olmaq yolları kimi qlobal məsələlər müzakirə edildiyi halda, bu gün tam təcrid edilmiş və özünü hamıya qarşı qoymuş yoxsul Ermənistanın Brüsselə hansı cəhətdən maraqlı ola biləcəyi isə hələ də qeyri-müəyyən olaraq qalır.
Əslində, Brüsseldə qarşılıqlı iqtisadi inkişaf, ölkələrin bir-biri ilə strateji tərəfdaşlığı müzakirə olunduğu halda, iqtisadi iflasın astanasında olan Ermənistan rəhbərliyinin ora əliboş gedib əliboş da qayıdacağı əvvəlcədən məlum idi. Daha doğrusu, Brüssel rəsmiləri qlobal və regional xarakterli iqtisadi-siyasi məsələlər barədə Prezident İlham Əliyevdən faydalı fikirlər eşidəcəklərinə əmin olduqları halda, Ermənistan rəhbərlərinin özgə torpaqlarını qəsb etməkdə yardım istəməkdən bezdiklərini açıq-aşkar bəyan edirdilər. Prezident İlham Əliyevin Brüsselə səfəri zamanı Azərbaycanla Avropa İttifaqı arasında imzalanan “Tərəfdaşlıq prioritetləri” sənədi tərəfdaşlıq əlaqələrinin gələcək inkişafı istiqamətində mühüm əhəmiyyətə malikdir. Sənəddə Avropa İttifaqı ölkələrin ərazi bütövlüyü, müstəqilliyi və suverenliyi, dövlətlərin beynəlxalq sərhədlərinin toxunulmazlığı prinsipinin dəstəklənməsi ölkəmizin uğuru kimi qiymətləndirilə bilər. Azərbaycanla Aİ arasında əlaqələrin genişlənməsi ölkəmizlə yanaşı Avropa ölkələri üçün də mühüm əhəmiyyət kəsb edir. Azərbaycanın təşəbbüsü ilə reallaşan layihələr nəticəsində mühüm üstünlüklərə malik olan ölkəmizlə əməkdaşlıq Avropa ölkələri üçün həm siyasi, həm də iqtisadi dividendlər vəd edir. Bu nəticələr, Azərbaycandan fərqli olaraq, Ermənistan üçün gözlənilən olmadı. Buna səbəb düşmən ölkənin Baş naziri Nikol Paşinyanın anlaşılmayan siyasət yürütməsidir. Azərbaycan konkret olaraq NATO və Aİ ilə əməkdaşlıq edir. Paşinyan hələ hakimiyyətə gəlməzdən öncə meydanlarda Qərbə üz tutacağını, Rusiyadan imtina edəcəyini bildirirdi. Sonradan o, Soçidə Rusiya prezidenti ilə görüşdü və bundan sonra yenə də Avropa, Qərblə münasibətlərin yaxınlaşdırılacağını bildirdi. Paşinyanın Brüssel səfərindən məyus qayıtması bir daha göstərdi ki, onun yürütdüyü siyasət Avropa İttifaqı tərəfindən də dəstəklənmir”.
Məhəmmədəli QƏRİBLİ
