Ermənistanda baş verən son olaylar bu ölkədə vətəndaş qarşıdurması ehtimalının artdığını, hətta baş verənlərin silahlı qarşıdurmaya qədər gedib çıxa biələcəyini istisna etmir. Buna əsas səbəb Nikol Paşinyan iqtidarının əvvəlki rejimə qarşı daha sərt kampaniyaya başlaması, xüsusən də silahlı qüvvələrdə təmsil olunmuş şəxslərə qarşı fəaliyyətini genişləndirməsidir.
Erməni mediası yazır ki, bu şəraitdə Paşinyana əsas təhlükə elə erməni ordusundan gəlir. Məsələ burasındadır ki, Paşinyan ordu rəhbərliyinə yaxın saydığı adamlarını gətirsə də, zabit-general heyətinin böyük əksəriyyəti ondan narazıdır. Elə bu səbəbdən fikirlər səslənir ki, vəziyyət indiki şəkildə davam edərsə, ordu Paşinyanı dəyişə bilər.
İndilikdə isə Paşinyan Sarkisyan dönəmində yüksək vəzifə tutmuş bir çox hərbçiləri sıxışdırmaqda davam edir. Bunlardan biri də müdafiə nazirinin keçmiş müavini Artur Aqabekyandır. Bu arada məlum olub ki, Ermənistan hüquq-mühafizə orqanları Artur Aqabekyanın ata evində axtarış aparıblar. Aqabekyanın sözlərinə görə, axtarışda əsas məqsəd onun Manvel Qriqoryanla bağlılığını sübut edən dəlillər aşkarlamaq olub: “Onlar hesab edirlər ki, guya mən aprel müharibəsi zamanı orduya göndərilən yardımların bir hissəsini mənimsəmişəm, digər hissəsini isə Qriqoryana vermişəm. Qriqoryanla bu tarixdə iki dəfə görüşüm olub. Bu da “Qarabağ prezidenti”nin rəsmi qəbulu zamanı gerçəkləşib. Mən yardımların bölüşdürülməsində iştirak etməmişəm, sadəcə, onun bölünməsi üçün məsləhətlər vermişəm. Respublikanı biabır etməyin”. Artur Aqabekyan Ermənistan xüsusi xidmət orqanlarının davranışını kəskin tənqid edərək, özünə qarşı irəli sürülən ittihamların yalan olduğunu deyib. Qeyd edib ki, məhkəmənin qərarı ilə onun Meç Taxer kəndindəki ata evi ilə yanaşı, həmçinin sahibi olduğu “Metakskombinat” QSC-yə məxsus 11 hüquq şirkətində axtarış aparılıb. Artur Aqabekyan bir daha bildirib ki, 2015-ci ilin mayından etibarən, ümumiyyətlə, Qriqoryanla ünsiyyətdə olmayıb. Aprel döyüşlərində isə cəmi 2 dəfə onunla görüşüb. İttihamlardan yaxa qurtarmaq üçün Aqabekyan hətta ordu üçün ayrılan yardımların paylanılması üzrə komissiyanın tərkibində olmadığını vurğulayıb. Qeyd edək ki, Ermənistanın sabiq müdafiə nazirinin müavini, parlamentin deputatı, “Yerkrapa” Müharibə Könüllüləri İttifaqının sədri, Füzuli və Cəbrayıl rayonlarının işğalını gerçəkləşdirən 5-ci briqadanın keçmiş komandiri, general Manvel Qriqoryan həbs edilib. Ona qarşı qanunsuz silah və hərbi sursat əldə edilməsi və saxlanması, həmçinin 2016-cı ilin aprel döyüşlərdə yaralanan erməni hərbçilərinə ayrılan humanitar yardımın mənimsənilməsi üzrə cinayət işi açılıb. Nikol Paşinyan isə bəyan edib ki, Manvel Qriqoryan erməni məktəblilərinin əsgərlər üçün topladığı ərzağı ələ keçirib və onu öz heyvanlarına, ayı və pələnglərinə yedirdib. Qriqoryan ordu üçün nəzərdə tutulan texniki vasitələri, o cümlədən hərbi maşınları da ələ keçirməkdə ittiham olunur. Xatırladaq ki, son 2 ayda Ermənistan ordusu və Müdafiə Nazirliyindəki qalmaqallı korrupsiya işləri üzrə çoxsaylı cinayət işləri açılıb, bir sıra indiki və sabiq vəzifəli şəxslər istintaqa cəlb edilib. Bu arada Ermənistanın Milli Təhlükəsizlik Xidməti bir sira vətəndaşların, o cümlədən dövlət məmurlarının, həkimlərin və hərbi komissarlıqların cəlb olunduğu böyük korrupsiya sxeminin üstünü açıb. Bildirilir ki, həkimlər və hərbi komissarlığın işçiləri aldıqları böyük məbləğdə rüşvət müqabilində saxta tibbi sənədlər düzəltmək yolu ilə orduda xidmətə çağırılan 40-dan çox Ermənistan vətəndaşını məcburi hərbi xidmətdən azad edib. Bu korrupsiya sxemində baş rolu isə həkim Aramais Sanosyan oynayıb.
İlkin sübutlara əsasən, orduda xidmətdən yayınmağa hərbçilərin özləri də “kömək” edib. Kolya Kosakyan adlı ehtiyatda olan hərbi qulluqçu tibbi dairələrdəki əlaqələrindən istifadə edərək bir qrup vətəndaşla sövdələşməyə girib. O, 14 min ABŞ dolları qarşılığında hərbi xidmətə çağırılanların mülki xəstəxanalara göndərişini təşkil edib. Həmin xəstəxanalarda isə hərbi xidmətə çağırılanlara saxta diaqnoz qoyulub ki, nəticədə onların orduda xidməti təxirə salınıb, yaxud hərbi xidmətdən ümumiyyətlə azad olunublar. Bu cür irimiqyaslı və böyük korrupsiya şəbəkəsində keçmiş və hazırkı hərbi komissarlıqların əməkdaşları da iştirak edib. Əldə edilən sübutlar əsasında Kole Kosakyan, Qarik Arakelyan və Aramais Sanosyana qarşı cinayət işi açılıb. Ermənistan MTX ifşa olunan korrupsiya sxeminin bütün iştirakçılarının, şəbəkə ilə əlaqəsi olan vəzifəli şəxslərin aşkarlanması üçün ciddi istintaqa başlayıb. Bütün bunlar orduda bir çox zabit heyəti arasında ciddi etiraz yaradıb. Məsələ ilə bağlı fikirlər səslənir ki, belə vəziyyətdə ordunun Paşinyana qarşı hərəkətə keçməsi istisna deyil. Təbii ki, bu məsələdə Serj Sarksiyan iqtidarının üzvü olmuş şəxslər də narazılara yardım etməyə hazırdır. Çünki onlara qarşı da təzyiqlər davam edir. Elə bu arada məlum olub ki, Serj Sarkiyanın qardaşı oğlu Narek Sarkisyan adam oğurluğunda və insanlara işgəncə verməkdə ittiham olunur. Ermənistan polisinin mətbuat xidmətinin məlumatına görə, hadisə 2017-ci ilin avqustunda baş verib. Hadisənin qurbanı isə paytaxt İrəvanda xarici turistlər üçün gecə klubu açmaq istəyən 49 yaşlı kişi olub: “2017-ci il avqustun ortalarında Narek Sarkisyanın mühafizə rəisi Artyom Poqosyan həmin şəxsi söhbət etməyə çağırıb. Lakin yol kəsişmələrindən birində sahibkar oğurlanıb və güc tətbiq edilməklə Narek Sarkisyana məxsus evə aparılaraq, zirzəmiyə salınıb. Sarkisyan onu tapançayla hədələyib, qaz avadanlığı ilə yanıq xəsarətləri yetirib. Sonra kişini yük maşınlarının servis mərkəzinə gətirərək yenidən döyüblər və yalnız klub biznesilə məşğul olmayacağı barədə söz verəndən sonra buraxıblar”. Cinayət axtarışı üzrə baş idarə hazırlanmış materialları Baş prokurorluğa göndərib. Daha əvvəl Narek Sarkisyan silah və narkotiklərin saxlanması, həmçinin dələduzluqda ittiham edilərək axtarışa verilib. Bütün bunlar Serj Sarkisyanın özünün də narazılığına səbəb olmaqdadır. Amma indilikdə o, baş verənlərə qarşı açıq fəaliyyətə keçə bilmir. Amma Paşinyana qarşı hərəkətə keçən istənilən qüvvəyə də dəstək verməyə hazırdır.
Nahid SALAYEV
