Aqşin Əliyev: “Belə bir səfərin reallaşması ölkələrimiz arasında münasibətlərin daha da inkişaf etməsinə müsbət təsir göstərə bilər”
NATO-nun Brüsseldə keçirilən zirvə toplantısı çərçivəsində xarici işlər naziri Elmar Məmmədyarov və müdafiə naziri Zakir Həsənov Amerika Birləşmiş Ştatlarının dövlət katibi Mayk Pompeo və müdafiə naziri Ceyms Mattis ilə görüşüblər.
Görüşdə ABŞ dövlət katibinin Avropa və Avrasiya məsələləri üzrə köməkçisi Uess Mitçel, Milli Təhlükəsizlik Şurasında baş direktor Fiona Hill, Azərbaycan Respublikasının ABŞ-dakı səfiri Elin Süleymanov və NATO yanında nümayəndəliyinin başçısı vəzifəsini icra edən Qaya Məmmədov iştirak ediblər.
Tərəflər Azərbaycan və ABŞ arasında tərəfdaşlığın səviyyəsindən məmnunluq ifadə ediblər. Nazir Elmar Məmmədyarov NATO-nun Brüssel sammitinin yekun kommünikesində Azərbaycanın ərazi bütövlüyü və suverenliyinə təkrar ifadə olunan dəstəyin vacibliyini diqqətə çatdırıb. Söhbət əsnasında regional məsələlərə dair fikir mübadiləsi aparılıb və ABŞ tərəfi NATO-nun Əfqanıstanda Qətiyyətli Dəstək missiyasına və terrorizmə qarşı mübarizədə göstərdiyi dəstəyə görə Azərbaycana təşəkkür edib.
Xarici işlər naziri Elmar Məmmədyarov və müdafiə naziri Zakir Həsənov ABŞ-dan olan həmkarlarını Azərbaycana səfərə dəvət ediblər və onlar dəvəti məmnuniyyətlə qəbul ediblər.
Göründüyü kimi, ABŞ-ın iki yüksək çinli dövlət məmurunun Azərbaycana səfər etməkdə maraqlı olduğu üzə çıxıb. Xatırladaq ki, NATO sammitindən sonrakı günlərdə ABŞ mediası özü də bu mövzuya toxunub. Onların Azərbaycana olan səfər marağını edilən dəvətlə yanaşı, başqa hansı amillərlə izah etmək olar?
Ekspert Aqşin Əliyevin sözlərinə görə, bunun kökündə Azərbaycanla ABŞ arasında olan yaxın və səmimi münasibətlər durur: “Bilirsiniz ki, Azərbaycanla ABŞ arasında münasibətlər yaxın strateji müttəfiqlik səviyyəsindədir. Azərbaycan xarici siyasət kursunda daim balanslı siyasət yürüdüb. ABŞ-ı da bu mövqe tam qane edir. Çünki biz Cənubi Qafqazda Rusiyaya yaxın məkanda olsaq da, müstəqil siyasət yürüdürük və ABŞ-la yaxından əməkdaşlıq edirik. Azərbaycan çox mühüm nəqliyyat dəlizlərinin üzərində yerləşir və bu istiqamətdə meqalayihələrə imza atıb. Bu prinsipiallıq bizi Qərb və ABŞ üçün daha da cazibədar edir. Biz eyni zamanda ABŞ-ın təşəbbüskarı olduğu antiterror layihəsində yaxından iştirak edirik. Əlavə olaraq qeyd etmək lazımdır ki, Tramp administrasiyası ölkəmizlə daha da yaxından əməkdaşlıq etməyə maraq göstərir. Təsadüfi deyil ki, son bir neçə ay ərzində Tramp tərəfindən İlham Əliyevin ünvanına 3 məktub göndərilib. Məhz bunun nəticəsidir ki, İlham Əliyev rəsmən bəyan etdi ki, Azərbaycan-ABŞ münasibətləri tam yeni mərhələyə qədəm qoyub. Düşünürəm ki, bütün bu amillər ABŞ-ın yüksək vəzifəli şəxslərinin diqqətini Bakıya cəmləyir. Buna görə də onlar Bakıya şəxsən səfər edib, yaxından fikir mübadiləsi aparmaq istəyirlər. Belə bir səfərin reallaşması ölkələrimiz arasında münasibətlərin daha da inkişaf etməsinə müsbət təsir göstərə bilər”.
Məhəmmədəli QƏRİBLİ
