Ramil Hüseynov: “O cümlədən, erməni əsilli bloger Vlad Maqaya qarşı da analoji addımlar atılmalıdır”
Məlum olduğu kimi, Azərbaycanın icazəsi olmadan Dağlıq Qarabağa xarici ölkə vətəndaşlarının səfər etməsi qadağandır. Ancaq çox təəssüflər olsun ki, bəzi xarici ölkə vətəndaşları buna məhəl qoymurlar. Nəticədə Azərbaycan onlara qarşı qanunamüvafiq tədbirlər görür.
Bir neçə gün əvvəl erməni əsilli Belarus blogeri Vlad Maqa (Vladislav Mosesov) Azərbaycana səfəri barədə süjet yayımlayıb. Onun videosüjetini digər bloger – işğal altında olan Qarabağa səfər etmiş və buna görə həbs edilmiş Aleksandr Lapşin yayıb. Belə ki, Belarus vətəndaşlığından istifadə edib Azərbaycana səfər edən bloger Vlad Maqa Azərbaycan barədə çəkdiyi videosüjetdə qərəzli olaraq ölkə haqqında mənfi rəy yaratmağa çalışıb. Bu azmış kimi, sonradan Ermənistan vasitəsilə qanunsuz olaraq işğal olunmuş Dağlıq Qarabağa səfər edib. Dağlıq Qarabağdakı terrorçu rejimin və Ermənistan ordusunun səngərlərini, mövqelərini çəkən Maqa özündən razı şəkildə deyir: “Artıq buradayam. Bura Dağlıq Qarabağdır”.
Bu arada Vlad Maqaya qahmar çıxan Ermənistan XİN-in mətbuat katibi Tiqran Balayan erməni mətbuatına verdiyi açıqlamada iddia edib ki, guya Vlad Maqanın Azərbaycana səfərindən sonra həyatı təhlükədədir, Azərbaycandan onu hədələyirlər: “Ermənistan XİN erməni əsilli belaruslu blogerlə əlaqə saxlayaraq, onun nə dərəcədə təhlükədə olduğunu dəyərləndirəcək və lazımi köməklik göstərəcək. Hazırda ona qarşı təhdidləri nəzərə alaraq, təhlükə səviyyəsini qiymətləndirmək üçün addımlar atılır. Əlbəttə ki, yardımın göstərilməsi mümkündür”.
Aydın məsələdir ki, Ermənistan XİN rəsmisinin dedikləri cəfəngiyyatdır. O bununla məsələni başqa istiqamətə yönəltmək istəyir.
Sözügedən məsələni dəyərləndirən VİP-in sədr müavini Ramil Hüseynovun sözlərinə görə, Ermənistanın nə deməsindən asılı olmayaraq, Azərbaycan sözügedən blogerə qarşı müvafiq hüquqi addımlar atmalıdır: “Necə ki, Lapşinə qarşı müvafiq addımlar atıldı və bunun nəticəsi oldu. O cümlədən, erməni əsilli bloger Vlad Maqaya qarşı da analoji addımlar atılmalıdır. Çünki o qanunsuz olaraq işğal olunmuş ərazilərə səfər edib. O, Lapşinlə bağlı atılan hüquqi addımlardan nəticə çıxarmalı idi. Nəticə çıxarmayıbsa, deməli, bu addımı bilərəkdən və məqsədyönlü şəkildə atıb. Qəribəsi odur ki, Lapşin kimi Vladislav Mosesov da Belarus vətəndaşıdır. Sanki erməni dairələri bununla Azərbaycanla Belarus arasında münasibətləri pozmaq istəyirlər. Ancaq nə etsələr də, buna nail ola bilməyəcəklər. Çünki iki ölkə arasında çox yaxşı münasibətlər var. Belarus prezidentinin siyasi iradəsi Lapşinin ekstradisiya olunmasında mühüm rol oynadı. O baxımdan biz bütün cəbhələrdə ermənilərlə mübarizəni gücləndirməliyik. İstər diplomatik, istərsə də digər müstəvilərdə mübarizə davam etdirilməlidir. İşğal altında olan ərazilərə qanunsuz səfər edən istənilən şəxs barəsində hüquqi addımlar atılmalıdır. Bu məsələdə kiməsə güzəşt ola bilməz”.
Vidadi ORDAHALLI
