Seyid Camal Əzimbəyli: “Müasir Azərbaycan gəncliyi Gəncədə baş verən iğtişaşları dəstəkləmədi”
Məlum olduğu kimi, Gəncədə baş verən hadisələr cəmiyyətimizin hiddətinə səbəb oldu. Azərbaycanın dinamik inkişafını, tərəqqisini gözü götürməyən qüvvələr terror törətməklə ölkədə çaşqınlıq yaratmağa çalışdılar. Lakin anlamalıdırlar ki, Azərbaycan xalqı dövlətinin arxasında dayanıb.
O baxımdan heç bir qara qüvvə ölkədə mövcud olan sabitliyə, əminamanlığa xələl gətirə bilməz. Bu hadisələr bəzi daxili və xarici qüvvələr tərəfindən sabitliyi, ictimai asayişi pozmağa, xaos yaratmağa yönələn təxribat, ermənipərəst mərkəzlərin əvvəlcədən planlaşdırdıqları terror idi. Ancaq Azərbaycanda mövcud olan dövlət-xalq birliyi buna imkan vermədi.
Hər bir Azərbaycan vətəndaşı, vətənini, millətini sevən hər bir şəxs qarşıdurma yaratmaq istəyənlərə qarşı sıx birləşdi və buna qarşı öz sözünü dedi. Ən ağrılı hal odur ki, bunu edənlər qara qüvvələrin təsiri altına düşən bəzi gənclərdir. Bu gənclər bilməlidirlər ki, onların təhlükəsizliyinin və asayişinin qorunmasını canı bahasına təmin edən hüquq-mühafizə orqanlarıdır. Çox təəssüf ki, bu hadisələrin din pərdəsi altında həyata keçirilməsinə cəhdlər edildi. Azərbaycan əsrlər boyu dinlərarası münasibətlərin inkişafında özünəməxsus rol oynayıb. İctimai-siyasi quruluşlardan asılı olmayaraq, bütün dövrlərdə Azərbaycanda dini və milli dözümlülük, tolerantlıq yüksək səviyyədə müşahidə edilib. Bu isə xalqımızın geniş dünyagörüşünə, zəngin mənəviyyata, humanist mövqeyə, yüksək əxlaqa malik olduğunu göstərir.
Bütün bunların fonunda, diqqətçəkən məqamlardan biri ondan ibarətdir ki, Gəncədə baş verən iğtişaşlara qarşı ölkənin bütün təbəqələri ilə yanaşı, gənclər də öz sözünü dedi. Yəni digər vətəndaşlar kimi, gənclər də bu iğtişaşlara qarşı oldular. Bütün mənalarda iğtişaşı hansısa formada dəstəkləmədilər, əksinə, bunu pislədilər. Necə deyərlər, məlum iğtişaşlara qarşı çıxaraq həmrəylik göstərdilər.
Bütövlükdə, bu nəyin göstəricisidir?
Məsələyə münasibət bildirən şərqşünas Seyid Camal Əzimbəylinin sözlərinə görə, gənclərin Gəncədə baş verən iğtişaşlara qarşı olması onların yetkinliyindən, dövlətin yanında olmalarından irəli gəlir: “Məsələ ondadır ki, Azərbaycan gəncləri kifayət qədər yetkin və təhsillidirlər. Onlar ağı qaradan seçir və hansısa xarici təsirlərin altına düşmürlər. Azərbaycanda dövlətə, dövlətçiliyə sadiq gənc nəsil formalaşıb. O baxımdan müasir Azərbaycan gəncliyi Gəncədə baş verən iğtişaşları dəstəkləmədi. Əksinə, bu iğtişaşları pisləyərək buna qarşı çıxdı və dövlətin yanında oldu. Bəzi gənclərin müəyyən təsir altına düşməsi təbii ki, ümumilikdə, gənclərə aid oluna bilməz. Nəzərə almaq lazımdır ki, son illər ölkədə həyata keçirilən genişmiqyaslı islahatlar gənclərdən də yan ötməyib. Ölkədə ictimai həyatın bütün sahələrində əldə olunan nailiyyətlər dövlət gənclər siyasətindən də yan ötməyib. Prezident İlham Əliyevin fərman və sərəncamları ilə bir sıra sahələr üzrə gənc kadrların məsul dövlət vəzifələrinə təyin olunması, dövlət quruculuğunda gənclərin iştirakına geniş şərait yaradılması, gənc ailələrə kömək göstərilməsi və digər işlər dövlət gənclər siyasətinin əsasını təşkil edir. Son illər ölkədə həyata keçirilən tədbirlər gənclərin hərtərəfli inkişafının təmin olunması üçün siyasi, sosial-iqtisadi, təşkilati-hüquqi şərait və təminatların yaradılmasını sürətləndirib. Həmçinin, onların ictimai-siyasi fəallığının artmasına kömək edib. Bu gün ölkəmizdə gənclər siyasəti dövlət siyasətinin mühüm tərkib hissəsinə çevrilib. Azərbaycan gəncliyi ictimai həyatın bütün sahələrində aktiv fəaliyyəti ilə seçilir, siyasi, iqtisadi, humantiar, sosial tədbirlərin həyata keçirilməsində mühüm rol oynayır. Ona görə də Azərbaycan gəncliyi dövlətin yanında oldu və bu belə də davam edəcək”.
Vidadi ORDAHALLI
