Seyid Camal Əzimbəyli: “Azərbaycan dövlətinin bütövlüyü bizim təhlükəsizliyimiz deməkdir”
İyulun 10-da Gəncədə iki yüksək rütbəli polis zabitinin qətlə yetirilməsi ölkədə ciddi müzakirələrə yol açıb. Cəmiyyətdə ən çox müzakirə mövzusu məhz Gəncə hadisələridir. Siyasi liderlər, ictimai xadimlər, ziyalılar, ictimaiyyətin çoxsaylı nümayəndələri müzakirələrə qatılıb. Görünən odur ki, cəmiyyət sözügedən hadisələri törədənləri qətiyyətlə pisləyir.
Qeyd edək ki, iyulun 10-da, saat 20 radələrində 150-200 nəfərdən ibarət radikal dini yönümlü bir qrup şəxs Gəncə Şəhər İcra Hakimiyyətinin inzibati binasının önündəki meydana toplaşaraq asayişi pozmağa cəhd göstəriblər. Xidməti vəzifələrini yerinə yetirən polis əməkdaşlarının xəbərdarlığına məhəl qoymayan qanunazidd hərəkətlərin iştirakçıları özləri ilə gətirdikləri küt və kəsici-deşici alətlərlə asayiş keşikçilərinə müqavimət göstəriblər. Polis əməkdaşlarının həyata keçirdikləri qətiyyətli tədbirlərlə onların hüquqazidd əməllərinin qarşısı alınmaqla 40 nəfəri tutularaq Gəncə Şəhər Baş Polis İdarəsinə gətirilib, qalanları qaçaraq ərazini tərk ediblər. Görülmüş operativ tədbirlərlə təxminən 30 dəqiqə ərzində şəhərin mərkəzində asayiş tam bərpa edilib. Qanunsuz hərəkətlərin qarşısı alınarkən xidməti vəzifələrini yerinə yetirən iki polis zabiti şəhid olub. Cinayətin bütün iştirakçılarının və təşkilatçılarının müəyyən edilib məsuliyyətə cəlb olunması məqsədilə zəruri istintaq hərəkətləri və əməliyyat-axtarış tədbirləri həyata keçirilir.
Diqqətçəkən məqamlardan biri də ondan ibarətdir ki, iğtişaşların qarşısının alınmasında, cinayətkarların zərərsizləşdirilməsində əhali fəal iştirak edib. Bunu necə xarakterizə etmək olar?
Məsələyə münasibət bildirən şərqşünas Seyid Camal Əzimbəylinin sözlərinə görə, bu, əhalinin Azərbaycan dövlətinin yanında olmasının göstəricisidir: “Ona görə də Gəncə əhalisi sözügedən destruktiv qüvvələrin zərərsizləşdirilməsində fəal rol oynayaraq imkan vermədi ki, həmin qüvvələr öz çirkin niyyətlərinə nail olsunlar. Bu bir daha Gəncə əhalisinin dövlətçiliyə sadiq olmasını sübut etdi. Cəmiyyətin belə situasiyalarda dövlətin yanında olduğunu göstərdi. O üzdən, əhali pozucu qüvvələrin zərərsizləşdirilməsində dövlət qurumlarına öz köməyini əsirgəmədi. Bir məqamı da qeyd edim ki, din, məzhəb təəssübkeşliyi adı ilə edilən çağırışlar nəinki yolverilməzdir, eyni zamanda, dinin gətirdiyi qaydalara, islamın hökmlərinə qarşı həqarətdir. Azərbaycan dünyəvi ölkə olsa da, milli-mənəvi dəyərlərin ən böyük təəssübkeşi məhz Prezident İlham Əliyevdir. Ona görə də bu hadisəni qətiyyətlə pisləyirəm. Azərbaycanı İraq, Suriyaya çevirmək istəyənlərə heç bir halda fürsət verməyəcəyik. Bunun üçün dövlətin güc strukturları çalışır. Azərbaycan dövlətinin bütövlüyü bizim milli təhlükəsizliyimiz deməkdir. Dini müqavimət adı ilə çağırış edənlər bilməlidirlər ki, bu, heç bir halda, sevgili peyğəmbərimizin gətirdiyi dinə yaraşan əməl deyil. Bizlər Azərbaycan dövlətinin yanındayıq. Bizim üzərimizdə minlərlə şəhid qanı var, həmin qanların yuyulması ancaq Qarabağdakı cihaddan keçir. Bunu unudanlar bizdən deyil. Asayişin qorunması uğrunda həlak olan polis qardaşlarımızın hər birini rəhmətlə anıram. Azərbaycanda ictimai-siyasi sabitliyin təmin olunmasında fədakarlıq göstərən bütün vətənsevərlərə başsağlığı verirəm”.
Vidadi ORDAHALLI
