Ermənistanda yeni hakimiyyətin sabiq iqtidar komandasına qarşı addımları burada daha çox adamın həbsi ilə müşayiət olunmaqdadır. Son dövrlərdə isə Serj Sarksiyan və Robert Köçəryana qarşı atılan addımlar tezliklə bu şəxslərin də həbsə atılmasını istsina etmir.
Artıq Serj Sarkisyanın qardaşı, ölkənin xüsusi məsələlər üzrə səfiri Lev Sarkisyan və övladları qanunsuz olaraq 6,8 milyon dolları müvafiq qurumlardan gizlətməkdə şübhəli bilinir. Müvafiq ittiham aktında qeyd olunub ki, Lev Sarkisyan, onun oğlu Narek və qızı Ani cinayət əməlində şübhəli bilinir. Onlara məxsus “C-el-C layihə şirkəti” Səhmdar Cəmiyyətinin ofisində aparılan axtarış nəticəsində müəyyən olunub ki, 2017-ci ilin ikinci yarısında onların adına Ermənistan banklarından biri pul köçürüb. Onlar bu məbləği vergi bəyannaməsində göstərməyib. Hüquq-mühafizə orqanları Lev, Narek və Ani Sarkisyanların şəhərdən çıxışına qadağa qoyub. Onların dilindən paytaxt İrəvanı tərk etməmək barədə iltizam alınıb.
Ermənistanın ikinci prezidenti Robert Köçəryan isə 2008-ci il martın 1-də baş verən hadisələrlə bağlı Xüsusi İstintaq Komitəsinə çağırılıb. Xüsusi İstintaq Xidmətinin yeni rəhbəri Sasun Xaçatryan bu günlərdə bildirib ki, onun təşkilatı 1 mart hadisələrini çözmək üçün siyasi iradəyə malikdir. Bu arada Ermənistanın keçmiş müdafiə naziri Mikael Arutyunyan da 2008-ci il martın 1-də baş vermiş hadisələrlə bağlı ittiham olunur. Onun həbsi barədə vəsatət məhkəməyə göndərilib. Xüsusi İstintaq Xidməti bildirir ki, 2008-ci il 19 fevral prezident seçkilərinə hazırlıq və seçkilərin keçirilməsi zamanı Konstitusiyanın 4-cü maddəsini - xalqın azad seçkilər yolu ilə öz hakimiyyətini formalaşdırmaq hüququnu pozub. Belə ki, seçki prosesində müxtəlif ictimai təşkilatlar və vətəndaşlar tərəfindən prezidentliyə namizəd Serj Sarkisyanın və o vaxtkı prezident Robert Köçəryanın tərəfdaşlarının yol verdiyi çoxsaylı pozuntular qeydə alınıb. Bu kütləvi pozuntular, seçkilərin saxtalaşdırılması kütləvi hiddətə səbəb olub və fevralın 20-dən etibarən fasiləsiz etiraz aksiyaları təşkil edilib. O vaxtkı hakimiyyət bu etirazlardan ciddi narahat olub. M.Arutyunyan və digər yüksək vəzifəli şəxslər Ermənistan ordusunun ancaq təhlükəsizliyi, müdafiəni və ərazi bütövlüyünü təmin etməli olduğu haqda konstitusiya maddəsinin tələblərini pozub. Ölkəyə hərbi hücum, birbaşa müharibə təhdidi və ya müharibə elan edilməsi halında hərbi vəziyyətin prezident tərəfindən elan edilməli olduğu, yalnız bundan sonra silahlı qüvvələrdən istifadə haqda əmr verilə biləcəyi haqda maddə pozulub. M.Arutyunyan və digər vəzifəli şəxslər konstitusiyanı pozaraq Ermənistanda hərbi vəziyyət elan edib, silahlı qüvvələr isə mitinqlərdə iştirak edən vətəndaşlara qarşı tətbiq olunub. 2008-ci il fevralın 23-də müdafiə naziri “tam məxfi” qrifi altında əmr imzalayıb. Həmin əmrdə “ali baş komandan tərəfindən qoyulmuş vəzifələrin yerinə yetirilməsi”ndən bəhs edilir. Əmrə əsasən, dinc nümayişçilər “prezident seçkilərinin nəticələrini qəbul etməyən və vəziyyəti gərginləşdirən siyasi qüvvələr” adlandırılır. “Ölkənin təbii inkişafını təmin etmək üçün” silahlı qüvvələrin bütün heyəti kazarma vəziyyətinə gətirilib, zabit qrupları yaradılıb, mürəkkəb vəzifələri yerinə yetirmək üçün bölmələr ayrılıb, atıcı silahlar verilib.
Martın 1-də səhər saatlarında polis İrəvanın Azadlıq meydanında gecələyən nümayişçiləri təmizləmək üçün əməliyyat keçirib, bundan sonra nümayişçilər Myasnikyanın heykəlinin yanında toplaşıb. Martın 1-də axşam polis və ordu bölmələri silah, partlayıcı maddə tətbiq etməklə nümayişçiləri dağıdıb, nəticədə 8 mülki şəxs, 2 polis həlak olub, yüzlərlə adam yaralanıb. Xatırladaq ki, 2008-ci ilin prezident seçkiləri zamanı hazırkı baş nazir Nikol Paşinyan müxalifətin prezidentliyə namizədi Levon Ter-Petrosyanın seçki qərargahının rəhbərlərindən biri olub. Hadisələrdən sonra o gizlənib və 1 il sonra polisə təslim olub. Məhkəmənin qərarı ilə 7 il müddətinə azadlıqdan məhrum olunan N. Paşinyan qısa müddət sonra amnistiya aktı ilə azadlığa çıxıb.
Bundan başqa, Serj Sarkisyana yaxınlığı ilə tanınan Ermənistanda ”Hayastan” xeyriyyə fondunun direktoru Ara Vardanyan saxlanıb. İlkin ittiham budur ki, Vardanyan fondun 25 milyon dramlıq kredit kartından şəxsi məqsədlər üçün istifadə edib, hətta bu pullarla internet kazinosunda oynadığını boynuna alıb. O, təkcə son həftə ərzində fondun bank kartından internet kazinosuna 14 milyon dram köçürüb. Onun 2016-2018-ci illər ərzində kazinoya köçürdüyü pullar ümumilikdə 130 milyon dram və ya 270 min dollar təşkil edib. Hazırda sözügedən xeyriyyə fondunda mümkün mənimsəmə və fırıldaqçılığın aşkar edilməsi məqsədilə araşdırma aparılır. ”Qrapark” qəzeti isə yazır ki, bu gedişlə keçmiş iqtidara yaxın adamların böyük əksəriyyətinin həbsi qaçılmaz olacaq. O da vurbulanır ki, qarşı tərəfin mümkün müqaviməti ölkədə yeni və qanlı qarşıdurmaya gətirib çıxaracaq. Hazırda hadisələr elə bu istiqamətdə də inkişaf edir.
Tahir TAĞIYEV
