Yeganə Hacıyeva: “Həmin vaxtdan başlayaraq biz ABŞ-ın Dağlıq Qarabağla bağlı yeni yanaşmasını görmüş olacağıq”
Bu günlərdə Prezident İlham Əliyev Amerika Birləşmiş Ştatlarının Prezidenti Donald Trampa bu ölkənin milli bayramı - Müstəqillik Günü münasibətilə göndərdiyi təbrik məktubunda Qarabağ probleminə xüsusi vurğu ilə yer ayırıb:
“Bununla yanaşı, ölkəmizin qarşılaşdığı ən ağrılı problem olan Dağlıq Qarabağ münaqişəsi hələ də həll olunmayıb. Biz Ermənistan tərəfindən işğal olunmuş torpaqlarımızın azad olunacağı, qaçqın və məcburi köçkünlərimizin doğma yurd-yuvalarına qayıdacağı günü səbrsizliklə gözləyirik. Buna görə də münaqişənin beynəlxalq hüquq normalarına uyğun olaraq, ölkəmizin ərazi bütövlüyü çərçivəsində, sülh yolu ilə və ədalətli həlli üçün ATƏT-in Minsk Qrupunun həmsədri kimi ABŞ-ın və şəxsən Sizin, cənab Prezident, səylərinizə böyük ümidlər bəsləyirik. Belə bir əlamətdar gündə Sizə ən xoş arzularımı yetirir, möhkəm cansağlığı, işlərinizdə uğurlar, dost Amerika xalqına daim əminamanlıq və firavanlıq diləyirəm”.
Qeyd edək ki, Tramp əvvəlki ABŞ prezidentləri ilə müqayisədə İlham Əliyevə daha çox məktub göndərən prezident kimi yadda qalıb. Onun İlham Əliyevə göndərdiyi bütün məktublarda Dağlıq Qarabağ münaqişəsinə işarə olunan notlara rast gəlmək mümkündür. Prezident İlham Əliyevin Trampa ünvanladığı məktubda da Dağlıq Qarabağ münaqişəsinə toxunulur, münaqişənin həll edilmədiyi ilə bağlı narahatlıq ifadə olunur, cənab Trampın səylərinə xüsusi ümidlər bəsləndiyi ifadə edilir. Məktubdakı bu notları necə dəyərləndirmək olar?
Politoloq Yeganə Hacıyeva qəzetimizə bildirdi ki, Donald Tramp özündən əvvəlki ABŞ prezidentlərindən fərqli olaraq, öz strateji tərəfdarlarının maraqlarının qorunmasında müstəsna səy göstərən prezidentdir: “Son iki ildə biz bunu Azərbaycana olan münasibətdə də hiss edirik. Qeyd edim ki, biz bu diqqəti məxsusi olaraq özümüzlə bağlı deyil, digər ABŞ tərəfdaşları ilə də bağlı görürük. Çox qəribədir ki, bu prinsipiallığın fonunda Trampı şoumen, qeyri-ciddi prezident kimi xarakterizə edənlərin nə dərəcədə yanıldığı üzə çıxdı. Cənubi Qafqazla bağlı ABŞ-ın maraqlarının olduğu heç kimə sirr deyil. Trampın bu marağını biz BMT-nin tədbirində ilk imkan düşən kimi İlham Əliyevlə tanış olması təşəbbüsü zamanı da gördük. Tramp bu yanaşmasını digər Cənubi Qafqaz ölkələrilə də bağlı edib. Azərbaycanın isə rolu onlar üçün tam fərqlidir. Çünki biz ABŞ-la eyni zamanda enerji sahəsində də yaxından əməkdaşlıq edirik. Son illər ərzində Rusiyanın Avropaya qarşı tətbiq etdiyi enerji embarqosunun fonunda Azərbaycanın ərsəyə gətirdiyi meqalayihələrin eyni zamanda ABŞ üçün də böyük əhəmiyyəti var. ABŞ Prezidentinin son il ərzində İlham Əliyevə 4 məktubu gəlib. Bunlardan biri Azərbaycan Prezidentinin yenidən ölkə başçısı seçilməsilə bağlı təbrik idi. Onda Tramp İlham Əliyevi təbrik edənlərin sırasında ilklərdən olmuşdu. Həmin məktubda Tramp ölkəmizlə əməkdaşlığa hazır olduğunu bəyan edib. Təbii ki, Azərbaycan da balanslı xarici siyasət kursu yürüdən bir ölkə kimi ABŞ-ın bu səylərini müsbət dəyərləndirir. İlham Əliyevin ünvanladığı məktubun mətnindən də görünür ki, Azərbaycan maraq kəsb edən bütün sahələr üzrə ABŞ-la əməkdaşlıqda maraqlıdır. Eyni zamanda, İlham Əliyev məktubdakı notlar vasitəsilə Trampı Azərbaycanın ədalətli mövqeyini dəstəkləməyə çağırır. Dağlıq Qarabağ probleminin həlli ilə bağlı ABŞ-ın mövqeyi önəmlidir. Düşünürəm ki, üzümüzə gələn payız biz bunun nəticəsini görə biləcəyik. Məktublar vasitəsilə qarşılıqlı anlaşmanın mövcud olduğu bir vaxtda yaxın aylarda ABŞ-ın Azərbaycana səfir təyinatı gözlənir. Fikrimcə, həmin şəxs Dağlıq Qarabağ probleminə yaxından bələd olan, təcrübəli bir diplomat olacaq. Həmin vaxtdan başlayaraq biz ABŞ-ın Dağlıq Qarabağla bağlı yeni yanaşmasını görmüş olacağıq. Burada İlham Əliyevin rəhbərliyi ilə həyata keçirilən düzgün xarici siyasət kursunun böyük rolu olacaq”.
Cəmilə QARAYEVA
