İsmayıl Ağayev: “Ermənistan bu addımların Rusiya dövlətinin marağı çərçivəsində atıldığının fərqində olduğundan, həmin tədbirə...”
Rusiyanın ictimai-siyasi xadimlərinin Azərbaycanın işğaldan azad olunan Cocuq Mərcanlı kəndində “Azərbaycan Rusiyanın yeganə müttəfiqidir” adı altında tədbir keçirməsi və sonra həmin tanınmış personaların “Lələtəpə” adlı yüksəklikdə olan səngərə gedib Azərbaycan əsgərinin əlini sıxması Ermənistanda ciddi narahatlığa səbəb olub.
Həmin ölkənin mətbuatında yazılır ki, guya bu cür isti havada rus deputatları cəbhə bölgəsinə yalnız pul marağı apara bilər. Ermənistan mətbuatı bir az da irəli gedərək Rusiyadan ölkəmizə gələn heyətin üzvlərini bir-bir təftiş edərək, onları pulgirlikdə ittiham etməkdən belə çəkinmir. Ermənilər iddia edirlər ki, həmin səfər Rusiyanın rəsmi mövqeyini əks etdirmir və Bakının lobbist layihəsi hesabına baş tutub. Ermənilərin bu narahatlığını necə başa düşmək olar?
Beynəlxalq Diaspor Mərkəzinin sədri İsmayıl Ağayev qəzetimizə bildirdi ki, Ermənistanın bu səviyyədə narahatlıq ifadə edəcəyi gözlənilən idi: “Hətta bu layihə Bakının lobbist maraqlarından irəli gəlsə belə, burada hansısa qəbahət yoxdur. Çünki belə işlərlə bütün ölkələr, hətta Ermənistanın özü belə məşğul olur. Ermənistan dövləti maket olaraq var. Hamı bilir ki, onun bütün siyasətini dünyadakı erməni diasporu həyata keçirir. Onlar dünyanın bütün ölkələrində özlərinə lobbistlər tutub, onlara yüksək məbləğdə pullar ödəyirlər ki, haqq-nahaq Ermənistanın maraqlarını müdafiə etsinlər. Məhz bu praktikanı əsas götürərək, belə iddia irəli sürürlər. Öz üslublarını bizə də yapışdırmaq istəyirlər. Konfransın keçirildiyi zaman, yeri və adı Ermənistanın kürkünə birə salmış olub. Onlar bunun hansı əhəmiyyət daşıdığını gözəl anlayırlar. İndi gəlin konfransda kimlərin iştirak etdiyinə diqqət edək. Onların arasında Rusiya Dövlət Duması Komitəsinin sədr müavini Dmitri Savelyev, Dövlət Duması spikerinin köməkçisi Vladislav Kalxidov, Dövlət Dumasının "Vahid Rusiya" partiyasından olan deputatı Aleksey Yezubov, Beynəlxalq Avrasiya Hərəkatının lideri Aleksandr Dugin, Ekspertlər Klubunun üzvü Valeri Korovin, eləcə də jurnalist, politoloq, ictimai xadim Maksim Şevçenko və digərləri var. Bunu bir az obrazlı götürsək, Rusiyanın dövlət nümayəndə heyəti də adlandırmaq olar. Çünki tərkibində sıradan olan adam yoxdur. Onların əksəriyyəti Rusiyanın siyasi elitasında söz sahibidir. Mən hesab edirəm ki, Ermənistan bu addımların Rusiya dövlətinin marağı şərçivəsində atıldığının fərqində olduğundan, həmin tədbirə başqa don geyindirmək istəyir. Düşünürəm ki, Ermənistan mətbuatının yazdığı boş cəfəngiyyatdır. Çünki tədbirə qatılanların əksəriyyətinin rəsmi titulu olduğundan, onların adını belə ucuz məsələlərdə hallandırmaq gülüncdür. Yəqin ki, biz yaxın zamanda bu tədbirlə bağlı Ermənistanın niyə narahatlıq keçirdiyinin şahidi olacağıq”.
Məhəmmədəli QƏRİBLİ
