Azərbaycan Silahlı Qüvvələrinin 100 illiyi ilə bağlı Bakıda keçirilən hərbi parad ordumuzun hərbi qüdrətini bir daha bütün dünyaya, o cümlədən də Ermənistana nümayiş etdirdi. Silahlı Qüvvələrmizin ən müasir silah-sursat və hərbi texnika ilə təmin edilməsi fonunda düşmən ordumuz qarşısında aciz olduğunu da yenidən aydın şəkildə gördü.
Hərbi paradda nümayiş olunan ən müasir hücum və müdafiə sistemləri eyni zamanda Azərbaycanın iqtisadi gücünün, potensialının göstəricisi kimi də qarşı tərəfdə böyük rezonansa yol açdı. Düşmən gördü ki, Azərbaycan Silahlı Qüvvələrinin arsenalında dünyanın müxtəlif ölkələrində istehsal olunan hərbi texnika var. Bura Rusiya, Türkiyə, İsrail, Belarus, Pakistan, İran, ABŞ, Ukrayna və digər ölkələr aiddir. Digər tərəfdən, Azərbaycanın hərbi sahədə əməkdaşlıq etdiyi ölkələrdən ikisi, yəni Rusiya və Belarus Ermənistanla eyni hərbi-siyasi blokda – Kollektiv Təhlükəsizlik Müqaviləsi Təşkilatında təmsil olunur. Lakin bu amil, eləcə də Ermənistanın cəhdləri Azərbaycanın bu ölkələrdən işğalçını darmadağın edə biləcək hücum və müdafiə sistemləri almasına mane ola bilmir. Bu, düşmən ölkəyə həm də çox ciddi siyasi-psixoloji zərbə sayılır. Eyni zamanda bu o deməkdir ki, Azərbaycanın nüfuzu və gücü Ermənistandan dəfələrlə yüksədir. Belə vəziyyətdə Azərbaycanın ən müasir hərbi texnikalarla silahlanması isə Ermənistanın narahatlığını daha da artırır. Elə Ermənistan silahlı qüvvələrinin baş qərargah rəisi, general-mayor Artak Davtyanın açıqlamaları da bunu təsdiq edir. Azərbaycan ordusunun gücünü etiraf edən Davtyan Bakını regionda silahlanma yarışına start verməkdə ittiham edir: “Ermənistan müdafiə Nazirliyinin Azərbaycan Silahlı Qüvvələrinin silahlanma gücü barədə məlumatları Bakıda keçirilən paraddan əldə etdiyini düşünmək sadəlövhlük olardı. Sözsüz ki, biz onların hansı silahlara malik olduqlarını, hansı növ hərbi texnikaya üstünlük verdikləri və bundan sonra necə silahlar almağa çalışdıqlarını bilirik. Əlbəttə ki, Azərbaycanın müasir silahlarla hərbiləşməsi Ermənistanı narahat edir”. Erməni mediasının yazdığına görə, bununla da Davtyan dolayısı ilə etiraf edib ki, Cənubi Qafqazda hərbi balans növbəti dəfə Azərbaycanın xeyrinə dəyişib.
“Yeni Ermənistan” partiyasının sədri, yaxın keçmişdə isə “Rosreyestr”də və “Rosimuşestvo”da rəhbər vəzifələr tutmuş erməni ekspert Boris Avakyan da erməni tərəfinin Azərbaycanla müqaiysədə zəif olduğunu etiraf edinələrdən biridir: ”Bilirsiniz, mən populizm həvəskarı deyiləm, ölkədə inkişaf üçün dövlət gəlirlərini artırmaq və Müdafiə Nazirliyinin xərclərini azaltmaq gərəkdir. Ermənistan öz büdcəsinin 30%-ə qədərini uzun illər boyu buna sərf edib. Bu, ölkəni var-yoxdan çıxarıb, amma Dağlıq Qarabağdan çıxan iki prezident üçün əlverişli idi. Amma, məsələn, bax, həm ərazicə, həm də əhalicə Ermənistanla tutuşdurula biləcək üç Baltikyanı respublika ÜDM-in cəmi iki faizini müdafiəyə xərjcəyir”.
Erməni ekspert bildirir ki, ölkəsinin Azərbaycanla silah yarışı aparması da mümkün deyil: ”Çox işləmək, vəsaitləri effektsiz layihələrə itirməmək, Azərbaycanla silahlanma qovğasından çıxmaq və populizmlə məşğul olmamaq lazımdır. Şəxsi fantaziya və utopiyalardan deyil, gerçəkliklərdən çıxış edərək yaşamaq gərəkdir”. Rusiyanın “Rosbalt” analitik-informasiya agentliyi də bildirir ki,
Ermənistan Azərbaycandan qorxduğunu gizlətmir: “Azərbaycanın hərbi potensialı ilə tanış olan və heç olmasa, paradda nümayiş olunan silahları müşahidə edən hər kəs bu fikirlə razılaşa bilər. Bakıdakı paradda Mi-24, Mi-24G, Mi-35M, Bell-412 helikopterləri, MİQ-29 qırıcısı, Su-25 hücum təyyarələri, “Spayk” tank əleyhinə raket sistemi ilə təhhiz olunmuş çoxfunksiyalı zirehli maşınlar, özüyeriyən minaatan qurğular, pilotsuz uçuş aparatları, zenit-raket kompleksləri, bundan başqa, Azərbaycan istehsalı olan digər silahlar nümayiş olunub”. Qeyd edilir ki, iyunun 26-da Bakıda keçirilən paradda Rusiya, ABŞ, Çexiya, İsrail, Türkiyə və digər ölkələrin istehsalı olan silahlar təqdim edilib: “Bakıdakı paradda “Polonez”lər, “Qrad”lar, “Xrizantema”lar, “Xeron”lar və digər silahlar nümayiş etdirilib və bu arsenal Almaniya istehsalı ölümcül silahlarla təmin oluna bilər. Görürük ki, Azərbaycanda silah və hərbi texnika təchizatının diversifikasiyası prinsipi praktikada tətbiq olunur. Bu fonda Ermənistanın 2016-cı ilin sentyabrında İrəvandakı paradda nümayiş etdirdiyi silahlar solğun görünür. Həmin paradda ermənilər Rusiya istehsalı “İsgəndər” operativ-taktiki kompleksini və “Smerç” yaylım atəş sistemlərini göstərmişdilər. “İsgəndər”lərin Rusiyaya, yoxsa Ermənistana məxsus olduğu isə hələ də dəqiq bilinmir”. Bütün bunlar Azərbaycanın faktiki üstünlüyünü bir daha təsdiqləyir.
Tahir TAĞIYEV
