Yeganə Hacıyeva: “Bu məsələdə G.Hacıbəyli və onun təmsil olunduğu qurumun susqunluğu anlaşılan deyil”
Azərbaycanı vaxtilə Avropa Şurası və Parlament Assambleyasında təmsil edən sabiq deputat, sonradan radikal müxalifətə keçən Gültəkin Hacıbəyliyə qurumun binalarına və tədbirlərinə ömürlük giriş qadağası qoyulub. Bu barədə AŞPA-nın Prosedur Qaydaları, İmmunitetlər və İnstitusional Əlaqələr Komitəsi qərar qəbul edib.
AŞPA üzvlərinin Korrupsiya İttihamları üzrə Müstəqil İstintaq Orqanının dərc olunan məruzəsinə əsasən, G.Hacıbəyli etik kodeksi pozduğuna görə ona sanksiya tətbiq olunub. Məruzədə qeyd olunub ki, ittihamlarla bağlı mövqeyini bildirməsi üçün G.Hacıbəyliyə müraciət olunsa da, o, bundan yayınıb. Nəticədə onun assambleyanın binalarına, tədbirlərinə girişi qadağa edilib.
Xatırladaq ki, bu sessiyada Azərbaycandan olan üç nəfərin - Müslüm Məmmədov, Elxan Süleymanov və Gültəkin Hacıbəylinin ömürlük AŞ və AŞPA-ya girişi qadağan edilib. Digər bir neçə keçmiş xarici ölkə deputatına qarşı da oxşar sanksiya tətbiq olunub. AŞPA-nın ümumən Azərbaycanla bağlı tutduğu mövqeni təqdirəlayiq saymaq olmaz. Xüsusilə də Azərbaycan nümayəndə heyətilə bağlı biz qərəzli münasibətin sərgiləndiyinin şahidi olmuşuq. Ancaq maraqlıdır ki, hazırda sanksiyaya məruz qalan G.Hacıbəyli indiyə kimi AŞPA-nın qərarlarına ən sevinən adam olub. Səməd Seyidov və digərlərinə tətbiq olunan əsassız sanksiyaları “demokratiya”nın təntənəsi kimi qeyd edərək, sevincək şəkildə statuslar paylaşıb. İndi isə onun təqdir etdiyi qurum Hacıbəylini ömürlük olaraq AŞPA-nın həndəvərində belə görmək istəmir. G.Hacıbəyli bir siyasətçi kimi bu qərardan hansı nəticəni çıxarmalıdır?
Avropa qurumları ilə sıx təmasda olan, beynəlxalq məsələlər üzrə ekspert Yeganə Hacıyeva qəzetimizə açıqlamasında bildirdi ki, iyunun 27-si Avropa Şurası Parlament Assambleyasının saytında Parlament Assambleyasında müxtəlif vaxtlarda fəaliyyət göstərmiş deputatlar və keçmiş AŞPA üzvləri barədə Korrupsiya İttihamları üzrə Müstəqil İstintaq Orqanının Məruzəsi dərc edilib: “AŞPA prosedur qaydaları, immunitetlər və institusional məsələlər komitəsi müxtəlif ölkələr üzrə korrupsiya faktlarında özünü göstərən, etik normaların pozulmasında təqsirli bilinən 29 deputata ömürlük sanksiyalar tətbiq edib. Qeyd edim ki, məruzənin özü hüquqi əsassızdır. Müstəqil İstintaq Qrupu adlandırılan qrupun fəaliyyəti üçün baza rolunu AŞPA-da 2017-ci ildə qəbul edilən daxili prosedur və etik qaydalara dəyişiklik nəzərdə tutan “Parlament Assambleyasında üzvlərin məsuliyyət prinsipinin tanınması və həyata keçirilməsi” sənədidir. İstintaq Qrupu bunun əsasında heç bir dəlil və sübuta, real faktlara söykənməyən, müstəqilliyi şübhə doğuran, iqtisadi və siyasi lobbi dairələrə bağlılığı ilə tanınan şəxslərin şübhəli ifadələri əsasında qərəzli bir hesabat hazırlayıb. Ümumiyyətlə, bu hesabatı hüquqi bir sənəd olaraq təqdim etmək doğru deyil və onun əsasında sanksiyaların tətbiqi isə, ümumiyyətlə, qəbuledilməzdir. Bu, AŞPA-da artıq bir neçə ildir rəqib qruplara qarşı sifarişlə hüquqi prosedurların tətbiqi praktikasının davamıdır. Sənədin detallarına gəlsək, bir neçə deputat - Karin Strents, Karin Voldsett, Luka Volonte və digər şəxslər barəsində də AŞPA-ya daxil olmaq hüququndan ömürlük məhrum edilmə qərarları çıxarılıb. Məruzədə AŞPA-nın müstəqil istintaq orqanı qurumun etik normaları pozan və öz hərəkətləri ilə bağlı açıqlama verməyən 29 nəfər keçmiş və indiki üzvünün siyahısında azərbaycanlı millət vəkilləri Müslüm Məmmədov və Elxan Süleymanov istintaqla əməkdaşlıq etməkdən imtinaya görə və korrupsiya faktlarının araşdırılması üzrə komissiyanın suallarını cavablandırmadıqlarına görə ömürlük AŞPA-ya daxil olmaq hüququndan məhrum ediliblər.
AŞPA-ya daxil olmaq hüququndan ömürlük məhrum edilənlər arasında səlahiyyətləri 2010-cu ildə başa çatmış keçmiş Azərbaycanlı deputat, Milli Məclisin AŞPA-da nümayəndə heyəti sədrinin keçmiş müavini G.Hacıbəyli də var.
AŞPA-nın daha öncəki qərəzli qətnamə və sanksiya qərarlarını, ümumiyyətlə, anti-Azərbaycan dairələrinin istənilən qərəzli məqalələrini, xarici kəşfiyyat dairələrinin istənilən sızdırmalarını şəksiz-şübhəsiz qəbul edən, sosial mediada təbliğində xüsusi canfəşanlıq edən şəxslər bu dəfə özləri pis vəziyyətlə üz-üzə qalmışlar. Əslində, bunun özündə ilahi bir ədalət var. Lakin etiraf edim ki, Avropa Şurasının Parlament Assambleyasının bu qərarına Azərbaycan müxalifətinin rəyi, Milli Şuranın fəalı, sanksiyaya məruz qalan G.Hacıbəylinin şərhi, gözlənildiyi kimi, reallıq hissindən uzaq, qərəzli və ədalətsiz oldu. Əslində, G.Hacıbəyli və onun təmsil olunduğu düşərgə özündə cəsarət tapıb AŞPA-nın bu məsələdə Azərbaycana qarşı qərəzli olduğunu bəyan etməlidirlər. Bunu etməklə Azərbaycanın maraqlarını qorumağı özlərinə sığışdırmırlarsa, onda G.Hacıbəyli elan olunan ittihamı həzm etməli və siyasətlə vidalaşmalıdır. Bu məsələdə G.Hacıbəyli və onun təmsil olunduğu qurumun susqunluğu anlaşılan deyil. İstənilən müxalifət yeri gələndə öz ölkəsinin milli, dövləti maraqlarını da qorumağa borcludur. İndi biz Milli Şuradan ədalətli mövqe gözləyirik”.
Məhəmmədəli QƏRİBLİ
