Məhəmməd Əsədullazadə: “Pentaqon daim Azərbaycana xüsusi diqqət ayırıb”
Məlum olduğu kimi, Prezident İlham Əliyev ABŞ dövlət katibinin Cənubi Qafqaz və Mərkəzi Asiya məsələləri üzrə köməkçisinin birinci müavini xanım Alis Uelsi qəbul edib. Görüşdə bir sıra məsələlər müzakirə olunub.
Xanım Alis Uels bu yaxınlarda qeyd olunmuş Azərbaycan Xalq Cümhuriyyətinin yaradılmasının 100 illiyi və “Şahdəniz-2” layihəsinin rəsmi açılışı kimi çox tarixi tədbirlərdən az keçmiş Azərbaycana səfər etməsindən məmnunluğunu vurğulayıb. O bu mühüm hadisələrlə bağlı ABŞ Prezidenti Donald Trampın Azərbaycan Respublikası Prezidentinə təbrik məktubları göndərdiyini xatırlayaraq bu münasibətlə öz təbriklərini də çatdırıb.
Dövlət başçısı ABŞ Prezidenti Donald Trampın bu iki mühüm hadisə ilə bağlı göndərdiyi məktublara və orada ölkəmiz və ikitərəfli münasibətlərimizlə əlaqədar ifadə etdiyi xoş fikirlərə görə minnətdarlığını bildirib. Bunun əlaqələrimizin strateji önəmini bir daha nümayiş etdirdiyini deyərək qeyd edib ki, Azərbaycan tərəfi ABŞ Prezidentinin ölkəmizə olan münasibətini yüksək qiymətləndirir. Eyni zamanda, Prezident İlham Əliyev Azərbaycanın həyata keçirdiyi nəhəng enerji layihələrinin reallaşmasına ABŞ hökumətinin verdiyi dəstəyin böyük önəm daşıdığını vurğulayıb və bildirib ki, Azərbaycan hər zaman müxtəlif enerji layihələri, o cümlədən böyük əhəmiyyət daşıyan “Cənub Qaz Dəhlizi” layihəsinin reallaşmasında bu dəstəyi hiss edib.
Söhbət zamanı Azərbaycan-ABŞ ikitərəfli münasibətlərinin siyasi, iqtisadi, enerji və təhlükəsizlik sahələrində uğurla inkişaf etdiyi qeyd olunub, əlaqələrimizin bundan sonra da genişlənəcəyinə əminlik ifadə edilib.
Görünən odur ki, Birləşmiş Ştatlar Azərbaycanın regionda oynadığı önəmli rola xüsusi diqqət göstərir. Bu həm də iki ölkə arasında münasibətlərin daha da inkişaf etməsinə öz təsirini göstərir. Ümumilikdə, bütün bunları ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, ABŞ-Azərbaycan əlaqələri bir sıra sahələrdə inkişaf edir: “Qeyd edim ki, Vaşinqtonun Cənubi Qafqaz siyasətində Azərbaycan strateji önəm kəsb edən ölkədir. Məsələ ondadır ki, Azərbaycan vasitəsilə Mərkəzi Asiyaya çıxış əldə edir. Hazırda ABŞ-ın Rusiyaya qarşı sanksiyaları və Kremlin Cənubi Qafqazda siyasi mövqeyinin zəiflədilməsi istiqamətində Ağ Ev ardıcıl və strateji siyasət aparır. Məqsəd, Gürcüstan daxil, Mərkəzi Asiya regionunu əhatə edə biləcək regionda öz siyasi-iqtisadi mövqeyini gücləndirməkdir. ABŞ rəsmiləri Cənubi Qafqazı və Mərkəzi Asiyanı eyni region kimi bir arealda görürlər. Ona görə də ABŞ rəsmisinin Cənubi və Mərkəzi Asiya məsələləri üzrə rəsmisinin Bakı səfəri mühüm əhəmiyyət kəsb edir. Azərbaycan ABŞ-ın regiona daxil olmasında və geostrateji siyasətinin tətbiq olunmasında əhəmiyyətli ölkədir. Vaşinqtonun dəstək verdiyi “Cənub Qaz Dəhlizi” və onun əsas seqmenti olan TANAP, Bakı-Tiflis-Qars dəmir yolu layihəsi və nəhayət, ABŞ-ın Qazaxıstanla Xəzər dənizi üzərindən Əfqanıstana daşınacaq yüklərlə bağlı razılaşması götərir ki, Ağ Ev artıq regionda öz fəaliyyətini genişləndirir. Trampın ölkə başçısı İlham Əliyevə göndərdiyi ardıcıl məktublar da iki ölkə arasında yaxın perspektivdə əməkdaşlığın yüksək səviyyədə qurulacağının mesajını vermiş oldu. Hesab edirəm ki, regionda şərtlər dəyişməkdədir və Moskva-Vaşinqton mübarizəsi açıq müstəviyə keçir. Azərbaycanın bu kimi gəlişmələrdə Vaşinqtonun dəstəyini alacağına şübhə etmirəm. Çünki Pentaqon daim Azərbaycana xüsusi diqqət ayırıb. ABŞ-ın Əfqanıstana göndərdiyi yüklərin əsas hissəsi məhz Azərbaycandan keçir. Göründüyü kimi, bir neçə il bundan əvvəl ABŞ ölkəmizə bir qədər soyuq yanaşırdı. İndi isə regionda əhəmiyyətli ölkə olduğunun fərqindədir və əməkdaşlığın artırılması istiqamətində səylər göstərir. Bundan sonra okeanın o tayından lazımi dəstək görəcəyimizə şübhə etmirəm. Hətta Prezident Trampın Prezident İlham Əliyevə cümhuriyyətin yüzilliyi ilə bağlı göndərdiyi məktubunda Qarabağ münaqişəsinin həllinə diqqət ayırması və iki ölkə arasında strateji əməkdaşlığın bundan sonra da yüksək səviyyədə aparılacağını vurğulaması artıq iki ölkə arasında yeni inkişaf dinamikasının olduğunun göstəricisidir”.
Vidadi ORDAHALLI
