Arzu Nağıyev: “Azərbaycan üçün isə kimin olacağı o qədər də əhəmiyyət kəsb etmir”
Bu günlərdə Ermənistan prezidenti Armen Sarkisyan böyük beynəlxalq turnedə olub: ad gününü “doğma” Britaniyada qeyd edib ki, burada onun kral ailəsi ilə görüşləri planlaşdırılırdı. Ermənistanın “tert.am” portalı xəbər verir ki, Britaniyadan sonra Ermənistan dövlət başçısı Fransaya və ABŞ-a yollanacaq.
A.Sarkisyanın yaxın ətrafına istinadla mənbə qeyd edir ki, xarici turnedə məqsəd Ermənistana investisiyaların cəlb edilməsidir. Tezliklə həmin məqsədlə onun Rusiyaya səfəri də nəzərdə tutulur.
“Bəzi məlumatlara əsasən, Prezident İlham Əliyev və A.Sarkisyan keçmişdə təsadüfən bir yerdə dincəldikləri məkanda ünsiyyətdə olmağa imkan tapıblar. İstisna edilmir ki, Əliyev Rusiyaya məhz A.Sarkisyanla danışıqlar aparmağa hazır olduğunu bildirib və ola bilsin ki, Minsk Qrupunun həmsədr ölkələri də buna etiraz etməyəcəklər”, - “tert.am”ın mənbəyi vurğulayır.
Ermənilərin İlham Əliyevin danışıqları məhz A.Sarkisyanla aparmaq istəməsi ilə bağlı rəsmi təsdiqlənməmiş məlumat yaymaqda hansı marağı ola bilər? Paşinyana etimadsızlıq, ya…
Politoloq Arzu Nağıyev qəzetimizə bildirdi ki, Ermənistan prezidenti A.Sarkisyanın Avropa, ABŞ və Rusiya turnesi əsasən bir neçə məqamla bağlıdır: “Məlum məsələdir ki, bu səfərlər işçi bir xarakter daşıyır. Böyük Britaniyada rəsmi və qeyri-rəsmi görüşlər çərçivəsində əvvəllər səfir olduğu bir dövlətlə, XİN-lə xudahafizləşib. Təbii ki, onu maraqlandıran əsas məsələ iqtisadiyyatı dağılan Ermənistana sərmayələr qoyulması üçün xahişlər etməkdir. Sarkisyan öz köhnə əlaqələrindən istifadə edərək, ölkəyə müəyyən iqtisadi səmərələr gətirməyə çalışır. Sonradan Fransaya səfəri planlaşdırılan Sarkisyan orada da əsasən erməni lobbisi ilə görüş keçirmək istəyir, təbii ki, məqsəd yenə də maddi vəsait əldə etməkdir. Eyni zamanda, Sarkisyan Beynəlxalq Frankofoniya təşkilatının rəhbərliyi ilə görüşməli və bu il okyabrın 12-də İrəvanda keçirilməsi planlaşdırılan sammitlə bağlı müzakirələr aparmalıdır. Bundan sona ABŞ-a səfərə getməsi nəzərdə tutulan Sarkisyan yenə də sərmayə qoyulması ilə bağlı görüşlər planlaşdırır. Onun öz səfərini Rusiyada yekunlaşdırması ilə bağlı məlumatlar da var. Təbii ki, belə görüşlərdən sonra Rusiyadan mütləq şəkildə təlimatlar alınmalıdır. Dağlıq Qarabağ münaqişəsi ilə bağlı cənab İlham Əliyevlə görüş məsələsinə gəldikdə, artıq belə bəyanatlar ermənilər tərəfindən səsləndirilir və hətta BP-nin Azərbaycanla mühüm əlaqələrinin olması və Sarkisyanın da orada işləməsi məsələsi, eləcə də Azərbaycan Prezidentini tanıması ilə bağlı fikirlər də var. Təbii ki, Dağlıq Qarabağ münaqişəsinin həlli ilə bağlı danışıqlar davam etdirilməlidir. Ermənilər qəbul etmək istəməsələr belə, danışıqlar qaçılmazdır. Paşinyan qeyri-adekvat bir şəxsdir. Buna görə də danışıqlarda Serj Sarkisyanın olacağını bəyan edir və bununla da cavabdehlikdən qaçmağa çalışır. Belə bir vəziyyətdə danışıqları ancaq A.Sarkisyanın aparacağı ehtimalı daha böyükdür. Bu həm də erməni tərəfinin qorxusundan əmələ gələn faktordur. Paşinyan nə diplomat, nə də bir normal siyasətçidir. A.Sarkisyan isə artıq təcrübəli diplomat və siyasətçidir. Buna görə ermənilər A.Sarkisyan faktorunun üzərində durmalı olurlar. Azərbaycan üçün isə kimin olacağı o qədər də əhəmiyyət kəsb etmir. Biz artıq öz təkliflərimizi vermişik, beynəlxalq hüquq normalarına zidd hər hansı bir addım atmırıq və cavab gözləyirik”.
Məhəmmədəli QƏRİBLİ
