Ramil Hüseynov: “Onlar bütün vasitələrlə qonşu ölkələrin hesabına ərazilərini genişləndirmək istəyirlər”
Aprel döyüşləri Azərbaycan Ordusunun böyük üstünlüyünü nümayiş etdirdi və ordumuzun Qarabağı azad etməyə qadir olduğunu ortaya qoydu. Bu döyüşlərin zərbəsindən hələ də özünə gələ bilməyən Ermənistan siyasi rəhbərliyi, cəmiyyəti buna müxtəlif don geydirməyə çalışırlar. Ancaq dörd gün davam edən və Silahlı Qüvvələrimizin rəşadət rəmzinə çevrilən bu döyüşlər bütün dünyaya, ermənilərin havadarlarına bir daha göstərdi ki, Azərbaycan xalqı Qarabağın işğalı ilə heç vaxt barışmayacaq.
Məlumat üçün qeyd edək ki, 2016-cı il aprelin 2-dən 5-dək davam edən döyüşlərdə ordumuz düşmənə ağır zərbələr endirdi. Nəticədə Ermənistan silahlı qüvvələrinin yüzlərlə hərbçisi, çoxsaylı texnikası məhv edildi, 2000 hektardan artıq ərazi, o cümlədən Lələtəpə və Talış yüksəklikləri erməni işğalından azad edildi. Bununla yanaşı, 2016-cı il aprelin 2-dən 5-dək davam edən uğurlu əks-hücum əməliyyatları zamanı Lələtəpə yüksəkliyinin azad edilməsi ilə Horadiz şəhəri, ətraf kəndlər, dəmir yolu stansiyası və avtomobil yolları düşmənin açıq hədəfi olmaq təhlükəsindən xilas edilib. Ordumuz, eyni zamanda, Cəbrayıl və Füzuli istiqamətində düşmənin işğalı altındakı geniş ərazini nəzarət altında saxlamaq imkanı əldə edib. Talış kəndi ətrafında yüksəkliklərin azad olunması hesabına Tap Qaraqoyunlu kəndi düşmənin hədəfi olmaqdan xilas edilib və ordumuz yüksəkliklərdə yeni mövqelər əldə etməklə bu istiqamətdə düşmənin hərəkətini məhdudlaşdırmağa nail olub. Halbuki, 2016-cı ilin aprelinə qədər erməni işğalçıları yüngül atıcı silahlarla sözügedən kəndi istədikləri vaxt atəşə tuta bilirdilər.
Aprel döyüşlərini həzm edə bilməyən ermənilər onun əhəmiyyətini kiçiltmək üçün müxtəlif yalanlar uydururlar. Bir ara Serj Sarkisyan döyüşlər zamanı 800 hektar ərazini itirdiklərin bəyan etdi. Bunun doğru olmadığı məlum olandan sonra dedilər ki, sözügedən ərazilər strateji baxımdan əhəmiyyətsizdir. Bu günlərdə erməni saytlarının birində növbəti uydurma xarakterli məlumat yayılıb. Ermənilər iddia edirlər ki, Azərbaycanın aprel döyüşləri ilə öyünməyə haqqı yoxdur. Onlar onu bununla əsaslandırmağa çalışırlar ki, guya ermənilər Naxçıvanın 20 min hektar ərazisini ələ keçiriblər. Məlum olduğu kimi, Naxçıvan Muxtar Respublikasının işğal altında olan yeganə yaşayış məntəqəsi Kərki kəndidir. Kəndin anklav şəraitində olması ermənilərin oranı 1990-cı ilin yanvarında işğal etməsinə gətirib çıxardı. Ancaq sözügedən kəndin ərazisi çox kiçikdir. Ermənilərin Naxçıvanla bağlı belə fikirlər səsləndirməsi bir daha onların işğalçılıq xislətini ortaya qoyur. Bir növ, onlar bununla öz niyyətlərini açıq və rəsmən bəyan edirlər. Məsələ ondadır ki, Naxçıvan Qarabağ deyil. Dağlıq Qarabağın ətrafında olan rayonları işğal edərkən ermənilər bəyan edirdilər ki, təhlükəsizlik məqsədilə bunu edirlər. Ancaq Naxçıvanla bağlı səslənən fikirlər bir daha göstərdi ki, onlar bütün mənalarda işğalçıdırlar.
Məsələyə münasibət bildirən VİP-in sədr müavini Ramil Hüseynovun sözlərinə görə, səslənən fikirlər bir daha Ermənistanın işğalçılıq missiyasını rəsmən ortaya qoyur: “Əvvəla ermənilərin gücü çatsaydı, o zaman Naxçıvanı da Qarabağ kimi işğal edərdilər. İlk vaxtlar buna çox çalışdılar, amma nail ola bilmədilər. O zaman Naxçıvanda müdafiənin yaxşı təşkil olunması, Türkiyə amili və digər səbəblər onların istəyini gözündə qoydu. Belədə ermənilər nəinki Naxçıvanı, digər Azərbaycan ərazilərini də işğal etmək istəyirlər. Məsələn, Qazax rayonunun 7 kəndi 25 ildən çoxdur işğal altındadır. Halbuki, Qazax rayonu da Naxçıvan MR kimi Dağlıq Qarabağla inzibati baxımdan həmsərhəd deyil. İşğalçılıq ermənilərin xislətindədir. Onlar bütün vasitələrlə qonşu ölkələrin hesabına ərazilərini genişləndirmək istəyirlər. Bunun nəticəsidir ki, uzun illərdir Ermənistanın qonşu Türkiyəyə ərazi iddiaları var. Həmçinin, Gürcüstan da bura daxildir. Gürcüstanın Cavaxetiya bölgəsində kompakt yaşayan ermənilər zaman-zaman separatçı şüarlarla çıxış edirlər. Ermənilərin imkanı olsa Gürcüstan ərazilərini də işğal edərlər. Deməyim odur ki, Ermənistan bütün mənalarda işğalçılıq siyasəti yeridir və Naxçıvanla bağlı səslənən fikirlər deyilənlərə bariz nümunədir. Onlar bundan ötrü bütün çirkin vasitələrə əl atırlar. Ancaq artıq Azərbaycan əvvəlki dövrlərdə olduğu kimi zəif deyil. Yəni onlar bundan sonra öz istəklərini reallaşdıra bilməyəcəklər”.
Vidadi ORDAHALLI
