Fikrət Sadıqov: “Ona məsləhət etmək lazımdır ki, gedib daşnak partiyasının proqramlarına baxsın”
Rusiya Dövlət Dumasının MDB ölkələri ilə iş və soydaşlarla əlaqə komitəsi sədrinin birinci müavini Konstantin Zatulin hər zaman ermənipərəst mövqeyi ilə seçilib. O, zaman-zaman, yeri gəldi-gəlmədi, Azərbaycana yönəlik qərəzli, birtərəfli açıqlamalarla çıxış edib. Zatulin Rusiya kimi bir ölkənin deputatı olmasına baxmayaraq, bir sıra hallarda səsləndirdiyi fikirlərin məsuliyyətinə varmır.
Zatulin öz “ənənəsinə” sadiq qalaraq, növbəti dəfə bənzər açıqlama ilə çıxış edib. Belə ki, o, erməni mətbuatına açıqlamasında Prezident İlham Əliyevin İrəvan və Zəngəzurun Azərbaycanın tarixi torpaqları olması, azərbaycanlıların ora qayıdacağı bəyanatına münasibət bildirib.
Zatulin hesab edir ki, guya bu bəyanat İlham Əliyevin beynəlxalq arenada mövqeyini zəiflədib: “Kiminsə bu bəyanatı necə ciddi qəbul edə biləcəyi aydın deyil”.
Zatulin həyasızcasına qeyd edib ki, Ermənistana qarşı hər hansı bir hərbi təhlükə Rusiyaya qarşı təhlükə kimi qəbul olunacaq. Dumada hər zaman ermənipərəst mövqeyi ilə seçilən deputat parlamentdə erməni jurnalistlərin qarşısında çıxış edərkən bildirib ki, Rusiya 2016-cı ilin aprel hadisələrindən sonra özü üçün nətcə çıxarıb: “Azərbaycan Rusiyadan aldığı silahlarla atəşkəsi pozdu. Balans pozulmasın deyə Ermənistanı ən müasir müdafiə sistemləri ilə təchiz etdik”.
Nəzərə alsaq ki, Rusiya ATƏT-in Minsk Qrupunun həmsədridir və əsas vasitəçi ölkələrdən biridir, o zaman Zatulinin belə məsuliyyətsiz açıqlamalarla çıxış etməsini heç cür anlamaq olmur. Adətən vasitəçi bir ölkəni təmsil edən şəxs belə məsələlərdə son dərəcə diplomatik normalara riayət etməli və məsafəli açıqlamalar verməlidir. Ancaq Zatulin bu normaların heç birini gözləməyərək, açıq-aşkar qərəzli mövqe sərgiləyir.
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Zatulinin səsləndirdiyi fikirlər əsassızdır: “Əvvəla Zatulin birinci dəfə deyil belə açıqlamalarla çıxış edir. Çünki o, ermənipərəst ictimai xadimdir və onların sifarişlərini çox böyük sevgi ilə yerinə yetirir. Məlum məsələdir ki, onun ermənilərlə çox yaxın münasibətləri var. Ona görə də Zatulindən hansısa obyektiv bir qiymətləndirmə gözləmək lazım deyil. Çünki onun siyasi mövqeyi illərdir göz qabağındadır. O üzdən, Zatulinə ictimai dairələr səviyyəsində layiqli cavab vermək lazımdır. Çünki biz heç vaxt deməmişik ki, Ermənistanı Azərbaycana birləşdirmək istəyirik. Dövlət başçısı dəfələrlə azərbaycanlıların öz tarixi torpaqlarına qayıdacağı ilə bağlı fikirlər səsləndirib. Bildirib ki, azərbaycanlılar öz tarixi torpaqlarına qayıtmalıdırlar. Bunda da hansısa təəccüblü bir şey yoxdur. Bu, sadəcə, tarixi faktlara əsaslanan bir bəyanatdır. Zatulin özünü elə aparır ki, sanki bunları eşitmir. Əvəzində fikirləşdiyi ifadələri səsləndirir. Bu da yolverilməz və qəbuledilməz haldır. Zatulin o qədər erməni dairələri ilə sıx bağlıdır ki, ondan obyektiv bir bəyanat gözləmək doğru olmaz. Çünki onun mövqeyi artıq hamıya bəllidir. Hesab edirəm ki, o bundan sonra da “ənənəsinə” sadiq qalaraq oxşar bəyanatlar verəcək. Zatulinə məsləhət etmək lazımdır ki, gedib daşnak partiyasının proqramlarına baxsın. Onların proqramlarında “Böyük Ermənistan”ın yaranması ilə bağlı maddələr var. Orada Azərbaycan, Türkiyə, Gürcüstan torpaqları əsasında “Böyük Ermənistan” dövləti yaratmaq istəyirlər. Bəlkə həmin proqramları oxuyandan sonra Zatulin özünə gələr. Ancaq buna inanmıram. Ona görə ki, o, birmənalı olaraq, ermənipərəstdir və eyni zamanda qərəzlidir. Bu baxımdan onun səsləndirdiyi fikirlərin əsası yoxdur”.
Vidadi ORDAHALLI
