Əli Mahmud: “Hesab edirəm ki, belə ünsürlərə qarşı yazıçı və şairlər, digər yaradıcı şəxslər öz səsini qaldırmalı, onların mənfur hərəkətlərini pisləməlidirlər” Əhməd Qəşəmoğlu: “Ölkəmizə qarşı təhqir-söyüş edənlərin özlərinin ssenaristləri var” Qiymət Məhərrəmli: “Hər bir qələm adamı, sənətkar ölkəmizin atributlarını, milli dəyərlərimizi təhqir edən adamların hərəkətlərini pisləməlidir”
Azərbaycan Respublikası dünyada yaşayan bütün azərbaycanlıların evidir və hər bir azərbaycanlı doğma yurd-yuvasını qorumalı, onun təəssübünü çəkməli olduğu halda, təəssüf ki, bəzi üzü dönüklər xarici qüvvələrin təsiri ilə ölkəmizə qarşı çirkin kampaniya aparır, simvol və atributlarımızı, milli-mənəvi dəyərlərimizi təhqir edirlər. Çox təəssüf ki, mühacirətdə olan bəzi insanlar öz milli-mənəvi borclarını unudaraq, xalqımızı, dövlətimizi təhqir edirlər.
Məlumdur ki, ölkəmizə qarşı böhtan və şər kampaniyasının arxasında bəlli qüvvələr dayanır. Onlar isə bu işdə antimilli ünsürlərdən istifadə edirlər. İnternet resurslarının verdiyi imkanlardan istifadə edərək “babam mənə kor deyib, gəlib gedəni vur deyib” prinsipindən istifadə edən bəzi mühacirlərin ölkəmizə qarşı etdiyi mənfi hərəkətlər ölkə ictimaiyyəti, KİV təmsilçiləri, siyasətçilər tərəfindən kəskin şəkildə pislənildi.
Onlar xarici ölkələrdə oturub Azərbaycan əleyhinə böhtan və qarayaxma kampaniyası aparan bəzi mühacirlərin erməni dəyirmanına su tökdüklərini bəyan etdilər. Azərbaycan xalqının dəyərlərinə, atributlarına qarşı əxlaqa sığmayan fikirlər səsləndirən insanların davranışlarına mənfi münasibət bildirənlərin sırasında ölkə ziyalılarının, yazıçı və şairlərin, yaradıcı şəxslərin az olması, ümumiyyətlə, onların bu sahədə aktivlik göstərməməsi mənfi haldır. Əslində, respublikada fəaliyyət göstərən yaradıcı qurum və təşkilatlar ölkəmizə, xalqımıza qarşı şər-böhtan kampaniyası aparan şəxslərə qarşı daha barışmaz mövqe tutmalı və bununla bağlı təşkilatın bəyanatlarını yaymalı idilər. Lakin hələ də yaradıcı şəxslər bu məsələdə elə də aktiv deyillər.
Azərbaycan Yazıçılar Birliyininü üzvü, şair-publisist Əli Mahmud “Bakı-Xəbər”ə açıqlamasında bildirdi ki, antimilli qüvvələrə qarşı bütün yaradıcı qurumlar, yaradıcı şəxslər barışmaz mövqe tutmalıdırlar. O qeyd etdi ki, milli-mənəvi dəyərlərimizi, dövlət atributları və simvollarımızı təhqir edən hər bir şəxs, kimliyindən asılı olmayaraq, kəskin qınanmalıdır: “Bir neçə həftədir müxtəlif xarici ölkələrdə oturub internet, sosial şəbəkələr vasitəsilə “qəhrəmanlıq” edən bəzi mühacirlərin çıxışlarını, söyüş və təhqir dolu fikirlərini kəskin pisləyirəm. Onların hansı məqsədə qulluq etdiyi, kimlərin dili ilə danışdığı məlum məsələdir. Mən bu yolu tutan şəxsləri, ümumiyyətlə, azərbaycanlı saymıram, onların erməni ilə heç bir fərqi yoxdur. Bu adamlar artıq manqurtlaşıblar və belələri isə heç zaman xalqımızın övladı ola bilməz. Bu şəxslər azərbaycanlı olsaydılar, ölkəmizə, milli-mənəvi dəyərlərimizə qara yaxmazdılar, millətimizi təhqir etməzdilər. Bu adamlar Azərbaycanı istəməyən bəzi qüvvələrin əlində oyuncağa çevrildiyindən, belə tərbiyədən kənar işlər görürlər. Hesab edirəm ki, belə ünsürlərə qarşı yazıçı və şairlər, digər yaradıcı şəxslər öz səsini qaldırmalı, onların mənfur hərəkətlərini pisləməlidirlər. Yazıçı və şair xalqın yanında olmalı, dövlətin, dövlətçiliyin təəssübünü çəkməlidir. Təəssüf ki, bu məsələdə yaradıcı adamlar elə də aktiv deyillər”.
Müasir mühacirlərin müəyyən bir qisminin Azərbaycana qarşı düşmən mövqeyi tutmasından ciddi narahat olduğunu deyən Ə.Mahmudun qənaətinə görə, onlar öz ağalarının verdiyi pula görə öz mənəviyyatlarını satır, xalqına arxa çevirirlər. Yüz il bundan əvvəl bolşevizm zülmündən canını qurtararaq xarici ölkələrə üz tutan azərbaycanlı mühacirlərin ölkəmizin, xalqımızın, milli-mənəvi dəyərlərimizin təbliği ilə bağlı gördükləri işləri, göstərdikləri fəaliyyəti nümunə gətirən Ə.Mahmudun fikrincə, xaricdə olan mühacirlər Azərbaycanı ancaq təbliğ etməli, onu tanıtmalıdırlar: “Bizim keçmiş zamanlarda da mühacirlərimiz olub. Onlar Azərbaycan xalqını çox yüksək səviyyədə təbliğ ediblər, milli-mənəvi dəyərlərimizi, dövlətçilik simvollarını, atributlarını qoruyublar. Onlar Azərbaycanın müstəqil olmasını hər zaman arzu ediblər. Lakin bugünkü bəzi mühacirlər özlərindən əvvəlkilərin işıqlı əməllərini davam etdirmək əvəzinə, dövlətimizin maraqlarını pul əvəzində xarici ağalarına satırlar. Bu insanlar azərbaycanlı adına layiq olmayan və şərəfini itirən ünsürlərdir”.
Tanınmış sosioloq-alim, professor, şair Əhməd Qəşəmoğlu da Azərbaycana qarşı xoşagəlməz mövqe tutan şəxslərin hərəkətlərini pisləyir. Belə mənfi hallara qarşı ölkə ziyalılarının aktivlik göstərməli olduğunu deyən Ə.Qəşəmoğlu bildirdi ki, xarici ölkələrdə oturub Azərbaycanı pisləyən, onun dövlət atribut və simvollarını təhqir edən insanların tutduğu yol onlara başucalığı gətirmir: “Mənim Azərbaycanı, onun simvollarını, dəyərlərini təhqir edən insanlara münasibətim müsbət ola bilməz. Yəni bütün insanlar təhqiri normal qəbul etmir. İstənilən məsələ ilə bağlı təhqir dilində danışmaq zəiflik əlamətidir. Təhqir, söyüş onu dilinə gətirən insanın özü, əxlaqı haqqında aydın fikir yaradır. Çox təəssüf ki, belə xoşagəlməz proses baş verir. Bu da ölkənin mənəvi iqliminə yaxşı təsir göstərmir. Hesab edirəm ki, ölkəmizə qarşı təhqir-söyüş edənlərin özlərinin ssenaristləri var. Birmənalı olaraq deyirəm ki, bu metodları seçənlər düzgün yol seçməyiblər. Özlərini daha “demokratik, azad” hesab edən insanlar çalışmalıdırlar ki, Azərbaycanın imicinə zərbə vuran hərəkətlər etməsinlər”.
Azərbaycan Yazıçılar Birliyinin üzvü, filologiya üzrə fəlsəfə doktoru, şairə-publisist Qiymət Məhərrəmli də hesab edir ki, Azərbaycana qarşı xoşagəlməz mövqe tutan antimilli ünsürlərin hərəkətlərinə qarşı bütün ziyalılar kəskin münasibət bildirməlidirlər: “Hər bir qələm adamı, sənətkar ölkəmizin atributlarını, milli dəyərlərimizi təhqir edən adamların hərəkətlərini pisləməlidir. Çünki milli-mənəvi dəyərlər xalqa məxsusdur. Çox təəssüflənirəm ki, xaricdə oturan bir qrup şəxs Azərbaycana qarşı belə mövqe tutur. Bunu kəskin pisləyirəm. Düşünürəm ki, hər bir qələm adamı belə insanlara öz sözünü deməlidir”.
İradə SARIYEVA
