Fikrət Sadıqov: “Onlar bütün bunları dərk etməli və başa düşməlidirlər”
Bu günlərdə Gürcüstan prezidenti Georgi Marqvelaşvili ABŞ-da rəsmi səfərdə olub. Səfər çərçivəsində iki ölkə rəsmiləri arasında bir sıra görüşlər keçirilib. Bununla yanaş, Georgi Marqvelaşvili Birləşmiş Ştatlarda təşkil olunan tədbirlərə qatılaraq çıxışlar edib.
Belə ki, Gürcüstan prezidenti martın 16-da Konqresdə təşkil olunan tədbirdə çıxış edərkən Vaşinqtona müəyyən çağırışlar edib: “Gürcüstan Amerikanın daha böyük dəstəyinə ümid edir, biz Amerikanın şərq istiqamətindəki əsas forpostuyuq, ona görə tərəfdaşlıq statusumuzu artırmalıyıq”. Digər tərəfdən, Marqvelaşvili sonrakı fikirlərini bu şəkildə ifadə edib: “Rusiya Gürcüstanın 20 faiz ərazisini işğal edib, Krım işğal altındadır, Ukraynada müharibəyə rəvac verib, Moldovanın ərazi bütövlüyü pozulub və Böyük Britaniyada müəmmalı qətl hadisəsi baş verib”.
Çox qəribədir ki, Gürcüstan prezidenti Dağlıq Qarabağla bağlı bir kəlmə də işlətməyib. Məsələ ondadır ki, o, postsovet məkanındaki bütün separatçı ocaqların adlarını açıqlayıb. Ancaq bundan fərqli olaraq, Azərbaycan torpaqlarının işğalı və erməni separatçıları barədə heç nə deməyib. Halbuki, Marqvelaşvili də yaxşı bilir ki, digər separatçı ocaqlarda olduğu kimi, Dağlıq Qarabağda da separatçılığın körüklənməsində Rusiyanın da rolu var. Rusiyanın yardımı olmasaydı, erməni separatçıları və Ermənistan nə Dağlıq Qarabağı, nə də ətraf rayonları işğal edə bilməzdilər. Ən azından Marqvelaşvili bu məsələdə Rusiyanı tənqid edə bilərdi. Ancaq, göründüyü kimi, o bunların heç birini etməyib. Baxmayaraq ki, 2006-cı ildə Rusiya Gürcüstana qaz nəqlini dayandıranda Azərbaycan bu ölkəni çətin vəziyyətdən çıxardı. Gürcüstan da Azərbaycan kimi separatizmdən əziyyət çəkir. Bu baxımdan ekspertlər Marqvelaşvilinin məlum çıxışını necə şərh edirlər?
Məsələyə münasibət bildirən keçmiş diplomat, politoloq Fikrət Sadıqov Gürcüstan prezidentinin bu mövqeyini tənqid etdi: “Birinci dəfə deyil Marqvelaşvili Azərbaycana qarşı belə saymamazlıq edir. Bir müddət əvvəl azərbaycanlıların kompakt yaşadığı bölgədə səfərdə olanda ona təklif olundu ki, Xocalı soyqırımı zamanı həlak olanların xatirəsi bir dəqiqə ayaq üstə yad edilsin. O özünü elə apardı ki, sanki eşitmədi və faktiki olaraq buna əməl etmədi. İndi də Birləşmiş Ştatlarda çıxış edərkən Dağlıq Qarabağ münaqişəsini yada salmaq istəmir. Düşünmürəm ki, bütün bunlar təsadüf nəticəsində baş verib. Çünki o kifayət qədər savadlı və təcrübəli adamdır. Ona görə də ola bilməz ki, bütün bunlardan onun xəbəri olmasın. Yəni regionda nələrin baş verdiyini çox gözəl bilir. Sadəcə, Marqvelaşvili Ermənistanın xətrinə dəymək istəmir. Yaxşı olardı ki, o bunu açıq bəyan etsin. O zaman biz də öz işimizi bilərik. Ancaq o bütün bunları etmirsə və maraqlarımızı nəzərə almırsa, belə siyasət Gürcüstan-Azərbaycan münasibətlərinə bir zərbədir. O bir prezident olaraq bunu başa düşməlidir. Ona görə də Marqvelaşvilinin davranışı birmənalı şəkildə xoşagəlməz bir haldır və ikitərəfli münasibətlərin normal olmasına mənfi təsir edir. Çünki Azərbaycan Gürcüstanla müxtəlif layihələrdə iştirak edir. Neft-qaz kəmərləri, dəmir yolu Gürcüstanın ərazisindən keçir. Onlar bütün bunları dərk etməli və başa düşməlidirlər. Sözügedən məsələ ilə bağlı rəsmi bir araşdırma da aparmaq lazımdır. Biz bilməliyik onlar bizim strateji partnyorumuzdur, yoxsa Ermənistanın yaxın dostlarıdırlar? Qoy bizə cavab versinlər və aydınlaşdırsınlar. Biz də ondan sonra özümüzə nəticə çıxaraq”.
Vidadi ORDAHALLI
