Məhəmməd Əsədullazadə: “Menendez erməni lobbisinin rüşvəti əsasında bu kimi tədbirlərin keçirilməsində canfəşanlıq edir”
Ermənistan və erməni lobbisi qondarma rejimi dünyada təbliğ etmək üçün bütün vasitələrə əl atırlar. Müxtəlif qeyri-rəsmi görüşləri təbliğat vasitəsi olaraq əllərində bayraq edirlər. Məlum olduğu kimi, bu günlərdə qondarma separatçı qurumun “başçısı” Bako Saakyan ABŞ-da səfərdə olub. Ancaq Saakyanın görüşdüyü şəxslərin reputasiyası heç də yaxşı deyil.
Məsələ ondadır ki, ABŞ-ın Azərbaycanda keçmiş səfiri, Minsk Qrupunun sabiq həmsədri Metyu Brayza mətbuata açıqlamasında bununla bağlı bir sıra məqamlara toxunub. Onun fikrincə, senator Robert Menendez artıq uzun illərdir korrupsiya fəaliyyətinə görə FTB tərəfindən istintaqa cəlb edilib və məhkəmə qarşısına çıxacaq: “Şəxsi təcrübəmə əsaslanaraq deyə bilərəm ki, o mənim Azərbaycanda səfir təyin edilməyimə mane olmaq istəyib. O, Amerika Milli Konqresinin təsiri altındadır, bu təşkilatın əvvəlki prezidenti isə məhkum olunmuş cinayətkardır. Ona görə də mən Saakyanın korrupsiyaya uğramış Menendezlə hər hansı görüşlərinə xüsusi əhəmiyyət verməzdim”.
Məlumat üçün bir daha qeyd edək ki, Azərbaycanın işğal olunmuş ərazilərində yaradılmış qondarma rejimin “prezidenti” kimi özünü təqdim edən Bako Saakyanın ABŞ-a səfəri və ABŞ Konqresinin inzibati binasında qondarma rejimi təbliğ edən tədbir keçirməsi ilə əlaqədar olaraq, Birləşmiş Ştatların Azərbaycandakı səfiri Robert Sekuta Azərbaycan Xarici İşlər Nazirliyinə (XİN) çağırılıb. Səfirə Azərbaycan Xarici İşlər Nazirliyinin ABŞ Dövlət Departamentinə ünvanladığı etiraz notası təqdim edilib.
Bütün bunları ekspertlər necə şərh edirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bir sıra məqamlara toxundu: “ABŞ-da erməni lobbisi və Konqresdə olan bir qrup ermənipərəst konqresmenlər tərəfindən Azərbaycanın işğal olunmuş ərazilərində qurulan qondarma rejimin “başçısı” Bako Saakyanın qəbul olunması yaxşı hal deyil. Onun Vaşinqton səfəri Minsk qrupu həmsədri kimi ABŞ-ın münaqişənin həllində vasitəçiliyinə şübhə yaradır. Qeyd edim ki, ermənipərəst Robert Menendez tərəfindən Konqresdə senatorlarla baş tutmuş görüş qəbuledilməz və beynəlxalq hüququn tapdanmasıdır. Dünyada demokratiya və hüququn aliliyi mərkəzi olan Konqresdə bu tədbir təəssüf doğurur. Sabiq səfir Metyu Brayzanın fikirlərinə gəldikdə isə, qeyd edim ki, həqiqətən erməni lobbi qrupları Konqresin üzvlərini rüşvətlə ələ almağı bacarırlar. Menendez də erməni lobbisinin rüşvəti əsasında bu kimi tədbirlərin keçirilməsində canfəşanlıq edir. Ermənipərəst konqresmenlərin fəaliyyətini araşdırsalar, bunların bir mərkəzdən və rüşvətlə idarə olunduğu məlum olar. Rəsmi Bakı Menendezi “qara siyahı”ya salmalı və hüquqi prosedur üzrə separatizmə dəstəyinə görə beynəlxalq məhkəməyə verməlidir. Qeyd edim ki, Amerikanın bəzi bu kimi konqresmenlərinin siyasəti yalnız rüşvət və korrupsiya üzərində qurulub. Bunların fəaliyyəti ABŞ-ın beynəlxalq ədalət siyasətinə zərbə vurur. Təəccüblü məqam ondan ibarətdir ki, Ukrayna, Moldava və Gürcüstandakı separatçı başçılar ABŞ-ın sanksiyası ilə üzləşib. Həmin separatçılar bu ölkəyə qəti addım ata bilməzlər. Ancaq erməni separatçılarına bu şamil olunmur. Belə olan təqdirdə Azərbaycan haqlı olaraq öz etiraz notasını bildirir. ABŞ Ermənistana və onun Qarabağ separatçılarına 70 milyon dollar yardım ayırır. Bu yardımın separatizmin inkişafına səbəb olacağı şübhəsizdir. ABŞ-ın bu maliyyəni ayırmaması lazımdır. Qarabağ separatçılarına "humanitar" yardım adı ilə vəsait ayrılması, Qarabağ danışıqlarının uzanmasına və Ermənistanın qeyri-konstruktiv mövqe tutmasına səbəb olur. Biz ABŞ-dan separatçılara sanksiyalar gözlədiyimiz bir vaxtda, maliyyənin ayrılması bizdə təəssüf doğurur və ABŞ-ın münaqişənin həlli ilə bağlı vasitəçiliyinə kölgə salır”.
Vidadi ORDAHALLI
