Yeganə Hacıyeva: “Bu əməkdaşlıq özlüyündə Cənubi Qafqaz regionunun təhlükəsizlik və siyasi sabitliyində əvəzedilməz rol oynayır”
Azərbaycan Respublikasının Prezidenti İlham Əliyev martın 12-də ölkəmizdə rəsmi səfərdə olan Gürcüstanın baş naziri Giorgi Kvirikaşvili ilə görüşüb. Prezident İlham Əliyev bildirib ki, Azərbaycanla Gürcüstan arasındakı münasibətlər artan dinamika üzrə inkişaf edir:
“Əminəm ki, sizin səfəriniz Gürcüstan-Azərbaycan dostluq, qardaşlıq münasibətlərinin inkişafında mühüm rol oynayacaq. Biz bir çox sahələrdə uğurlu əməkdaşlıq edirik. Şadam ki, ticarət dövriyyəsi artır. Şadam ki, Azərbaycan Gürcüstana sərmayə qoyan ölkələrin arasında birinci yeri tutur. 2012-ci ildən biz bu birinciliyi saxlayırıq. Bu onu göstərir ki, ölkənizdə çox gözəl sərmayə iqlimi var. Bu, eyni zamanda, onu göstərir ki, bizim əlaqələrimiz çox yüksək səviyyədədir.
Əlbəttə, bizi birləşdirən bir çox önəmli qlobal layihələr var. Biz keçən ilin oktyabr ayında sizinlə bərabər onlardan birinin açılışını qeyd etdik – Bakı-Tbilisi-Qars. Bu il Cənubi Qafqaz qaz kəmərinin, TANAP layihəsinin istifadəyə verilməsi nəticəsində əməkdaşlığımız daha da yüksək pilləyə qalxacaq. Yəni bizim əməkdaşlığımız hətta regional formatdan çıxıb qlobal müstəviyə qalxır. Bütün bu uğurlu addımların təməlində bizim dostluğumuzdur, qardaşlığımızdır. Məhz həmin münasibətlər əminəm ki, bundan sonra da xalqlarımızın maraqlarına xidmət edəcək”.
Gürcüstanın baş naziri isə bildirib ki, ölkələrimizin regional və qlobal formatlarda əməkdaşlığı çox vacibdir: “Həm siyasi məsləhətləşmələr, həm də qlobal formatda əməkdaşlığımız mövcuddur. Gürcüstan hər zaman Azərbaycanın mövqeyini dəstəkləyir. Bu bizim strateji əlaqələrimizin göstəricisidir. Azərbaycanın ilk respublika elan olunmasının 100 illiyini təbrik edirəm. Bu həm Gürcüstan, həm də Azərbaycan Respublikası üçün çox mühüm tarixdir. Ümid edirəm ki, biz bunu layiqli şəkildə qeyd edəcəyik. Bir daha səmimi qəbul üçün minnətdarlığımı bildirirəm”.
Göründüyü kimi, İlham Əliyev iki ölkə arasındakı münasibətləri özünəməxsus şəkildə şərh edərək bildirib ki, bizim əməkdaşlığımız hətta regional formatdan çıxıb qlobal müstəviyə qalxır. Ölkə başçısının bu yanaşmasını necə şərh edə bilərik?
Politoloq Yeganə Hacıyeva qəzetimizə bildirdi ki, Azərbaycan-Gürcüstan əlaqələri dostluq və qarşılıqlı faydalılıq əsasında strateji tərəfdaşlıq münasibətləridir: “Azərbaycan Gürcüstanda əsas investor və kreditor ölkədir. Azərbaycan Dövlət Neft Şirkəti Gürcüstan büdcəsinə ən çox vergi ödəyən şirkətdir. Gürcüstan azərbaycanlıların kompakt yaşadığı ölkədir. Həmin ölkənin yarım milyondan çox etnik azərbaycanlı vətəndaşı var.
Bildiyiniz kimi, Gürcüstan ölkəmiz tərəfindən həyata keçirilən irimiqyaslı beynəlxalq iqtisadi layihələrin fəal və etibarlı iştirakçısıdır. Azərbaycan Prezidenti İlham Əliyevin Azərbaycan- Gürcüstan əməkdaşlığının regional formatdan kənralşaraq qlobal müstəviyə qalxması haqqında fikrinə şərh olaraq bildirmək istərdim ki, ölkələrimiz Transqafqaz və Transxəzər magistral layihələri kimi qlobal iqtisadi və kommunikasiya layihələrində eyni mövqedən çıxış edən etibarlı tərəfdaşlardır. Azərbaycanla Gürcüstanı Bakı-Supsa, Bakı-Tiflis-Ceyhan, Bakı-Tiflis-Ərzurum, TRASECA, Bakı-Tiflis-Qars layihəsi kimi qlobal enerji, nəqliyyat-kommunikasiya layihələri birləşdirir. İki ölkə arasında mövcud qlobal əməkdaşlığın digər siyası və təhlükəsizlik məqamları haqqında danışsaq, bu sahələrdə də maraqların uzlaşmasını qeyd edə bilərik. Tiflislə Bakı arasında Cənubi Qafqazda regional təhlükəsizliyin təmin olunmasında genişmiqyaslı əməkdaşlıq mövcuddur və bu əməkdaşlıq özlüyündə Cənubi Qafqaz regionunun təhlükəsizlik və siyasi sabitliyində əvəzedilməz rol oynayır. Azərbaycan və Gürcüstanın bu regionda terrorizm və separatizmə qarşı mübarizə ilə bərabər, narkotrafik, “çirkli pulların yuyulması” və neft-qaz borularının təhlükəsizliyinin birgə mühafizəsi sahələrində irimiqyaslı əməkdaşlıqları mövcuddur. Bu əməkdaşlıq isə özlüyündə qlobal təhlükəsizliyin bir bəndidir. Ölkələrin qlobal siyasi əməkdaşlığı haqqında söz açsaq, işğaldan və separatizmdən əziyyət çəkən iki dövlət olaraq, siyasi mövqe və maraqların qarşılıqlı uzlaşdırılması, beynəlxalq siyasi təşkilatlarda tərəflərin maraqlarının qarşılıqlı qorunması və təmin edilməsi sahəsində də yüksək əməkdaşlıq mövcuddur”.
Məhəmmədəli QƏRİBLİ
