Ramil Hüseynov: “Ölkə daxilində onun qayıdışı ilə bağlı ciddi sosial sifariş olsa və bunun elementləri qabarıq formada özünü göstərsə...”
Gürcüstanın keçmiş prezidenti Mixeil Saakaşvili yenidən Gürcüstanda hakimiyyətə qayıtmaq iddiasını ortaya qoyur. O, “Vahid Milli Hərəkat” partiyası üzvlərinə videomüraciətində bunu ifadə edib. Belə ki, videomüraciətində M.Saakaşvili tərəfdarlarını ölkədə seçkilərə aktiv hazırlaşmağa çağırıb. Bu müraciətində o, Gürcüstanda hakimiyyətə qayıtmaq istəyini bildirib.
2004-cü ildə “rəngli inqilablar” dalğasında hakimiyyətə gələn Saakaşvili ilk vaxtlar emosional çıxışları ilə diqqəti cəlb edirdi. Gürcüstanda aşağı səviyyəli korrupsiyaya qarşı mübarizəsi və Rusiya əleyhinə sərt ritorika ilə bağlı uzun illər boyu Qərbin diqqət mərkəzində oldu. Bu müddət ərzində Qərb ona çox dəstək verdi. Yaxın vaxtlara qədər ingilis dilində doğma dili qədər səlis danışan bu adam 2012-ci ildə partiyasının parlament seçkilərində məğlubiyyətindən və 2013-cü ildə prezidentlik müddəti başa çatandan sonra tutduğu kürsünü təhvil verdi.
Prezident postundan gedəndən bir il sonra, 2014-cü ildə o, Ukraynada prezidenti seçilən Petro Poroşenko ilə əlaqəsi əsnasında Ukrayna hökumətində məsləhətçi, daha sonra Odessa vilayətinin qubernatoru təyin olunub. Ancaq Odessada Saakaşvili artıq Gürcüstanı çox dəyişən və yeni vəzifəsində çox işin öhdəsindən gələ bilən zirək islahatçı deyildi. Saakaşvilinin aşırı emosionallığı, Ukraynanın Gürcüstan olmaması çox keçmədi ki, Poroşenko ilə Saakaşvili arasında münasibətlərin pisləşməsinə gətirib çıxardı. Bundan başqa, Ukraynada islahatların sürətinin Gürcüstanla müqayisədə aşağı olması və digər faktorlar Saakaşvilinin bu ölkədəki karyerasına son qoydu. Faktiki olaraq, Ukraynada Saakaşviliyə dəstək iki və ya üç faizdən yuxarı deyil. Son aylarda orada keçirdiyi mitinqlərə ümumən 5 min nəfərdən daha az adam toplaşıb. Bəzi siyasi ekspertlərin fikrincə, Saakaşvilinin davamlı sərt anti-Rusiya ritorikasına baxmayaraq, demək olar ki, Rusiya və ondan kənarda heç kim Saakaşvili qədər Ukraynanı Qərbdə gözdən salmağa çalışmır. İndi Saakaşvili ümidini Gürcüstana bağlayıb. Ancaq Gürcüstanda onun siyasi partiyası rəqib qruplara bölünüb, onlardan heç biri ciddi səs ala bilmir və heç bir real hakimiyyətə malik deyil.
Maraqlıdır, bütün bunların fonunda, Saakaşvilinin siyasi perspektivi varmı?
Məsələyə münasibət bildirən Vətəndaş və İnkişaf Partiyasının sədr müavini Ramil Hüseynovun sözləriinə görə, bunu birmənalı demək çətindir: “Əvvəla siyasətdə hər şey mümkündür və mümkün olmayan yoxdur. Siyasətin bir fəlsəfəsi də mümkünsüzü mümkünə çevirməkdir. O baxımdan, Saakaşvilinin siyasi karyerası barədə birmanalı fikir irəli sürmək çətindir. Demək ki, onun Ukraynada uğursuzluğa düçar olması Saakaşvilinin karyerasının sonudur, bu doğru olmaz. Reallıq ondan ibarətdir ki, Saakaşvilinin Gürcüstanda həyata keçirdiyi islahatlar ölkə tarixində böyük iz qoyub. Faktiki olaraq onun qurduğu sistemin əsasları üzərində ölkə idarə olunur. Ancaq bir fakt da ondan ibarətdir ki, Saakaşvili dönəmindəki kimi ölkədə islahatlar həyata keçirilmir. Bəzi sahələrdə problemlər var. Saakaşvilinin rəhbərlik etdiyi partiya da ölkənin ictimai-siyasi həyatında əvvəlki kimi aparıcı mövqeyə malik deyil. Digər tərəfdən, Gürcüstanın hazırkı hakimiyyəti bütün inzibati resursları işə salaraq çalışır ki, Saakaşvilinin ölkəyə gəlməsinin qarşısını alsın. Təbii ki, ölkə daxilində Saakaşvilinn qayıdışı ilə bağlı ciddi sosial sifariş olsa və bunun elementləri qabarıq formada özünü göstərsə, o zaman onun yenidən hakimiyyətə qayıtması şansı var. Ancaq hazırda bu əlamətlər Gürcüstan cəmiyyətində özünü göstərmir. Gürcüstanın hazırkı hakimiyyəti Qərbyönümlü xətti davam etdirməklə yanaşı, regionda geosiyasi vəziyyəti də nəzərə alır. Mümkün olan qədər çalışır ki, Rusiya ilə pisləşən münasibətləri müəyyən qədər düzəltsin. Hələlik bununla bağlı ciddi nailiyyətlər olmasa da, ən azından, Saakaşvilinin vaxtındakı kimi iki ölkə arasında münasibətlər gərgin deyil. Ən nəhayət, Gürcüstanda keçiriləcək seçkilərdə Qərbin Saakaşviliyə nə dərəcədə dəstək verəcəyi də bəlli deyil. Ona görə də bu məsələdə birmənalı fikir bildirmək çox çətindir”.
Vidadi ORDAHALLI
