Arzu Nağıyev: “Çox güman ki, İranın həmin bölgələrə böyük investisiya yatırmaq planı var”
İran İslam Respublikasının Prezidenti Həsən Ruhaninin Azərbaycana səfərinin tarixi və proqramı açıqlanıb. Məlum olub ki, H.Ruhaninin səfəri bu il martın 28-nə planlaşdırılır.
Səfər zamanı İran Prezidendi Bakıda bir sıra rəsmi görüşlər keçirəcək. Onun, həmçinin, Naxçıvana səfəri və Neftçalada Maşınqayırma Zavodunun açılışında iştirakı gözlənir.
Bir sıra ikitərəfli sənədlərin imzalanması da nəzərdə tutulur.
Onu da qeyd edək ki, İran Prezidentinin Azərbaycana gəlişi bir sıra parametrlərə görə regional beynəlxalq münasibətlərin yeni gövrü ilə üst-üstə düşür. Belə ki, Azərbaycanın layihələri bir-bir həyata keçir, Ermənistanın layihələri çökür, özü isə daha dərin təcridə düşür və sair.
Bu səfəri iki qonşu ölkə arasındakı münasibətlər kontekstindən necə şərh etmək olar?
Təhlükəsizlik məsələləri üzrə ekspert Arzu Nağıyev qəzetimizə bildirdi ki, İran Prezidenti cənab Həsən Ruhaninin Azərbaycana səfəri mart ayının 28-də planlaşdırılır. Cənab Ruhani Azərbaycan Prezidenti cənab İlham Əliyev və bir sıra rəsmi şəxslərlə görüşlər keçirəcək. Məlumatlara görə, onun Naxçıvana səfəri və Neftçalada Maşınqayırma Zavodunun açılışında iştirakı da gözlənir. Düşünürəm ki, bu səfər əsasən iqtisadi məsələlərlə bağlıdır. Belə ki, bu görüşdən öncə İranın iqtisadçılarından ibarət bir qrupun ölkəmizə və Azərbaycanın İqtisadiyyat Nazirliyinin nümayəndə heyətinin İrana səfəri gözlənir. Səfərdə əsasən kənd təsərrüfatı avadanlıqlarının istehsalı ilə bağlı birgə müəssisənin yaradılması, əkin sahələri ilə bağlı layihələrin işlənməsi də nəzərdə tutula bilər. Bundan başqa, əvvəllər də nəzərdə tutulan sərhədyanı azad iqtisadi zonanın yaradılması da gündəmə gələ bilər. Həmçinin, farmoseptika, avtobus zavodunun tikintisi də layihə kimi müzakirə edilə bilər. Təbii ki, ən mühüm layihə Astara-Rəşt dəmir yolunun açılışı, tikintisi və ümumiyyətlə, “Şimal-Cənub” dəhlizinin fəaliyyəti ilə bağlı ola bilər. Təbii ki, bütün bu görüşlərdə həmin iqtisadi layihələrlə bağlı ikitərəfli müqavilələr də imzalanacaq. İran Azərbaycanın yaxın qonşusudur. Bundan əlavə, ölkələrimiz arasında bir çox ortaq dəyərlər mövcuddur. İranda bizim milyonlarla soydaşımız yaşayır, biz eyni mədəniyyəti, eyni dini bölüşürük. Belə ölkələrin başçılarının bir-birinə etdiyi rəsmi səfərlər dövlətlərimiz arasındakı bağları daha da möhkəmləndirir. Azərbaycan öz xarici siyasət kursunda yaxın qonşularla münasibətlərə xüsusi önəm verir. Ermənistan istisna olmaqla, bizim bütün qonşu ölkələrlə olduqca normal münasibətlərimiz mövcuddur. Təqdirəlayiq hallardan biri də Ruhaninin səfər proqramında yalnız paytaxta deyil, əyalətlərə də yer ayırmasıdır. Çox güman ki, İranın həmin bölgələrə böyük investisiya yatırmaq planı var. Bu səfərdən yalnız müsbət nəticələr gözləyirik. Azərbaycan bir qonşu ölkə kimi İranın hörmət və ehtiramını daim saxlayıb”.
Məhəmmədəli QƏRİBLİ
