Elman Məmmədov: “Bu etirafların sayı getdikcə çoxalacaq” Elşən Həsənov: “Erməni diasporunun senatorlar, konqresmenlər üçün cazibəsi azalıb” “Tramp seçiləndən sonra ABŞ-dakı erməni diasporuna onların göstərdiyi “xidmətləri”...”
ABŞ-ın Kaliforniya ştatının paytaxtı Sakramento şəhərində erməni lobbisinin təşkilatçılığı ilə Kaliforniya Ştat Senatında Sumqayıt hadisələrinin 30 illiyinə, Kaliforniya ştatı ilə Ermənistan arasında iqtisadi əlaqələrin təşviqinə və Türkiyədən Kaliforniya sərmayələrinin çıxarılmasına həsr olunan dinləmələr keçirilib.
Təxminən 1 milyonadək erməninin yaşadığı Kaliforniyadakı erməni lobbisinin aramsız səylərinə və ayrı-ayrı senatorlara böyük məbləğlərdə pul xərcləməsinə baxmayaraq, Kaliforniya Ştat Senatının 40 üzvündən yalnız ikisi (həyat yoldaşı erməni olan senator Skot Vilk və erməni lobbisinin çoxdankı havadarı senator Entoni Portantino) tədbirə qatılıb. Müzakirələr barədə maraqlı məlumatlar gəlməkdədir.
Amerikadakı radikal erməni lobbisinin təhriki ilə Kaliforniya Ştat Senatında fevralın 28-də həyata keçirilən, Sumqayıt hadisələrinin 30-cu ildönümünə həsr olunmuş dinləmələrdə lobbi nümayəndəsi tərəfindən Ermənistan-Azərbaycan münaqişəsi ilə bağlı həqiqətə uyğun olmayan, qərəzli və təhrif olunmuş məlumatlar səsləndirilib.
“Trend”in məlumatına görə, dinləmələrin ardınca zalda əyləşənlər şərh və suallar verməyə dəvət olunublar. Kaliforniyada yaşayan Azərbaycan icmasının gənc üzvləri gözəl ingiliscə faktlara əsaslanan sərt çıxışlar edərək, səsləndirilən yalan məlumatları ifşa ediblər. Onlar həm senatorları, həm də çıxış edən erməni lobbisinin nümayəndəsini əməlli-başlı sıxışdıraraq, Sumqayıt hadisələrinə toxunulduğu halda, niyə heç bir yerdə Xocalı faciəsi, Ermənistanın Azərbaycana qarşı təcavüzü nəticəsində öz doğma torpaqlarından didərgin düşmüş 1 milyona yaxın qaçqın və məcburi köçkün haqqında bəhs edilmədiyi, nəyə görə Azərbaycan icmasından heç kimin çıxış üçün dəvət olunmadığı və məsələlərə birtərəfli yanaşılması ilə bağlı suallar ünvanlayıblar. Pis vəziyyətdə qalan və suallara cavab verə bilməyərək hər vəchlə onlardan yayınmağa çalışan senator E.Portantinonun köməyinə erməni icmasının üzvləri yetişməyə çalışıblar.
Şərh edənlərdən biri, Amerika Erməni Assambleyasının ABŞ-ın Qərb region üzrə direktoru Mihran Tumacan çıxışında həm özünü, həm də bütün erməniləri çətin vəziyyətə salaraq, Ermənistanın Xocalıda dinc azərbaycanlı əhaliyə qarşı qırğın törətdiyini etiraf edib və dolaşıq fikirləri ilə, əslində, özlərini ifşa edib. M.Tumacanın çıxışından həmin hissəni olduğu kimi təqdim edirik: “Mən burada azərbaycanlı tələbələrin səsləndirdiyi fikirlərə cavab vermək istəyirəm. Onlar yanlış olaraq Xocalıda baş verənləri soyqırımı adlandırırlar. Orada baş verənlər soyqırımı deyil, faciədir. Gənc yaşında həlak olmuş tanınmış azərbaycanlı jurnalist Çingiz Mustafayevin faciə yerindən çəkdiyi videolar açıq-aydın göstərir ki, Ermənistan silahlı qüvvələri Xocalıda yaşayan azərbaycanlıları öncədən xəbərdar etmişdi ki, Xocalıda... (dili dolaşır) gərgin döyüşlər gedəcək. Bundan başqa, Ermənistan qoşunları mülki əhalinin sərbəst çıxması üçün dəhliz də açmışdılar. Çoxlu azərbaycanlı bu dəhlizdən keçib gedə bildilər, ancaq bir çoxu da keçə bilmədi. Çingiz Mustafayev və hadisə yerindən reportajlar hazırlayan digər azərbaycanlı jurnalistlər də qeyd ediblər ki, çoxlu sayda azərbaycanlı məhz o dəhlizdən keçmədikləri üçün öldürülüblər”.
Faktiki olaraq erməni lobbisinin Amerikadakı rəhbərlərindən biri olan bu şəxs Xocalıda azərbaycanlıların Ermənistan silahlı qüvvələri tərəfindən qətlə yetirilməsini etiraf edərək, bu cinayətə öz aləmində haqq qazandırmaq üçün çox gülünc arqumentdən istifadə edir. Axı günahsız və dinc insanların, qadınların, körpə uşaqların, qocaların ölümünə necə haqq qazandırmaq olar?
Erməni diasporunun beşiyi sayılan Kaliforniyada onların belə biabırçılıqla üzləşməsinin səbəbi nədir?
Ekspert Elşən Həsənovun sözlərinə görə, bunun bir sıra səbəbləri var: “Mən ilk növbədə bunu Azərbaycan dövlətinin yürütdüyü uğurlu xarici siyasət kursu ilə əlaqələndirə bilərəm. Bununla yanaşı, bura Azərbaycanın çox bəyənilən tərzdə həyata keçirdiyi diaspor və lobbiçilik fəaliyyətini də aid edə bilərik. Əvvəl biz müdafiə olunurduq. Sonra cənab Prezidentin diplomatlarımıza verdiyi tövsiyədən sonra biz hücum taktikasını seçdik. Bizim səfirliklər, diasporumuz Azərbaycan həqiqətlərinin çatdırılması ilə bağlı işini hücum üzərində qururlar. Artıq bunun nəticəsini görürük. Sizin dediyiniz tədbirlə bağlı məlumatlarla tanış oldum. Görürsünüz ki, məhz həmin tədbirdə bir çox diaspor təşkilatlarımız iştirak edib. Hətta fərdi şəkildə qatılan soydaşlarımız da olub. Verilən məlumatda qeyd olunur ki, soydaşlarımız ermənilərin iddialarının saxta olmasını elə zalda özlərinə bildiriblər. Yəni ermənilər üçün komfortlu, yalnız özlərinin danışıb, özlərinin də əl çaldıqları tədbir olmayıb. Təbii ki, belə atmosferdən konqresmenlər çəkinir. Bundan əlavə, ABŞ-dakı erməni diasporunun həmin ölkədəki proseslərə təsir imkanları, demək olar ki, sıfıra enib. Bunun bir səbəbi bizim fəallığımızla bağlıdırsa, digər vacib nüansı isə Trampın hakimiyyətə gəlməsi ilə əlaqədardır. Bilirsiniz ki, Trampın seçilməsi bütün dünyanı təəccübləndirdi. Ermənilərin belə seçkilərə təsir imkanları olurdu. Onlar bütün stavkanı Trampa yox, Hillari Klintona qoymuşdular. Hətta Tramp haqda aparılan “qara piar” kampaniyasının maliyyələşməsi də onların başının altından çıxdı. Tramp seçiləndən sonra ABŞ-dakı erməni diasporuna onların göstərdiyi “xidmətləri” hiss etdirir. Bu baxımdan da erməni diasporunun senatorlar, konqresmenlər üçün cazibəsi azalıb. Başqa bir səbəb isə erməni diasporu ilə Ermənistan hakimiyyəti arasında olan fikir ayrılığıdır. Bu səbəbdən də diaspor belə tədbirlərə barmaqarası yanaşmağa başlayıb. İstənilən halda, bu, erməni diasporunun da yalanlarının ifşa olunması anlamına gəlir. Belə halların təkrarlanması növbəti tədbirlərin daha da biabırçı olacağına bir siqnaldır”.
ABŞ-dakı radikal erməni lobbisinin təhriki ilə Kaliforniya Ştat Senatında keçirilən, Sumqayıt hadisələrinin 30-cu ildönümünə həsr olunmuş dinləmələrdə erməni lobbisinin rəhbərlərindən birinin Xocalı soyqırımı ilə bağlı etirafı gözləniləndir. Bunu isə “Trend”ə açıqlamasında Xocalıdan olan millət vəkili Elman Məmmədov deyib. Onun sözlərinə görə, son vaxtlar Ermənistanda istər rəsmi, istərsə də qeyri-rəsmi şəxslər Ermənistan siyasi hakimiyyətinin onları uçuruma sürükləməsi barədə açıqlamalar verirlər: “Onların da içərisində bir az ədalətli olanları var və bu, qənaətbəxş haldır. Əslində, bu faciənin ermənilər tərəfindən törədilməsini 1992-ci il fevralın 27-də ermənilər etiraf etmişdi. Həmin vaxt Zori Balayan kimi türk qanına susamış erməni cani etiraf etmişdi ki, dostu Xaçaturla birlikdə Xocalıda körpə türk uşağını divara mismarlayaraq işgəncə veriblər. Digər bir livanlı erməni jurnalist isə etiraf etmişdi ki, Xocalı soyqırımını ermənilər törədib. Amma onlar həmin vaxt dərk etmirdilər ki, nə deyirlər, ermənilərin törətdikləri vəhşilik nədir. Onlara bu faciənin miqyası sonradan çatdı. Amma bu gün erməni lobbisinin rəhbərlərindən biri də təsdiqləyir ki, Ermənistan dövləti, Ermənistan silahlı qüvvələri Xocalıda soyqırım törədiblər və Ermənistana rəhbərlik edənlər və onların ətrafları bu soyqırımda iştirak ediblər".
Millət vəkili vurğulayıb ki, bu gün başda Serj Sarkisyan olmaqla Ermənistan rəhbərliyində təmsil olunanlar körpə, qoca, qadın, köməksiz insanların qatilləridirlər: "Ermənistanı müdafiə edən, himayə edən dövlətlər ədalətlidirlərsə, bundan nəticə çıxarsınlar. Amma bu günə qədər biz həmin dövlətlərin cinayətkarın yanında olduğunu görmüşük. Bu etirafların sayı getdikcə çoxalacaq".
Məhəmmədəli QƏRİBLİ
